சிங்கீதம் முதல் சிங்கீதம் வரை

“அபூர்வ சகோதரர்கள்” படத்தில் ஒரு பரபரப்பான காட்சி.

அப்பு கமல் செய்த கொலைகளுக்காக ராஜா கமல் துரத்தப்படும் காட்சி. அப்போது தான் தன்னுடைய மறுபிள்ளை வளர்ந்து ஆளாகியிருப்பதைத் தாய் ஶ்ரீவித்யா கண்டு உணர்ச்சி மேலிடுகிறார்.

இந்தக் காட்சியை கமல்ஹாசன் விபரித்ததும் “ஆகா அட்டகாசமான செண்டிமெண்ட் சீன் அகப்பட்டுடுதுடா” என்று கமலின் உசுப்பேற்றலில் கிட்டத்தட்ட 15 பக்க வசனக் காட்சியாக கிரேஸி மோகன் எழுதித் தள்ளிவிட்டாராம். அதைச் சும்மா படிக்கவே ஏழெட்டு நிமிடங்கள் பிடிக்கும்.

படத்தின் இயக்குநர் சிங்கீதம் சீனிவாசராவ் முன் கமல் அந்தக் காட்சியை ஒத்திகை காட்டுகிறார். எல்லாவற்றையும் பார்த்து விட்டு மெல்லச் சிரித்து விட்டுச் சொன்னாராம்,

“கமல் ! உங்களுக்கு இந்தக் காட்சிக்காக 30 sec அல்லது

போனாப்போகுது அதிகபட்சம் ஒரு நிமிடம் தர்ரேன்” 

போய் வேற மாதிரிச் சிந்திச்சுட்டு வாங்க”

என்று சொல்லி அனுப்பி விட்டார் சிங்கீதம்.

கமல் குழுவினருக்குப் படு ஏமாற்றம். வேண்டா வெறுப்பாக மாற்றியமைத்தது தான் இப்போது திரையில் காணும் காட்சி. அதில் தாய் ஶ்ரீவித்யா & மகன் ராஜா கமல் சந்திக்கும் காட்சி அதிகபட்சம் 30 விநாடிகள் தான்.

இந்தச் சம்பவத்தை அண்மையில் சாய் வித் சித்ராவில் கமல்ஹாசனோடு  அந்தக் காலத்தில் இணைந்து பணியாற்றிய திரு ராசி அழகப்பன் அவர்கள். 

சாய் வித் சித்ராவில் சிங்கீதம் கலைந்து கொண்ட போதும், இம்மாதிரியாக நாசூக்காக கமலிடம் வேலை வாங்கியதைக் கள்ளச் சிரிப்போடு சொல்லியிருப்பார்.

கமல் & சிங்கீதம் கூட்டணியைப் பாருங்கள், Sommokadidhi Sokokadidhi (தமிழில் இரு நிலவுகள் என்று வெளிவந்தது), ராஜ பார்வை, புஷ்பக் (பேசும் படம்), அபூர்வ சகோதரர்கள், மைக்கேல் மதன காமராஜன், காதலா காதலா, மும்பை எக்ஸ்பிரஸ் மற்றும் மகளிர் மட்டும் என்று ஒவ்வொன்றும் தனி ரகம்.

சிங்கீதம் சீனிவாசராவ் இயக்கிய இறுதிப் படமான சிங்கீதம் கூட ராஜபார்வை காலத்தில் அதாவது 45 வருடங்களுக்கு முன்னர் கமல்ஹாசனிடம் சொல்லப்பட்ட கதை. அதை இப்போது எடுத்து முடித்து நிறைவு கண்டார்.

தொண்ணூறுகளுக்கு முன்பெல்லாம் கமல் படங்களின் இயக்குநர் சிங்கீதம் சீனிவாசராவ் என்று காணும் போது கமல் தான் புனைப்பெயரில் விளையாடுகிறாரோ என்று எண்ணுவதுண்டு.

ராஜாஜியின் திக்கற்ற பார்வதி, ராஜபார்வை. புஷ்பக், அபூர்வ சகோதரர்கள் ஆதித்யா 369, Ghatothkach போன்ற படங்களின் வழி சிங்கீதம் இந்திய சினிமாவின் முக்கிய அடையாளம்.

ஒரு கலைப்படைப்பாளி தான் வாழும் காலத்திலேயே தன்னுடைய படைப்புலக அனுபவத்தைக் காணொளி வழியாக ஆக்கித் தந்த வகையில் மிகச் சொற்பமான பகிர்வுகளே இருக்கின்றன.

சிங்கீதம் சீனிவாசராவ் தன்னுடைய வாழ்வியல் அனுபவங்களைத் தனக்கென ஒரு பிரத்தியோகத் தளத்தில் பகிர்ந்திருப்பது.

ஒன்றல்ல இரண்டல்ல மொத்தம் 53 பாகங்கள். எப்பேர்ப்பட்ட அசுர முயற்சி இது.

திரைப்படத் துறையில் 71 வருடகாலம், 54 வருடங்களாக இயக்குநர் என்று வாழ்ந்து தன் வாழ்க்கையை அர்த்தப்படுத்தியிருக்கிறார்.

சிங்கீதம் ஒரு கதாசிரியர்

சிங்கீதம் ஒரு இயக்குநர்

சிங்கீதம் ஒரு தயாரிப்பாளர்

சிங்கீதம் ஒரு பாடலாசிரியர்

சிங்கீதம் ஒரு இசையமைப்பாளர்

சிங்கீதம் ஒரு நடிகர்

நான் இசையமைக்கும் படத்துக்கு நீங்கள் தான் இசை ஒருங்கமைப்பாளராக இருக்க வேண்டும் என்று இளையராஜாவிடம் ஒரு சமயம் சொல்லி இருக்கிறார் சிங்கீதம்.

1986 ஆம் ஆண்டு கன்னட சூப்பர் ஸ்டார் ராஜ்குமார் படத்தை இயக்கியதோடு படத்தில் இசையும் சிங்கீதம் தான்.

அந்தப் பரபரப்பான காலத்திலும் இளையராஜா வந்து சிங்கீதம் படத்தின் இசை ஒருங்கமைப்பாளராக/ நெறியாளராக (conductor)

தான் முன் சொன்ன வாக்குறுதியை நிறைவேற்றுகிறார். 

அந்தப் படம் தான் “பாக்யலஷ்மி பரம்மா” .

இப்படித்தான் வாழ்ந்து முடிக்க வேண்டும் என்று சொல்லி வைத்த மனிதர்களில் புது உதாரணம் நம் சிங்கீதம்.

அந்தக் குறும்புப் புன்னகையும், இடிச் சிரிப்புமாக சிங்கீதம் நம் மனதில் நிறைந்திருப்பார்.

சிங்கீதம் முதல் சிங்கீதம் வரை 

கானா பிரபா

04.10.2026