சிங்கீதம் முதல் சிங்கீதம் வரை

இந்திய சினிமாவின் மிக முக்கியமான படைப்பாளியாக விளங்கிய சிங்கீதம் சீனிவாசராவ் தனது 95 ஆவது வயதில் அக்டோபர் 3 ஆம் திகதி மறைந்து விட்டார். திரைப்படத் துறையில் 71 வருடகாலம், 54 வருடங்களாக இயக்குநர் என்று வாழ்ந்து தன் வாழ்க்கையை அர்த்தப்படுத்தியிருக்கிறார்.

கமல்ஹாசன் & சிங்கீதம் சீனிவாசராவ் கூட்டணியைப் பாருங்கள், Sommokadidhi Sokokadidhi (தமிழில் இரு நிலவுகள் என்று வெளிவந்தது), ராஜ பார்வை, புஷ்பக் (பேசும் படம்), அபூர்வ சகோதரர்கள், மைக்கேல் மதன காமராஜன், காதலா காதலா, மும்பை எக்ஸ்பிரஸ் மற்றும் மகளிர் மட்டும் என்று ஒவ்வொன்றும் தனி ரகம். 

சிங்கீதம் சீனிவாசராவ் இயக்கி இந்த ஆண்டு வெளிவந்த இறுதிப் படமான சிங்கீதம் கூட ராஜபார்வை காலத்தில் அதாவது 45 வருடங்களுக்கு முன்னர் கமல்ஹாசனிடம் சொல்லப்பட்ட கதை. அதை இப்போது எடுத்து முடித்து நிறைவு கண்டார்.

தொண்ணூறுகளுக்கு முன்பெல்லாம் கமல் படங்களின் இயக்குநர் சிங்கீதம் சீனிவாசராவ் என்று காணும் போது கமல் தான் புனைப்பெயரில் விளையாடுகிறாரோ என்று எண்ணுவதுண்டு.

“அபூர்வ சகோதரர்கள்” படத்தில் ஒரு பரபரப்பான காட்சி.

அப்பு கமல் செய்த கொலைகளுக்காக ராஜா கமல் துரத்தப்படும் காட்சி. அப்போது தான் தன்னுடைய மறுபிள்ளை வளர்ந்து ஆளாகியிருப்பதைத் தாய் ஶ்ரீவித்யா கண்டு உணர்ச்சி மேலிடுகிறார்.

இந்தக் காட்சியை கமல்ஹாசன் விபரித்ததும் “ஆகா அட்டகாசமான செண்டிமெண்ட் சீன் அகப்பட்டுடுதுடா” என்று கமலின் உசுப்பேற்றலில் கிட்டத்தட்ட 15 பக்க வசனக் காட்சியாக கிரேஸி மோகன் எழுதித் தள்ளிவிட்டாராம். அதைச் சும்மா படிக்கவே ஏழெட்டு நிமிடங்கள் பிடிக்கும்.

படத்தின் இயக்குநர் சிங்கீதம் சீனிவாசராவ் முன் கமல் அந்தக் காட்சியை ஒத்திகை காட்டுகிறார். எல்லாவற்றையும் பார்த்து விட்டு மெல்லச் சிரித்து விட்டுச் சொன்னாராம்,

“கமல் ! உங்களுக்கு இந்தக் காட்சிக்காக 30 sec அல்லது

போனாப்போகுது அதிகபட்சம் ஒரு நிமிடம் தர்ரேன்” 

போய் வேற மாதிரிச் சிந்திச்சுட்டு வாங்க”

என்று சொல்லி அனுப்பி விட்டார் சிங்கீதம்.

கமல் குழுவினருக்குப் படு ஏமாற்றம். வேண்டா வெறுப்பாக மாற்றியமைத்தது தான் இப்போது திரையில் காணும் காட்சி. அதில் தாய் ஶ்ரீவித்யா & மகன் ராஜா கமல் சந்திக்கும் காட்சி அதிகபட்சம் 30 விநாடிகள் தான்.

இந்தச் சம்பவத்தை கமல்ஹாசனோடு  அந்தக் காலத்தில் இணைந்து பணியாற்றிய திரு ராசி அழகப்பன் அவர்கள் குறிப்பிட்டிருப்பார்.

ராஜாஜியின் கதையில் திக்கற்ற பார்வதி, கமல்ஹாசனின் ராஜபார்வை. பேசும் படம் என்று தமிழில் வெளியான, வசனம் ஏதும் இல்லாமல் எடுத்த கன்னடப் படமான புஷ்பக விமான , கால் ஊனமுற்ற பெண் நடனத்தில் சாதிக்கும் மயூரி, அபூர்வ சகோதரர்கள், கால இயந்திரத்தில் கிருஷ்ண தேவராயர் என்ற மன்னன் காலத்துப் பயணிக்கும் ஆதித்யா 369, கார்ட்டூன் சித்திரமான Ghatothkach போன்ற படங்களின் வழியாக சிங்கீதம் இந்திய சினிமாவின் முக்கிய அடையாளமாக அறியப்படுகிறார்.

ஒரு கலைப்படைப்பாளி தான் வாழும் காலத்திலேயே தன்னுடைய படைப்புலக அனுபவத்தைக் காணொளி வழியாக ஆக்கித் தந்த வகையில் மிகச் சொற்பமான பகிர்வுகளே இருக்கின்றன.

சிங்கீதம் சீனிவாசராவ் தன்னுடைய வாழ்வியல் அனுபவங்களைத் தனக்கென ஒரு பிரத்தியோகத் தளத்தில் பகிர்ந்திருப்பது.

ஒன்றல்ல இரண்டல்ல மொத்தம் 53 பாகங்கள். எப்பேர்ப்பட்ட அசுர முயற்சி இது.

கதாசிரியர், இயக்குநர், தயாரிப்பாளர், பாடலாசிரியர், இசையமைப்பாளர், ஒரு நடிகர் என்று பன்முக ஆளுமையாகத் திகழ்ந்தவர்.

நான் இசையமைக்கும் படத்துக்கு நீங்கள் தான் இசை ஒருங்கமைப்பாளராக இருக்க வேண்டும் என்று இளையராஜாவிடம் ஒரு சமயம் சொல்லி இருக்கிறார் சிங்கீதம்.

1986 ஆம் ஆண்டு கன்னட சூப்பர் ஸ்டார் ராஜ்குமார் படத்தை இயக்கியதோடு படத்தில் இசையும் சிங்கீதம் தான்.

அந்தப் பரபரப்பான காலத்திலும் இளையராஜா வந்து சிங்கீதம் படத்தின் இசை ஒருங்கமைப்பாளராக/ நெறியாளராக (conductor)

தான் முன் சொன்ன வாக்குறுதியை நிறைவேற்றுகிறார். 

அந்தப் படம் தான் “பாக்யலஷ்மி பரம்மா” .

இப்படித்தான் வாழ்ந்து முடிக்க வேண்டும் என்று சொல்லி வைத்த மனிதர்களில் புது உதாரணம் நம் சிங்கீதம்.

அந்தக் குறும்புப் புன்னகையும், இடிச் சிரிப்புமாக சிங்கீதம் நம் மனதில் நிறைந்திருப்பார்.

கானா பிரபா

04.10.2026

இளையராஜா எனும் பிரமிப்பு ❤️ மலையாள தேச இயக்குநர் சத்யன் அந்திக்காட்

 

இளையராஜா எனும் பிரமிப்பு  ❤ 

மலையாள தேச இயக்குநர் சத்யன் அந்திக்காட் வாய்மொழியில் இருந்து

நான் இயக்குநராகத் தொடங்கியதில் இருந்தே இளையராஜாவைக் கொண்டு ஒரு படத்திற்காவது இசையமைக்க வைக்க வேண்டும் என்பது என் மனதிலிருந்த ஆசை. அது எட்டாத உயரத்தில் உள்ள ஒரு கனவு, அது சாத்தியப்படாது என்றுதான் நினைத்திருந்தேன்.   

'கொச்சு கொச்சு சந்தோஷங்கள்' படம் வந்தபோது, இளையராஜாவை வைத்துப் பண்ணலாம் என்று நினைத்து, பாசில் மூலமாகப் பரிந்துரைக்கச் செய்துதான் நான் ராஜா சாரைப் பார்க்கச் சென்றேன். 

அவர் என்னைக் கூப்பிட்டு உள்ளே அழைத்தார். 

உள்ளே கம்போசிங் அறையில் நாற்காலிகள் எதுவும் இல்லை. உட்காருவதற்காகப் பாய்கள் மட்டுமே இருந்தன. அவரிடம் நான் சிரமப்பட்டு எனக்குத் தெரிந்த தமிழில் கதையை விவரிக்கத் தொடங்கினேன். 

அவர், "மலையாளத்திலேயே சொன்னால் போதும், எனக்கு மலையாளம் தெரியும், மலையாளத்திலேயே பேசுங்கள்" என்று கூறினார்.   

நான் என் மனைவி நிமியிடம் சொல்லியிருந்தேன், கம்போசிங்கிற்குப் போகிறேன், வழக்கமாக ஒரு வாரம் அல்லது இரண்டு வாரங்கள் கழித்துத்தான் வருவேன்; படத்தில் 5 பாடல்கள் இருக்கின்றன என்று.   

இளையராஜா சார் சூழலைக் கேட்டுக்கொண்டே வேறு ஏதோ வேலை செய்வது போலத் தோன்றும். ஜெயராம் மற்றும் அந்தப் பெண் இருக்கும் காட்சிக்கு இந்த டியூன் செட் ஆகுமா என்று கேட்டார். அந்தச் சூழலுக்கு 4-5 டியூன்களை மாற்றி மாற்றிப் போட்டுக் காட்டினார். அடுத்த பாடலையும் உடனே செய்துவிட்டார்.   அதாவது 9:30 மணிக்கெல்லாம் 5 பாடல்களின் கம்போசிங்கும் முடிந்துவிட்டது! 

நான் அதிர்ந்துபோனேன். 

நான் வெளியே வந்து பாசிலை அழைத்து, "எனக்கு ஒரு சிறிய சந்தேகம் உள்ளது. நான் இளையராஜாவின் தீவிர ரசிகன் என்பதால் அவர் போடும் டியூன்கள் எல்லாம் எனக்குப் பிடித்துள்ளதா, அல்லது உண்மையிலேயே நன்றாக இருக்கிறதா? என்று.

 9:30 மணிக்கெல்லாம் 5 பாடல்களும் முடிந்துவிட்டதே" என்றேன். 

அதற்கு பாசில், 

"9:30 மணி வரை எடுத்தாரா? வழக்கமாக ஒரு மணி நேரத்திலேயே 5 பாடல்களையும் முடித்துவிடுவாரே!" 

என்று கேட்டார். 

இப்படியாக சத்யன் அந்தக்காட் இசைஞானி இளையராஜாவுடன் தன் முதல் பாடல் பதிவு அனுபவத்தைப் பகிர்ந்து கொண்டார்.

https://www.facebook.com/reel/2224684808061504

கானா பிரபா

மூலக் காண்பகிர்வு இணைப்பில் உள்ளது. தமிழில் பிரதியாக்கித் தந்திருக்கிறேன்.

இந்தப் பாடல்கள் இடம்பெற்ற கொச்சு கொச்சு சந்தோஷங்கள் பாடல்களைக் கேட்டுப் பாருங்கள் அற்புத அனுபவம்.

https://www.youtube.com/watch?v=OZvt6u95L_Y

சிறந்த படம்,  நடனம் ஆகியவற்றுக்கானதேசிய விருதையும் அள்ளியது.

வேகமாக வேலை செய்வது மட்டுமல்ல, அங்கே விவேகமாகவும் பிரமிப்பூட்டும் விதத்திலும் அற்புதமான பாடல்களைப் பிறப்பாக்கித் தருவதுதான் இசைஞானி என்ற அதிசயம்.

மக்களே சந்தோஷப்படுங்கள், கொண்டாடுங்கள் ! 

இப்படியொரு அபூர்வமான இசைப்பிறவி வாழும் காலத்தில் நாமும் இருக்கிறோம் என்று.

கானா பிரபா

02.102026

இசைஞானி இளையராஜாவின் காதல் ரோஜாவே

 "இளவேனில் இது வைகாசி மாதம்" காதல் ரோஜாவே படப் பாடலைத் தான் மனசு முணுமுணுத்தது, சாய் வித் சித்ராவில் நடிகை ஷீலாவின் பேட்டி வருவது தெரிந்ததும்.

ஷீலா - ரவிச்சந்திரன் ஜோடியின் மகனான ஜார்ஜ் விஷ்ணுவோடு, பின்னாளில் கமல்ஹாசனோடு விஸ்வரூபம் எடுத்த பூஜாவின் அறிமுகப் படம்.  இசைஞானி இளையராஜா இசையில் 1997 இல் ஆஸ்கார் மூவீஸ் இயக்குநர் எம்.பாஸ்கரின் குடும்பத் தயாரிப்பில் கேயார் இயக்கம் என்று ஏகப்பட்ட நட்சத்திரம் இருந்தாலும் காதல் ரோஜாவே மூன்று வருட இழுபாட்டில் தான் வெளியே வந்து வாடிப் போனது.

பத்துப் பாடல்களும் பலாச்சுளைகள். நினைத்த வரம் கேட்டு, இளவேனில் இரண்டும் முன்னிற்கும் ரகம்.

https://www.youtube.com/watch?v=7cc4PujeX78

இதற்கு முன் தன் வாரிசு விஜய் ஐ வைத்து ஒரு படம் தயாரிக்கச் சொல்லி எஸ்.ஏ.சந்திரசேகர் வேண்டவும், அவரையே இயக்குநராக்கி பாஸ்கர் தயாரித்த திரைப்படம் "விஷ்ணு". ஆனால் அந்தப் பட அனுபவம் கொடுத்த கசப்பை குமுதத்திலும் பகிர்ந்து கொண்டார் பாஸ்கர்.

இன்னொரு வாரிசைக் களத்தில் இறக்கிக் காட்டுவோம் என்று நினைத்தார் போல. ஆனால் காதல் ரோஜாவே படமும் அவருக்குக் கை கொடுக்கவில்லை.

நடிகை ஷீலா & பிரேம் நஸீர் ஜோடி 100+ படங்கள் ஜோடியாக நடித்து சாதனை படைத்தவர்கள். ஷீலாவின் மகன் ஜார்ஜ் விஷ்ணு போலவே பிரேம் நஸீர் மகன் ஷா நவாஸ் கூடத் தம் பெற்றோர் அளவுக்குப் பெரிய அளவில் எடுபடாதது காலத்தின் தீர்ப்பு.

தன்னுடைய மூன்று மகள்களை எப்படிக் கரை சேர்ப்பேன் என்று பத்திரிகையாளர் மதி ஒளி சண்முகம் தன்னுடன் பேசும் போது குறைப்படவும், அவரைத் தயாரிப்பாளராக்கி, தானே நிதி ஏற்பாட்டைச் செய்து ஷீலா இயக்கி நடித்த படம் தான் யக்‌ஷ கானம். இதை சாய் வித் சித்ராவில் குறிப்பிட்டிருக்கிறார்.

அந்தப் படம் தான் ஆயிரம் ஜென்மங்கள் என்று சூப்பர் ஸ்டார் ரஜினியின் ஆரம்பங்களில் முக்கிய படமாக அமைந்தது.

சமீபத்தில் ஜென்ஸீ கிட்ஸ் ஊடகர் ஒருவர் தர்மன் படத்தில் தான் ரஜினி டாக்டர் வேடம் ஏற்று நடிக்கப் போகிறார் என்று இந்த வரலாறு தெரியாமல் போட்டிருந்தார்.

எனக்குப் பேய்ப் பயம் வந்து, அந்த ஏரியாப் படங்களே பார்க்கக் கூடாது என்று முடிவெடுக்க வைத்தது, என் சின்ன வயசில் நியூ விக்ரேர்ஸ் இல் வீடியோ கேஸட் காலம் வந்த புதிதில் அண்ணன்மார் இந்தப் படத்தை அப்பப்பா வீட்டில் போட்டுக் காட்டிக் கிலி கொள்ள வைத்ததுதான்.

தன்னுடைய "சிகரங்கள்" கதையைக் கூட பஞ்சு அருணாசலம் உரிமை பெற்று "ருசி கண்ட பூனை" படமாக எடுத்ததை சாய் வித் சித்ராவில் பெருமையோடு நினைவுகூர்ந்தார் ஷீலா.

மதி ஒளி சண்முகம் குறித்து எனக்கு ஸ்பெஷலாகப் பிடிக்கக் காரணம், இளையராஜாவின் குரு நாதர் ஜி.கே.வெங்கடேஷ் இசையில் நெஞ்சில் ஒரு முள், காஷ்மீர் காதலி ஆகிய இரண்டு படங்களை இயக்கி இருக்கிறார்.

இரண்டு படங்களின் பாடல்களுமே பூந்தி லட்டுகள்.

அட இளையராஜாவில் ஆரம்பித்து ஜி.கே.வெங்கடேஷில் முடிக்க வைத்திருக்கிறதே இந்தப் பதிவு :-)

கானா பிரபா.

உன்னைத் தொட்டு என்னைத் தொட்டு போனவனைப் பார்த்தியா

பாடல் வெளிவந்த போது ஒரு தடவை கேட்டு விட்டு, இன்று தான் மீண்டும் மூன்று சுற்றுப் போய் வந்தேன்.

ஆசையைக் காத்துல தூதுவிட்டு தூவல் இருப்பதை ராஜாவின் ஜென்ஸீ கிட்ஸ் வெறியர்களே கண்டு பிடித்தாலும், அந்த இழையை வைத்துக் கொண்டு அவர் இசையிலும், பாடல் மெட்டிலும் கொடுக்கும் புதுமை அதகளம்.

பிரியா ஜெர்சன் தன்னுடைய சூப்பர் சிங்கர் காலத்திலேயே மோகக் குரல் பாடல்களால் பிரபலமானவர், அவரோடு தீப்தி சுரேஷ், ஶ்ரீஷா விஜயசேகர் இணைந்து பாடிய பாடல். ஶ்ரீஷா தொடர்ந்து ராஜாவின் இசைமேடைகளில் பயணிக்கிறார்.

இந்தப் பாட்டு வேக நடையில் போகும் போதும் "கண்ணமா" என்று வரும் போது ஒரு நெகிழ்வானதொரு இறக்கம் கொடுத்துத் தளர்த்தி விடுகிறார் இசைஞானி.

பாட்டு முடியும் போது "நான் போகும் பாதைகள்" வருமிடத்தில் அச்சொட்டான ஸ்வர்ணலதாக் குரல், தீப்தி அல்லது ஶ்ரீஷாவாக இருக்கலாம்.

"ஆசையைக் காத்துல" பாடல் மீளுருவாக்கத்தில் 

ஸ்ருதி ஹாசன் பாடிய "ஷமிதாப்" பாட்டு

Stereophonic Sannata 

https://www.youtube.com/watch?v=o0PFiyuhRz4

அட்டகாஷ் மேற்கத்தேய விருந்து படைத்திருக்கும்.

மோகன்பாபு மகள் லஷ்மி மஞ்சு இயக்கிய படத்தில் ஶ்ரீவர்த்தினி பாடிய Gundello Godari படத்தின் 

"ராத்திரி நேரத்து"

https://www.youtube.com/watch?v=WdhgPpm2384

பாடலாகவும் வெளிவந்தது குறிப்பிடத்தக்கது.

ஆனந்த் - மிலிந்த் இரட்டையர்கள் வழக்கம் போல உருவிப் போட்டிருக்கிறார்கள் இப்படி https://www.youtube.com/watch?v=sKX7r0OcNK4

"ஆசையைக் காத்துல" பாடலைப் போலவே வேண்டியிருப்பார் கார்த்திக் சுப்பாராஜ் போல. ஏனெனில் இந்தப் பாடலின் ஒளியோட்டத்திலும் ஜானி ரஜனியின் சுவர் அலங்காரங்கள்.

அது மட்டுமல்ல தளபதி ஒலிப்பேழை, ராக்கம்மா கையத்தட்டு சுவர் அலங்காரம் என்று

இசைஞானி இளையாராஜா & சூப்பர் ஸ்டார் ரஜினிகாந்த் இருவர் மேலும் வெறித்தனமான ஒரே ரசிகர் எப்படி இருப்பாரோ அப்படிக் கொடுத்திருக்கிறார் கார்த்திக். 

இம்மட்டுக்கும் ரஜினியை வைத்து பேட்டையை இயக்கியும் கூட ரஜினி மீதான ரசிக நேசம் எள்ளளவும் குறையவில்லைப் போல.

ஆக, கார்த்திக் சுப்பராஜ் ரஜினியை வைத்து ஒரு படத்தை இயக்கி, அதற்கு இசைஞானி பாட்டுப் போட்டால் பட்டாசாக இருக்கும் போல.

கானா பிரபா

25.09.2026

கங்கை அமரன் எனும் பன்முகம்

கங்கை அமரன் எனும் பன்முகம்'

தன் ஆத்ம நண்பன் எஸ்.பி.பாலசுப்ரமணியம் அவர்களது ஆறாவது நினைவு தினத்தில், கங்கை அமரனின் திரைப்படமான “லெனின் பாண்டியன்” வெளியாகின்றது.

ஒரு முழு நீள நடிகராக அவருக்கு இது புது அவதாரம் அல்ல, “ஏற்கனவே ஆர்யா சூர்யா’ என்ற படத்தில் நகைச்சுவைப் பாத்திரத்தில் நடித்திருக்கிறார்.

இசையமைப்பாளர் கங்கை அமரன் என்ற அடையாளத்தோடே “பயணங்கள் முடிவதில்லை”, “இதயம்", "பிரம்மா", “ஜோடி", “பாட்டுப்பாடவா”, “உள்ளம் கொள்ளை போகுதே”, “கண்டு கொண்டேன் கண்டு கொண்டேன்", “உன்னிடத்தில் என்னைக் கொடுத்தேன்" ஆகிய படங்களில் சிறப்புத் தோற்றத்தில் வந்திருக்கிறார். இதுவும் ஒரு புதுமையான சாதனை இல்லையா?

ஒரு கதாநாயகனாக நடிக்க வேண்டிய “புதிய வார்ப்புகள்” வாய்ப்பை இவர் மறுத்ததும், அது கே.பாக்யராஜுக்குப் போய்ச் சேரவும், 

அவருக்குப் பின்னணிக் குரல் கொடுத்த வகையில் பின்னணிக் குரல் கலைஞராகவும் கங்கை அமரனுக்கு இன்னொரு அவதாரம்.

செந்தூரப் பூவே செந்தூரப் பூவே……. பாடலைக் கேட்டு முடித்தாலோ அல்லது இந்தப் பாடலை நினைத்தாலோ கூட மனம் செந்தூரப் பூவே…. செந்தூரப் பூவே…. என்று தான் கூவும். 

பாடலாசிரியாரக கங்கை அமரனுக்கும் 16 வயதினிலே தான் பிறப்பு. தன் 30 வயதினிலே தொடங்கிய ஓட்டம், இதோ 50 ஆண்டுகளைத் தொடப் போகின்றது. 

இளையராஜாவின் இசைக்கு தேசிய அங்கீகாரம் கிட்டிய எஸ்.ஜானகிக்கு முதல் தேசிய விருதை "செந்தூரப்பூவே செந்தூரப் பூவே சில்லென்ற காற்றே" என்று தேன் கவியைக் குழைய விட்டு அண்ணனுக்குப் பெருமை சேர்த்தார் கவிஞர் கங்கை அமரன்.

“மாலை வரும் அந்த நாளை உரைத்திடுங்கள் 

சாலை வழியெங்கும் பூவை இறைத்திடுங்கள்”

தன் பாடல்களில் கொடுஞ்சொல் வராமல் பார்ப்பேன் என்பார் தன்னம்பிக்கையோடு பாடலாசிரியர் கங்கை அமரன்.

இளையராஜாவின் ஆரம்ப காலப்படங்களில் "பத்ரகாளி" உட்பட இசை உதவி அமர்சிங் என்றே இருக்கும். ஆனால் அந்த அமர்சிங் என்ற கலைஞன் வெறும் நார் அல்ல அவரும் சிறந்ததொரு படைப்பாளி என்பதை நிரூபித்தது அவர் தனியாக நின்று தன்னை வெளிக்காட்டிய போது. ஆமாம் கங்கை அமரன் என்று பேர் வைத்த முகூர்த்தமோ என்னவோ இவருக்கும் ஒரு தனித்துவம் கிட்டியது 

அமர்சிங் என்ற கங்கை அமரன் அடிப்படையில் நல்லதொரு இசைக்கலைஞன், தன் அண்ணன்மார் பாவலர் வரதராஜன், ராசய்யாவோடு ஊர் ஊராய்ப் போய்ப் பாட்டுக் கட்டியவர். ஆரம்பத்தில் பெண் குரலுக்குப் பொருத்தமாக ராசய்யாவின் குரல் பவனி வந்து கொண்டிருந்து ஒரு கட்டத்தில் அவரின் குரல் நாண் ஆண் சுருதி பிடித்தபோது பெண் குரலுக்கு அடுத்த ரவுண்ட் கட்டியவரே இவராம்.

“இசைக்கவோ நம் கல்யாண ராகம்.....”

இந்தப் பாடலை இலங்கை வானொலிக் காதலர்கள் மறக்க மாட்டார்கள். கங்கை அமரன் இசையமைப்பாளராக உருவெடுத்த காலத்தில் வந்த ஆரம்பப் படங்களில் ஒன்று “மலர்களே மலருங்கள்”. விஜயகாந்த், ராதிகா, சுதாகர் என்று நிறம் மாறாத பூக்கள் படத்தின் நடிகர்கள் கூட்டத்தோடு (ஆயிரம்) மலர்களே மலருங்கள் என்று தலைப்பு ஈறாகக் கவர்ந்த படம் ஆனால் ரசிகர்களைக் கவராது பெட்டிப் பாம்பாய் அடங்கிப் போனது. ஆனாலும் பாடல்களைச் சுளை சுளையாகக் கொடுத்திருந்தார் கங்கை அமரன்.

“மலர்களே மலருங்கள்” படத்தைச் சொல்லும் போது கங்கை அமரனுக்கு முதலில் வாய்ப்புக் கிட்டிய “மலர்களிலே அவள் மல்லிகை” படத்தையும் சொல்லி வைக்க வேண்டும். இதுதான் கங்கை அமரன் இசைத்த முதல் படம். ஒரு தயாரிப்பாளரிடம் மலேசியா வாசுதேவன் கங்கை அமரனைப் பரிந்துரைத்து அந்தப் பட வாய்பைப் பெற்றுக் கொடுத்ததை கங்கை அமரன் வேடிக்கையாகப் பேட்டியில் பகிர்ந்திருக்கின்றார்.

ஆனால் வெளிவராத பாவத்தால் “விடுகதை ஒரு தொடர்கதை” படம் அந்த லாபத்தைப் பெற்றுக் கொண்டது.

“சோலை புஷ்பங்களே என் சோகம் சொல்லுங்களேன்”

சுசீலாம்மாவோடு பாடும் கங்கை அமரன் ஆற்றொழுக்கான பாடகர் என்பதை இன்று வரை கெடாத அவரின் குரல் வளம் நிரூபிக்கும்.

கங்கை அமரனுக்குக் கிடைத்த பெரும் வரப்பிரசாதம் அவரைப் பாடலாசிரியராகப் பெரும்பாலான இசையமைப்பாளர்கள் பயன்படுத்தியது போலவே இளையராஜா தொட்டு, பல்வேறு இசையமைப்பாளர்களின் இசையிலும் பாடிய மகத்துவம் பெறுகிறார்.பதிவு கானா பிரபா

ஐந்து பாடல்களை வைத்து எப்படியாவது கதை பண்ணி விடலாம் என்ற கதைக்கே இடமில்லை. கோழி கூவுது தொடங்கி தன் ஒவ்வொரு படங்களிலும் கதையம்சத்திலும் கூடத் தன் முத்திரை பதிப்பார் கங்கை அமரன்.

இயக்குநராக கங்கை அமரன் தன் பயணத்தைத் தொடங்கி 40 ஆண்டுகள் கடந்து விட்டது.

பிரபுவை பொழுது விடிஞ்சாச்சு, கும்பக்கரைத் தங்கையா, சின்னவர் ஆகிய படங்களை இயக்கியவர்.

இன்றைக்கும் கிராமியப்படங்கள் வந்து கொண்டு தானிருக்கின்றன, ஆனால் கிராமியம் என்றாலே "செண்பகமே செண்பகமே" என்று முணுமுணுக்கும் எண்பதுகளின் திரைப்பிரியர்களைத் தாண்டி எல்லார் மனசலும் இருக்கிறான் "எங்க ஊரு பாட்டுக்காரன்" . கோழி கூவுது படத்தின் பெரு வெற்றியை கங்கை அமரனாலேயே ஜீரணிக்க முடியாமல் தடுமாறித் தோல்விப்படங்களாகக் கொடுத்தவருக்கு பாட்டுக்காரன் மீண்டும் கைதூக்கி உயர்த்தி விட்டான். பிரபல தயாரிப்பாளர் சங்கிலி முருகன் தயாரிப்பில் வந்த அந்தப் படத்தில் ராமராஜனின் தலையெழுத்தை மாற்றியது.

ராமராஜன் இயக்குநராக இருந்த போதும் அவருக்கு கங்கை அமரன் இசையமைப்பாளராக இயங்கினார் என்பதும் புதுமையானதொரு தொடர்பு.

"செண்பகமே செண்பகமே" பாடல் பாடாத தமிழ் பேசும் ஊர்களே இல்லை என்றாகிவிட்ட பின்னர் அதே தலைப்பில் மீண்டும் கங்கை அமரன், ராமராஜன் இணைந்த படம். பதிவு கானா பிரபா

ஒரு வருடம் ஓடி மிகப் பெரும் சாதனையைக் கொடுத்தது இசைஞானி இளையராஜா இசையில் கங்கை அமரனுடன், ராமராஜன் இணைந்த"கரகாட்டக்காரன்". 

இயக்குநராக விஜயகாந்த், பிரபு, ராமராஜன் போன்ற முன்னணி நட்சத்திரங்களோடு இணைந்து வெற்றிப் படங்கள் கொடுத்த வகையிலும் தனி முத்திரை பதித்தார்.

அண்ணனுக்கு ஜே உட்பட அவர் இயக்கிய மற்றைய படங்கள் எதிர்பார்த்த வெற்றியைப் பெறாவிட்டாலும் இன்றும் பார்த்து ரசிக்க வைக்கும் தரம் கொண்டவை.

இன்னும் அவரின் பணிகளை விரித்துச் சொல்ல வேண்டுமென்றால் சின்னத்திரை நிகழ்ச்சி நெறியாளராகவும் தொடர்ந்தவர்.

பாடலாசிரியர், இசையமைப்பாளர் என்ற அவதாரங்களோடு ஒரு இயக்குநராகவும் தன்னை வெற்றிகரமாக நிலை நிறுத்திக் கொண்டவர் கங்கை அமரன்.

அவர் அளவுக்கு பன்முகத்தோடு பணியற்ற இன்னொருவர் வரலாம் ஆனால் அவர் அளவுக்கு அந்த நேர்த்தியை எதிர்பார்க்க முடியாது.

அதுதான் கங்கை அமரன் எனும் பன்முகத்தின் தனித்துவம்.

கானா பிரபா

25.09.2026

இசைஞானி இளையராஜா 50 ❤️ ஆஸி இசைச் சுற்றுலா 2026

அரே ஏமண்டி….

இப்படிப் பாடிக் கொண்டே இசைஞானியின் தெலுங்கு நிகழ்ச்சித் தொகுப்பாளினி வந்தால் எப்படியிருக்கும் கற்பனை செய்து பாருங்கள். அதுதான் நடந்தது.

அதைக் கேட்டதுமே கிருஷ்ணா நதி நீர் தமிழ் நாட்டுக்குத் திசை திருப்பிய குளுமை.

இளையராஜா சாருக்கெல்லாம் அறிமுகமா என்ன? நீங்களே அவரைக் கூப்பீடுங்களேன் அப்படியே என்றுவிட்டு

ராஜா சார்ர்ர்ர்ர்ர்!

என்று கத்தியது தொகுப்பு தெலுங்கு பாப்பா.

ராஜா சாஆஆஆஆர்ர்ர் (கூட்டம்)

மள்ளி (தொகுப்பு பாப்பா)

ராஜா சாஆஆஆஆர்ர்ர் (கூட்டம்)

“ஐ லவ் யூ இளையராஜா”

பின்னிருக்கையில் இருந்து ஒரு இருபது வயது  அம்மாயி கத்தியது இளையராஜாவைப் பார்த்து.

சமக்கு சமக்கு சம் குத்துப் போட்டுக் கொடுத்த பாட்டுகளின் இளமையிலேயே தம் ராஜாவையும் வைத்திருக்கிறார்கள் போல.

ஒரு துளி பயம் இல்லை, துப்பாக்கி பட காஜல் அப்பாக்கார மனோபாலாவைக் கையாள்வது போல.

ஆனால் தமிழ் ரசிகர்கள் கண்டிப்பான தந்தையாக ராஜாவிடம் அனுபவப்பட்டதால், தமிழ் நிகழ்ச்சி ஏற்பாட்டாளர்களே “மாமன் மகள்” படத்தில் ஜெயச்சித்ராவிடம் பம்மும் மணிவண்ணன், கவுண்டமணி ரேஞ்சில் நடுக்கம் ஏற்படாத குறையாக இளையராஜாவை அணுகினார்கள்.

கோதண்டராமரெட்டி ரேஞ்சில் இருக்கும் வாடுகளும், 

சிரஞ்சீவிக்கே அம்மா வேஷம் கட்டும் அம்மாயிகளும் வயது பேதமின்றி ஆடியும்,  பாடியும் ரசித்துப் பார்த்துக் கொண்டிருந்தார்கள்.

இந்த ஆந்திரா, தெலுங்கு தேசம் வாலாக்கள் ஒவ்வொருவருக்குள்ளும் நாலைந்து சிரஞ்சீவி, ஏழெட்டு பாலகிருஷ்ணா இருப்பார்கள் போல.

ஆட்டம், பாட்டம், ஹார்டின் என்று ஒரே அமர்க்களமாகக் கொண்டாடி ரசிக்கிறார்கள்.

இந்த மாதிரி அயல் மொழிக்காரர் ராஜாவை எப்படி அணுகுகிறார்கள் என்பதற்காகவே இசைஞானியின் தெலுங்கு இசை நிகழ்ச்சிக்குச் சென்றேன்.

இளையராஜா 50 என்பதால் தான் இசையமைப்பாளராக வந்த வரலாற்றுக்கு 15 நிமிடங்கள்.

தொடர்ந்து சரண் வருகிறார்.

ஒரே சமயத்தில் பாலகிருஷ்ணாவும், எஸ்.பி.பாலசுப்ரமணியமும் வந்தால் எப்படியிருக்கும் சொல்லுங்கள்.

அப்படியொரு அதிர்வலையில் கூட்டம் அமளிப்பட்டது. 

அப்படியொரு மரியாதை அவருக்கு.

ராமராஜ்ஜியம் படத்தில் வந்த “ஜகதானந்த காரக” 

ராஜா ராஜாதி ராஜனெங்கள் (தெலுங்கு)

பாடலைத் தொடர்ந்து 

ஜல்லெண்ட (ஆத்தாடி அம்மாடி) கீதாஞ்சலி பாடலை அனன்யா பட் அட்சர சுத்தமாகப் பாடினார்.

குயில் சத்த ஆரம்பத்தைக் கேட்டாலே தெலுகுவாலாக்கள் கூவி ஆர்ப்பரிக்க

ஆமனி (காவியம் பாட வா தென்றலே)

ஆனால் சித்தாராவில் வந்த Vennello Godari Andam (தூரத்தில் நான் கண்ட உன் முகம்) சுர்முகி பாடும் போது ஊசி விழுந்தாலும் கேட்காத அமைதியில் ரசித்தார்கள்.

இந்தா ஹோரஸ் கேட்டதும் மீண்டும் ஹோவென ஆர்ப்பரிப்பு

வேறென்ன சம்மதம் தந்துட்டேன் பாடலின் தெலுங்கு மூலத்துக்குத் தான் அந்த வரவேற்பு.

Hello Guru Prema Kosame பாட்டுக்கு அந்த அரங்கத்தின் சிமெண்ட் தூண் எழுந்து ஆடாத குறை.

நின்னுக்கோரி பாட்டுக்கும் எல்லை கடந்த ரசிகப் பட்டாளம் இருக்கு என்று நிரூபித்தார்கள்.

மாட்டரானி மெளம் இதே வேற லெவல்யா என்று ஆர்ப்பரிப்பு.

சூப்பர் ஸ்டாருக்கும் சேர்த்து “ராக்கம்மா கையத் தட்டு” வைக் கொண்டாடினார்கள் போலும்.

கீரவாணி, மறக்குமா செழும் மலரைக் காற்று, இதழில் கதை எழுதும்

இதெல்லாம் தமிழும் அரவணைத்துக் கொண்டாடியதாயிற்றே. நாங்க தான் முதலில் கேட்டோம் என்று இந்த வாலாக்கள் உரிமை எடுக்கிறார்கள் போலும்.

பாட்டனி பாடம் பாட்டுக்கு அதிர்ந்தது அரங்கம். சிரிச்சுச் சிரிச்சு ரசிச்சார்கள்.

எனக்கு அந்த இசை ராட்சசன் SPB தான் கண் முன்னே வந்தார்.

இப்படிப் போய்க் கொண்டிருந்த தெலுங்கு ராஜா பாட்டுகளில் ஒரு திருப்பமாக அதிகம் தமிழ்ச் சூழலில் அறியப்படாத Challenge படத்தின் Induvadana Kundaradana பாட்டுப் பாடியது இன்ப அதிர்ச்சி.

மிளகாய்ப் பொடியைக் கண்ணில் தூவி விட்டு இளையராஜாவின் பாடலை ஒலிக்க விட்டாலும், கண் எரிச்சலை மறந்து கைத்தாளம் போட்டு ரசிப்பார்கள் இந்த தெலுங்கு ராஜாக்கள், ராணிகள் என்று மட்டும் புரிந்தது.

அடுத்தது தமிழ் நிகழ்ச்சி

ரசிகர்களே அமைதி அமைதி 😁

இன்னும் நான்கு நிகழ்ச்சி இடம்பெறவிருப்பதால் பாடல் பட்டியல் போட மாட்டேன் 😁

ஜானகிம்மாவின் mini version சுர்முகி

ஏற்கனவே தன்னை நிரூபித்தவர்.

இந்த அனன்யா பட் தெலுங்கு, தமிழ் இரண்டிலும் பட்டையைக் கிளப்பினார்.

ஸ்வேதா வரவில்லை.

தமிழ் நிகழ்ச்சிக்கு முன்பதாக உள்ளூர் இளசுகள் இளையாராஜா பாடல்களுக்கு வித்தியாசமான வடிவம் காட்டி நடனம் ஆடியது அருமையோ அருமை.

தெலுங்கு ரசிகர்கள் போல் ரசிப்போடு கைத்தாளம் போடத் தெரியாது என்று (!) தமிழ் நிகழ்ச்சி அன்பர்கள் செய்து காட்டினார்கள். 

தெலுங்கு நிகழ்ச்சியில் தகராறு பண்ணிய ஒலிச் சமநிலை, தமிழில் சீரானது.

பெரிய எதிர்பார்ப்பு ஆனால் ஏமாற்றம்

கங்கை அமரன் வராதது.

தெலுங்கு போல, தும்பி வா (மலையாளம்), ஜெதயலே (கன்னடம்) என்று முழுமைப்படுத்திக் காட்டி இருக்கலாம்.  இளையராஜா 50 ஆச்சே.

இன்னுமொரு பேராசை 

அருட்பெருஞ் ஜோதி தனிப்பெரும் கருணைக்காகப் பாடியதை அர்ப்பணித்திருந்தால் எப்படியிருந்திருக்கும்.

இம்முறை ராஜாவின் முகத்தில் அந்தத் தெய்வீகக் களையும் இருந்தது.

இன்று காலை அந்தப் பாடலை என் மனசு பாடிக் கொண்டிருக்க மெல்பர்னில் இருந்து சிட்னிக்குத் திரும்பினேன் ;

போற்றிநின்.. பேரருள்

போற்றி நின் பெருஞ்சீர்

ஆற்றலி னோங்கிய

அருட்பெருஞ் ஜோதி 

❤️

கானா பிரபா

20.09.2026

எம்.எஸ்.சுப்புலட்சுமி அறிமுகமான திரைப்படம்

இன்று இசைப் பேரரசி எம்.எஸ்.சுப்புலட்சுமிக்கு வயது 110.

நேற்றிலிருந்தே எம்.எஸ்.சுப்புலட்சுமி குறித்த செய்திகள் பரவலாக அடிபடக் காரணம், அவர் வாழ்க்கை வரலாறு திரைப்படமாகிறது என்ற செய்தியே.

அதிலும் குறிப்பாக, இந்தப் படத்துக்கு இசையமைக்க அனிருத் ஒப்பந்தமாகி இருப்பதாகவும், இதெல்லாம் தேவையா என்று வலையுலகத்தார் பரபரப்பில் இருக்கிறார்கள்.

ஆனால் இதற்குப் பின்னால் அவர்கள் தெரிந்தோ தெரியாமலோ ஒரு வரலாற்று நிகழ்வு நடக்கவிருக்கிறது.

எம்.எஸ்.சுப்புலட்சுமியை நடிகையாக அறிமுகப்படுத்தியவர் வேறு யாருமல்ல, அனிருத்தின் கொள்ளுத்தாத்தா கே.சுப்ரமணியம் அவர்கள் தான்.

ஸேவாஸதனம் என்ற திரைப்படம் 1938 ஆம் ஆண்டில் எம்.எஸ்.சுப்புலட்சுமி அவர்களது நடிப்பில் வெளியானது.

அந்தத் திரைப்படத்தில் இவர் நாயகியாக நடிக்க அறிமுகமானதே ஒரு சுவாரஸ்யமானது. 

முன்னொரு சமயம், நடிகை எஸ்.டி.சுப்புலட்சுமி கே.சுப்ரமணியத்திடம் எம்.எஸ்.சுப்புலட்சுமியை அறிமுகப்படுத்தி இவருக்கு ஒரு வாய்ப்பை அளிக்கக் கோருகிறார். பின்னர் ஸேவாஸதனம் படத்தில் இவரே பொருத்தமானவர் என்று தீர்மானித்து எம்.எஸ்.சுப்புலட்சுமியை நாயகியாக்கி வெளியிடுகிறார். படத்தில் எம்.எஸ்.சுப்புலட்சுமியின் பாடல்கள் பாப நாசம் சிவன் இசையில் பரபரப்பான வெற்றியைக் கொடுத்து, ஸேவாஸதனம் பெரு வெற்றி கொடுக்கிறது. இந்த அறிமுகச் செய்தி வி.ரமணன் அவர்கள் எழுதிய "காற்றினிலே வரும் கீதம்" என்ற எம்.எஸ்.சுப்புலட்சுமி நூலிலும் பதிவாகி இருக்கிறது.

எம்.எஸ்.சுப்புலட்சுமியை இவ்விதம் அறிமுகப்படுத்திய நடிகை எஸ்.டி.சுப்புலட்சுமி கே.சுப்ரமணியத்தின் இரண்டாவது தாரமாகிறார்.

இங்கே பகிந்த ஸேவாஸதனம் படத்தின் திரைப்படக் காட்சிகளை MADRAS LOCAL HISTORY GROUP குழுமத்தில் Lakshmi Priya Pakanati பகிர்ந்ததை நன்றியோடு குறிப்பிடுகிறேன்.

இந்தப் படக் காட்சியில் அந்தக் குட்டிப் பெண் வேறு யாருமல்ல, பின்னாளில் பாடகியாகவும், நடிகையாகவும் கலக்கிய எஸ்.வரலட்சுமி தான். உன்னை நானறிவேன் குணா பாட்டு ஞாபகம் வர வேண்டுமே?

ஸேவாஸதனம் படத்தின் கதை குறித்து இரு மாறுபட்ட கதை சொல்லப்படுகிறது. ஆனாலும் ஒரு தாசியிடம் அடைக்கலம் புகுந்த எம்.எஸ்.சுப்புலட்சுமி பின்னர் சமூகப் பணியிலும், இறை பணியிலும் தன்னை அர்ப்பணிப்பதாகக் கதை முடிச்சை எடுத்துக் கொள்ளலாம். பதிவு கானா பிரபா. பாருங்கள் 90 ஆண்டுகளுக்கு முன்பே ஒரு சமூக சீர்திருத்தப் பின்னணியில் ஒரு படம்.

இப்படியாக எம்.எஸ்.சுப்புலட்சுமி நடிக்க வந்து 90 ஆண்டுகளை எட்டும் சூழலில், அவரை நடிக்க அழைத்து வந்த கே.சுப்ரமணியத்தின் கொள்ளுப் பேரன் அனிருத், எம்.எஸ்.சுப்புலட்சுமி வாழ்க்கை வரலாற்றுப் படத்துக்கு இசையமைப்பது காலக் கணக்கு. இது இந்திய சினிமாவில் மட்டுமே நிகழக் கூடிய அதிசயம்.

1990 இல் பிறந்த அனிருத்துக்கு ஒரு மாதம் தள்ளி அடுத்த மாதம் 16 ஆம் திகதி பிறந்த தினம் 😊

எம்.எஸ்.சுப்புலட்சுமி படத்துக்கு அனிருத் நியாயம் செய்வாரா என்பதற்கு என் பதில். கண்டிப்பாக அந்தத் திறமை அவரிடம் உண்டு. DC படத்தில் அந்த ஆலாபனையோடு இணைந்த சாஸ்திரிய இசை ஒன்றே போதுமே? அந்த இரைச்சலைத் தவிர்த்து விட்டால் அப்பழுக்கற்ற சாஸ்திரிய இசையாகத் தொனிக்கும் அது.

கானா பிரபா

16.09.2026

அன்னக்கிளியும் ஒருதலை ராகமும்

அன்னக்கிளியும் ஒருதலை ராகமும் இணைந்த பாடல் என்ற அறிவிப்போடு T.ராஜேந்தர் இசையில் இசைஞானி இளையராஜா பாடிய பாடல் ஒலிப்பதிவை இப்போது வெளியிட்டிருக்கிறார்.

இந்த ஒருதலை ராகம் படத்தின் பின்னால் இருக்கும் இரண்டு நிகழ்வுகள்.

படத்தின் அனைத்துப் பாடல்களையும் எழுதி, மெட்டுக் கொடுத்தவர் ராஜேந்தர் தான். ஆனால் அவர் முதல் படத்தில் அனுபவம் இன்மை காரணமாக அந்தப் பாடல்களுக்கு இசைக் கோப்பைக் கொடுத்தவர் (orchestra arrangement) தெலுங்கு இசையமைப்பாளரான A.A.ராஜ்.

தமிழ் சினிமாவில் இதுவொன்றும் புதிய காரியமில்லை. பின்னாளில் இசையமைக்க வந்த பாக்யராஜ் கூட ஒரு கூட்டம் இசை உதவியாளர்களை வைத்திருந்ததை நன்றியோடு இது நம்ம ஆளு படத்தின் எழுத்தோட்டத்திலேயே பதிவு செய்திருப்பார். அத்தோடு  பாக்யராஜ் படங்களில் இசைக் கோப்பைக் (orchestra arrangement) கவனித்தவர் மூத்த வாத்தியக் கலைஞர் தாஸ் டேனியல்.

சம்பத் - செல்வன் இரட்டையர்களிடம் இசை கற்று தன் மாமனார் அவிநாசி மணி தயாரிப்பில் நெத்தி அடி படத்தை இயக்கிய பாண்டியராஜன் இன்னொரு ரகம்.

வட நாட்டு இசையமைப்பாளர்கள் மனோஜ் & கியான் இரட்டையர்களை அந்த வட இந்திய இசை வாசம் வந்துவிடாமல் அற்புதமான பாடல்களை வாங்கி, இணை இசையமைப்பாளராக இருந்தவர் ஆபாவாணன்.

ஒரு தலை ராகம் படத்தின் கதை வசனகர்த்தா ராஜேந்தரை ஓரமாக நிறுத்தி, வசனப்பயிற்சி கொடுக்க மட்டும் பாவித்தார்கள். படத்தை இயக்கியவர்கள் படத்தின் ஒளிப்பதிவாளர்களான ராபர்ட் - ராஜசேகரன் இரட்டையர்கள்.

ஆனால் தயாரிப்பாளரான E.M.இப்ராஹிம் தானே படத்தின் இயக்குநராகவும் பெயரைப் போட்டுக் கொண்டார்.

"ஒருதலை ராகம்" படத்தை இதுவரை பார்க்கவே இல்லை என்று ராஜேந்தர் கூற்று உண்டு.

E.M.இப்ராஹிம் பின்னர் தயாரித்து, இயக்குநராகவும் (?)பெயர் போட்ட இன்னொரு படம் "தணியாத தாகம்". இந்தப் படத்தில் டெல்லி கணேஷ், சுபத்ரா ஜோடி. ஜெயம் ரவி மாமியார்.

"பூவே நீ யார் சொல்லி யாருக்காக மலர்கின்றாய்"

https://www.youtube.com/watch?v=gdNEPiePGOA

"அவள் ஒரு மோகன ராகம்"

https://www.youtube.com/watch?v=GucvNqTQX-s

ஆகிய அற்புதமான பாடல்கள் A.A.ராஜ் இசையில் கொடுத்தார்.

பின்னர் A.A.ராஜ் இசையமைத்த இன்னொரு தமிழ்த் திரைப்படமான "உதயமாகிறது" படத்தில் "ஒரு தலை ராகம்" நாயகன் சங்கர் தான். ஆனால் படம் உதயமாகியும் பெரிய அளவில் பேசப்படாத படம் ஆகியது.

கானா பிரபா

15.09.2026

மகாகவி சுப்ரமணிய பாரதியார் பாடல்களோடு ஏழாவது மனிதன்

காக்கைச் சிறகினிலே நந்தலாலா

நின்றன் கரிய நிறம் தோன்றுதையே நந்தலாலா….

மகாகவி சுப்ரமணிய பாரதியாரின் எண்ணற்ற பாடல்கள் திரையிசையில் வந்தாலும், 

“ஏழாவது மனிதன்” திரைப்படப் பாடல்கள் தனித்து நின்று மிளிரும்.

அந்தப் படத்தில் இடம்பெற்ற ஒவ்வொரு பாரதியார் பாட்டுக்கும் தனித்துவம் மிகுந்த இசையளித்திருப்பார் எல்.வைத்யநாதன்.

மகாகவி சுப்ரமணிய பாரதியாரின் வாழ்க்கையைப் படமாக்குவதற்காகத் தான் அவரின் பாடல்களைத் தேர்ந்தெடுத்து இசையமைத்தார்களாம். ஆனால் பாரதியின் குணாம்சம் என்பது புதிர் நிறைந்தது, அதைத் திரையில் அப்படியே கொண்டு வர முடியாது என்ற நிலையில் அந்த முயற்சி கைவிடப்பட்டு, பதிவு செய்த பாடல்கள் அனைத்தையும் புதிதாகத் தேர்ந்தெடுத்த கதைக்குப் பொருத்தப்பட்டு “ஏழாவது மனிதன்” உருவானான்.

இந்தத் தகவலை படத்தின் இயக்குநர் ஹரிஹரன், சாய் வித் சித்ராவில் பகிர்ந்திருந்தார்.

பாரதியார் கதை இல்லாவிட்டாலும், சமூக சிந்தனை கொண்ட ஒரு கருப் பொருளை எடுத்துக் கொண்டு திரைப்படக் கல்லூரி மாணவராக இருந்த ரகுவரன் நாயகன் ஆக்கப்பட்டு ஏழாவது மனிதன் உருவானது.

சிறந்த தமிழ்த்திரைப்படமாகத் தேசிய விருது கண்டது. 

“காக்கைச் சிறகினிலே நந்தலாலா” 

https://youtu.be/d4TCldCmG_I?si=koVIHwC7u07EzD4G

எவ்வளவு மென்மை படைத்ததோ அதற்கு எதிர்மாறாக

உச்சி மீது 

உச்சி மீது வானிடிந்து

வீழுகின்ற போதிலும்

அச்சமில்லை அச்சமில்லை

அச்சமில்லை என்பதே…

https://youtu.be/MBM_HFi3kdg?si=i8_y9A3DWgA1mR3w

SPB இன் நையாண்டித் தனமும் ஆக்ரோஷமும் கொண்ட குரல் அந்தப் பாடலின் தொனியை உயிர்ப்பிக்கும்.

“வீணையடி நீ எனக்கு 

மேவும் விரல் நானுனக்கு”

https://youtu.be/XordYIAkv1o?si=i6Kcm3JQyzkRY9C6

ஒரு காதல் படத்துக்கு பாரதியாரே பாட்டு எழுதியது போலத் தொனிக்கும்.

ஜேசுதாசோடு B.நீரஜாவின் அழகுப் பாடல்.

பாரதியாரின் கொள்ளுப் பேரன் கொள்ளுப்பேரன் ராஜ்குமார் பாரதிக்கும் இங்கே மகத்துவம் கொடுக்கப்பட்டது.

“நெஞ்சில் உரமும் இன்றி நேர்மைத் திறனும் இன்றி வஞ்சனை செய்வாரடி கிளியே வாய்ச்சொல்லில் வீரரடி” 

இன்றுவரை ரசித்துப் போற்றப்படும் பாடல்களில் ஒன்று.

மேலும்

செந்தமிழ் நாட்டென்னும் போதினிலே, விடுதலை விடுதலை விடுதலை,

ஆடுவோமே பள்ளுப் பாடுவோமே, மனதில் உறுதி வேண்டும், எந்த நேரமும், நல்லதோர் வீணை செய்தே, ஓடி விளையாடு பாப்பா, ஆகாவென்றெழுந்தது பார்

என்று மொத்தம் 13 பாரதியார் பாடல்கள் ஏழாவது மனிதன் திரைப்படத்தில் கையாளப்பட்டது.

முழுப் பாடல் தொகுதி https://youtu.be/P4WWjlwUCsE?si=W5tp5ZTPMRMRdEdn

மகாகவி சுப்ரமணிய பாரதியார் நினைவு தினத்தில் அவர் நினைவை அவர் தம் பாடல்களால் போற்றுவோம்.

❤️🙏

கானா பிரபா

11.09.2026

ஆயிரம் பதிவு கண்ட றேடியோஸ்பதி ❤️📻

என்னைத் தினமும் உயிர்ப்போடும், துடிப்போடும் வைத்திருப்பது பாடல் கேட்பது மட்டுமல்ல, இசை ரசனையில் மூழ்கி அவற்றைப் பதிவாக்குவது. காலை, மாலை ரயில் பயணங்களிலும், காத்திருக்கும் நேரங்களில் கிடைக்கும் அவகாசங்களிலும், நள்ளிரவு தாண்டிய நித்திரை இல்லாப் பொழுதுகளிலுமாகப் பெருகிப் பெருகி இன்று ஆயிரம் கடந்து நிற்கிறது என் றேடியோஸ்பதி வலைப்பதிவு.

மார்ச் 7, 2007 ஆம் ஆண்டு முதல் தொடங்கிய இந்தப் பயணம் 20 வருடங்களைத் தொடப் போகிறது.

இடைப்பட்ட காலத்தில் செல்போனில் பதிவு எழுதும் வசதி வந்து விட்டது எனக்குப் பெரும் வரப்பிரசாதம் ஆகியது.

இசைஞானி இளையராஜா போற்றும் முன்னோர்கள் திரையிசைத் திலகம் கே.வி.மகாதேவன், மெல்லிசை மன்னர் எம்.எஸ்.விஸ்வநாதன் தொட்டு இன்றைய இசையமைப்பாளர்கள் வரை என் ரசனைக்குத் தீனி போட்டவர்களை இந்தத் தளத்தில் களஞ்சியப்படுத்தியிருக்கிறேன்.

ஆபாவாணன் தொட்டு வி.எஸ்.நரசிம்மன் உள்ளிட்ட அரிய பல திரைப் படைப்பாளிகளைப் பேட்டி கண்டு பதிவாக்கி இருக்கிறேன்.

சின்னத்தாயி இயக்குநர் கணேசராஜ் இன் புகைப்படம் ஒரு காலத்தில் இணையத்தில் இல்லாத சூழலில் என் ஆவணப் பகிர்வு பலருக்குக் கை கொடுத்திருக்கிறது.

இசைஞானி இளையராஜாவின் தேர்ந்தெடுத்த 40 படங்களின் பின்னணி இசையை அவற்றின் பின்னணி அலசலோடு பகிர்ந்திருக்கிறேன்.

இன்னும் இன்னும் தொடர்வேன்

எந்தன் மூச்சும் இந்தப் பாட்டும் 

அணையா விளக்கே ❤️

தமிழோடு இசை, பாடல் 

மறந்தறியேன் ❤️❤️❤️

❤️ கானா பிரபா ❤️

சிரித்திடும் வாவிக் கரையோரம் ❤️ யுவன் ஷங்கர் ராஜா & கவிஞர் தாமரை

சிரித்திடும் வாவிக் கரையோரம்,

காத்து நான் கிடந்தனன்,

பதுங்கி மெல்ல வந்தவன்,

பகடி பகடி என்ன....போங்கடி!

யுவன் ஷங்கர் ராஜாவின் கூட்டணியில் அமைந்த பாடலாசிரியர்களில், கவிஞர் தாமரைக்குக் கிடைத்த அற்புதமான களம் இந்தப் பாடல்.

ஈழத்தமிழர் என்று வரும் போது யாழ்ப்பாணத்துக்குள் சுருங்கிப் போகும் திரைப் பாடல்களைத் தாண்டி, மீன் பாடும் தேனாடாம் மட்டக்களப்பு வாவியை நினைப்பூட்டும் பாடல்.

காசி ஆனந்தன் கொடுத்த 

"மீன் மகள் பாடுகிறாள் 

 வாவி மகள் ஆடுகிறாள்

மட்டு நகர் அழகான மேடையம்மா

இங்கே எட்டுத்திசையும்

கலையின் வாடையம்மா"

என்று நம் ஈழத்துக் கவிஞர் காசி ஆனந்தன் வரிகளில், தேனிசை செல்லப்பா கொடுத்த பாடலை வானொலியில் அடிக்கடி அரங்கேற்றுவேன்.

முதன்முறையாக கடந்த பயணமொன்றில் "மீன்பாடும்" மட்டக்களப்பு வாவியைத் தரிசித்த போது இந்த இரண்டு பாடல்களும் மனதில் அலை மோதின.

நமது உறவெல்லாம் நம் நாட்டில்தான்

என்றும் நினைத்தோம் 

தவறாகதான்,

இங்கும் உறவு உள்ளது...

தமிழர் மனது பெரியது.....

தம் பெரியம்மா தேசம் மீதான ஈழத்தவரின் நன்றியுணர்ச்சியை மெய்த்தன்மையோடு பறையும், "நந்தா" படத்தில் கவிஞர் தாமரை கொடுத்த வரிகள்.

ஓ...நல்லூரின் விதியெங்கும்

திரிந்தோமடி

தேரின் பின்னே 

அலைந்தோமடி....

கிழக்கில் இருந்து வடக்கு நோக்கிப் பயணிக்கும் பாட்டு.

இந்த இரண்டு தமிழர் பிரதேசங்களையும் இணைக்கும் பாட்டு.

நன்றியுணர்ச்சியோடு எம் பெரியன்னை தேசம் தமிழகத்துக்கும் கடல் பிரித்தாலும், நம் தமிழும் , உணர்வும் இணைக்கும் என்று காட்ட வந்த பாட்டு.

யுவன் ஷங்கர் ராஜாவுக்கு ஒரு பிறந்த நாள் பதிவு போடுவோமென்று கடந்த 2 மணி நேரமாக ஒரு நீண்ட பதிவைத் தயாரித்து வைத்து விட்டு அதை அடுத்த வருடம் யுவனிசம் 30 க்குக் கொடுக்கலாம் என்று சேமிப்பில் போட்டு விட்டுத் திரும்பினால், இந்தப் பாடல் தான் கிண்ணென்று காதுக்குள் நிற்கிறது.

முழு நிலவு காயும்

நிலவில் மீன்கள் பாடும் தேன் நாடு

அங்கே இருந்து இங்கே

வாழ வந்த பெண்ணே 

நீ பாடு ❤️

இந்தப் பதிவுக்குப் பாடலாசிரியர் தாமரை பகிர்ந்த அனுபவப் பகிர்வு

மிக்க நன்றி கானா பிரபா Kana Praba ❤️

இந்தப்பாடல் நான் எழுதியதையே தனிக்கதையாக எழுத வேண்டும் ! 😊.

ஈழத்தமிழ் எழுதத் தெரிந்த பாடலாசிரியர் வேண்டும் என்று அவர்கள் தேடியதில் எனக்குக் கிடைத்த வாய்ப்பு இது 😀. (இஞ்சாருங்கோ எழுதியவர் யாரென்று தேடி என்னைப் பிடித்தார்கள் 😀).

பாலா கதை சொல்லி (அவர் எங்கே சொன்னார் !!!!?!!! 😂, அதுவே தனிகதை 😂), லைலா ஈழத்துப்பெண், அவர் திருமணம் நிச்சயமானதால் வரும் பாடல் இது, ஈழத்து வட்டார வழக்கில் பாடல் வேண்டும் என்றார்.... " எந்த வட்டார வழக்கு வேண்டும் ? யாழ்ப்பாணமா, மட்டக்களப்பா, கொழும்பா ? என்று கேட்டேன் 🤭... ஆடிப்போய் விட்டார்... ஓஹோ அப்படியொன்று இருக்கிறதா ? நான் அப்படி லைலாவைக் குறிப்பாகக் காட்டவில்லையே என்று சொன்னார்... நான் வட்டாரங்களுக்கிடையேயான சில வேறுபாடுகளைக் குறிப்பிட்டதும் யோசித்தார். 'இஞ்சாருங்கோ யாழ்ப்பாணத்து வழக்கு' என்று நான் சொன்னதும், 'சரி இதை மட்டக்களப்பு என்று வைத்துக் கொள்ளுங்கள்' என்றார்... 😊... ஈழத்தமிழர்பால் கொண்டிருந்த பற்றும் ஈழ அரசியல் குறித்த முழுமையான புரிதலும் இருந்ததால் எங்கள் இருவருக்கும் உடனடியாக ஓர் இணக்கம் தோன்றியது... எனக்கு முழுச்சுதந்திரம் கொடுத்தார். யாழ்ப்பாணத்தை விட்டுவிட மனமில்லையாதலால் சரணத்தில் நல்லூர் விதயங்களையும் சேர்த்து விட்டேன் 😄. பாடல் பதிவான போது கூடத்தில் அனைவரும் உணர்ச்சி வசப்பட்டோம் 😌... கடல் பிரித்தாலும் நாமெல்லாம் ஒன்றுதான் என்றபோது கண்ணீர் தெறித்தது 😭...

எனக்குக் கிடைத்த மிக அற்புதமான வாய்ப்பு இது...

இதற்குப் பிறகு லைலாவுக்குப் பின்னணி பேச (சவிதா பேசினார்) மொழியுதவி செய்ய முகாமிலிருந்து ஒரு பெண்ணை ஏற்பாடு செய்து, முழு பின்னணிக்குரலுக்கும் உடனிருந்து உதவி செய்து கொடுத்தேன்.

பாடல்கள் முடிந்து ஒலிப்பேழை வெளியானபிறகு, பின்னணி இசைக்கோர்ப்பின் போது சேர்க்கப்பட்ட பாடல் 'ஏ மனிதர்மீது மனிதர் கொள்ளும்' - அகதிகளை கடல்திட்டிலிருந்து அழைத்துவர இராஜ்கிரண் செல்லும்போது ஒலிக்கும் பாடல்... அதையும் என்னையே எழுதச் சொன்னார்... அதுவும் அற்புதமான பாடல் (ஒலிப்பேழையில் இடம்பெறவில்லை)... என் அரசியல் கருத்துகளை எழுதிக்கொள்ளக் கிடைத்த பொன்னான வாய்ப்பு இந்தப்படம் ! 🙏.

இங்கே எழுதிப் பதிவு செய்து கொள்ள வாய்ப்பளித்த உங்களுக்கும் நன்றி 🙏❤️

மாலைப் பொழுதின் மயக்கத்திலே

 மாலைப் பொழுதின் மயக்கத்திலே நான்

கனவு கண்டேன் தோழி

மனதில் இருந்தும் வார்த்தைகள் இல்லை

காரணம் ஏன் தோழி….

அடிமனதில் இசைஞானி இளையராஜா பாடுவது போலவே தொனிக்கும் எனக்கு.

ஏனெனில் அவருக்கு உயிருக்கு உயிரான பாட்டு.

“நான் இசையமைப்பாளன் ஆகக் காரணமான பாட்டு. இவர்கள் இல்லாமல் நானில்லை” என்று மெல்லிசை மன்னர்கள் விஸ்வநாதன் & ராமமூர்த்திக்கு முன்னால் வாக்குமூலம் சொன்னார் அல்லவா?

“நானா பாடலையே நீதான் பாட வச்சே” என்று சுசீலாம்மாவைப் பார்த்து ராஜா பாடுவாராம், அதற்கும் காரணம் இந்த “மாலைப் பொழுதின் மயக்கத்திலே” பாடல் தான்.

இந்தப் பாடலைப் பற்றி கடந்த 65 ஆண்டுகளாகப் பேசாத வாய் இல்லை என்போம்.

பாக்யலட்சுமி படத்தை இந்தப் பாடலுக்காகவே ஒரு சமயம் பார்த்திருந்தேன்.

ஆச்சரியமாக இந்தப் படத்தில் ஒரு குறியீடு இருந்தது.

அது

“வெள்ளைத் தாமரைப் பூவில் இருப்பாள்,

வீணை செய்யும் ஒலியில் இருப்பாள்”

என்று பாரதியார் பாடிய சாட்சாத் சரஸ்வதி தேவி தான்.

அதென்ன குறியீடு?

இளம் விதவையாக அதாவது தன் கணவன் இறந்து விட்டான் என்ற பொய் நினைப்பில் இருக்கிறாள் கமலா (செளகார் ஜானகி).

கமலா (தாமரைப்பூ) வணங்கும் தெய்வமாகப் படத்தில் காண்பிக்கப்படுவது சரஸ்வதி தேவியை.

அத்தோடு கமலாவின் அந்தத் தூய வெள்ளுடை தானே சரஸ்வதியின் சேலையும்?

“மாலைப் பொழுதின் மயக்கத்திலே நான்

கனவு கண்டேன் தோழி”

பாடலை கமலா பாடுகிறாள், தான் பால்ய விவாகம் செய்த, திரும்பி வந்த கணவன் முன்னால், அவனோ தன் தோழியின் கணவாகக்கப்பட்டவன் ஆகியிருக்கிறான்.

இதேதும் அறியாத அந்தத் தோழி மீட்டுகிறாள் சரஸ்வதியின் நாத வாத்தியமான வீணை !

செளகார் ஜானகியிடம் பேட்டி எடுத்தால் மறக்காமல் ஞாபகப்படுத்துவார்

“பாக்யலட்சுமியை விட்டுட்டீங்களே” என்று. சாய் வித் சித்ராவிலும் நடந்தது.

மெல்லிசை மன்னர்கள், சுசீலாம்மா இவர்களைத் தாண்டி ஆதார சுதியாக இருக்கும் அந்தக் கண்ணதாசன் கவிச்சிறப்பை என்ன சொல்ல?

கனவில் வந்தவர் யாரென கேட்டேன்

கணவர் என்றார் தோழி

கனவு => கணவர்

சந்தத்துக்கு எழுதும் கைப்பக்குவம் பாருங்கள் அந்தச் சொல் விளையாட்டு தரும் வியப்பு.

கண்ணதாசன் பாடல்களில் காட்சிச் சூழல் தாண்டி உலகியல் தத்துவம் பொதிந்திருக்கும்.

இந்த வரிகள் எல்லாச் சூழலுக்கும் பொருந்தும் தானே?

இன்பம் சில நாள் துன்பம் சில நாள்

என்றவர் யார் தோழி

இன்பம் கனவில் துன்பம் எதிரில்

காண்பது ஏன் தோழி !

கானா பிரபா

22.08.2026 

அடுக்குமல்லி எடுத்து வந்து ❤️

மெட்டுப் போடும் 

செந்தாழம் பூ

கெட்டி மேளம் போட

எட்டிப் பாக்கும் ஆவாரம் பூ

வெக்கத்தோடு ஓட

விடிகாலை சிட்னி வெளியெங்கும் ஒரு 

கனரக வாகனம் ஒன்று ஒரு புகை மண்டலத்தை எழுப்பி விட்டுப் போனது போலப் பனிப்புகார்.

காலை ஏழு மணி டொட் 

மகளைப் பள்ளிக்கூடத்தில் இருத்தி விட்டுத் திரும்பும் போது கனேடிய வானொலி இந்தப் பாடலை ஒலிபரப்பவும் காரை ஓரம் கட்டி, ஒலித்தரம் கொண்ட பாடலைக் கேட்டுக் கொண்டே பயணிக்கிறேன்.

அந்த மூன்றாவது நிமிடத்தில் கூட்டுக் குரல்களுக்குப் பின்னால் ஒரு துள்ளாட்டம் போடுமே ஒரு இசைக் குவியல்? அது போல ஆகிவிட்டது மனம்.

கதாநாயகியைத் தன் முதுகில் சுமந்து செல்லும் நாயகன் போலவே இந்தப் பாடலும் என்னைச் சொகுசாகச் சுமந்தது போல ஒரு உணர்வு.

பட்டம் விட்டு அலை பாயும் காதலர் போல மிதக்குது மனம்.

அடுக்கு மல்லி எடுத்து வந்து

தொடுத்து வச்சேன் மாலை

மணக்கும் ஒரு மணிக் கழுத்தில்

விழுந்ததிந்த வேளை ❤️

அதெப்படி காட்சிக்குப் பொருந்தும் போல அந்தக் காதலியைச் சுமக்குமாற் போலச் சந்தம் பாடுகிறது என்று ஒவ்வொரு தடவை கேட்கும் போதும் ஆச்சரியம் தான் எனக்கு.

பொம்பள எஸ்பிபி ஜானகியும், ஆம்பள ஜானகி எஸ்பிபியும் பாடிய காலத்துக்கும் நிற்கும் பாடல்களில் இதைத் தவிர்க்கத்தான் ஒப்புமோ மனம்?

அச்சாரம்...அப்பன் தந்த முத்தாரம்...

ஒரு இழுவை கொடுப்பார் பாருங்கள் 😁

சொந்தம் இங்கே வந்தாளுன்னு...

சொன்னான் அவன் லேசா...

ஜானும்மா கொஞ்சம் வெட்கம் கலக்க

இவரோ அந்தச் சந்தம் கெடாமல்

ஹஹ்ஹா போடுவார்

சந்தோஷம்...

தங்கத்துக்கு சந்தோஷம்

இப்போதும்...

கிட்ட வரும் எப்போதும்...

காத்திருந்து தீட்டுவது போல அந்த ராட்சசியும் பதம் பார்ப்பார்.

இந்த அதிகாரப் போட்டியை மாறி மாறி ரசிப்பதே சுகம்.

ஒற்றைப் புல்லாங்குழல் அப்படியே எங்காவது கிராமத்தில் கொண்டு போய் நம்மை நட்டு விட்டுத் திரும்பும்.

இந்தமாதிரிப் பாடல்களின் மெட்டைப் பங்கம் செய்யாமல் சந்தத்தின் மீதேறிப் பாட்டெழுத கங்கை அமரனே துணை.

மலையாள இயக்குநர் பரதனுக்கு பட வாய்ப்பு இல்லாத சூழலில் இளையராஜாவே தயாரிப்பாளர் கேயாரிடம் பரிந்துரைக்கிறார். கேயாரும் ராஜா சொன்னதே வேத வாக்கு என்று பரதனை ஒப்பந்தம் செய்யவும் “ஆவாரம்பூ” பூக்கிறது.

இந்தப் படம் பரதன் இயக்கி, மலையாளத்தில் ஒரு முக்கியமான படமாக விளங்கும் தகரா படத்தின் மீள் உருவாக்கமாகும்.

பாடல் மெட்டுக்கட்ட Ideal beach போனார்களாம். 15 நிமிடத்தில் ஆறு பாடல்களுக்குமான மெட்டுகளையும் போட்டுவிட்டு நிமிர்ந்தார் இளையராஜா என்று தயாரிப்பாளர் கேயார் இன்று கூட ஆச்சரியப்பட்டுப் பேசுகிறார்.

“ஆலோலம் பாடி” பாடலை SPB ஐ வைத்துப் பாட வைக்க ராஜா முடிவெடுத்தும், கேயார் இவரே வேண்டும் என்று அன்புக் கட்டளை இட்டாராம்.

ஆக, அந்தப் பதினைந்து நிமிடத்துக்குள் பிறந்த ஒரு அபூர்வம் தான் இதுவும் ஆகிய

அடுக்கு மல்லி எடுத்து வந்து

தொடுத்து வச்சேன் மாலை ❤️

34 வருஷங்களுக்கு முன்னர் இந்த  மெட்டைப் போடும் போது ராஜா நினைத்திருப்பாரா,

அத்தனை ஆண்டுகள் கழித்தும் 

பல்லாயிரக்கணக்கான மைல் கடந்து ஒரு தென் அரைக்கோள முனையில் இருப்பவனுக்குப் பக்கத்தில் தான் போய் இருப்பேன் என்று?

வெற்றி மாலை 

போட்டானய்யா

கெட்டிக்கார ராசா

முத்துப் போல கண்டான் அங்கே

மொட்டுப் போல ரோசா ❤️

பாவலர் சகோதரர்களின் Folk music of Tamil nadu

 

இசைஞானி இளையராஜா நாட்டுப்புறப் பாடல்களை மையப்படுத்தி ஒரு நாவலை உருவாக்குமாறு எழுத்தாளர் சுஜாதாவை வேண்டவும், அவரும் 

“கரையெல்லாம் செண்பகப்பூ” எழுதியதாகக் குறிப்பிட்டிருப்பார்.

பின்னாளில் மெல்லத் திறந்தது கதவு படத்திலும் மோகன் கதாபாத்திரம் நாட்டுப்புறப் பாடல்களைச் சேகரிக்கும் ஆய்வாளராக உருவாக்கப்பட்டிருக்கும்.

இதற்கெல்லாம் ரிஷிமூலம் ஒன்றுண்டு.

மேற்கில் மழை பெய்யவே ஏ ரங்கநாதசாமியோ

மேல் வாய்க்கால் தண்ணீர் வர

Youtube இல்

https://youtu.be/C12qX1XYBxs?si=7ji2BpU6DhDYIrdi

Spotify

https://open.spotify.com/track/3KBA5kwm2qjse85kPn7ide?si=-byLG1xVThqOnUHBdbG4Eg&utm_source=copy-link

இந்தத் தாலாட்டுப் பாடல் 

Folk music of Tamil nadu என்ற

இளையராஜாவின் திரைப் பிரவேசத்துக்கு முன்பாக 

பாவலர் சகோதரர்கள் கொடுத்த இசைப் பெட்டகம்.

சியாமளா பாலகிருஷ்ணன் அவர்கள் சேகரித்த தமிழக நாட்டுப்புறப் பாடல்களுக்கு பாவலர் சகோதரர்கள் இசையில் பத்மா சுப்ரமணியம் மற்றும் மலேசியா வாசுதேவன் ஆகியோர் பாடியிருக்கிறார்கள்.

பின்னாளில் இந்தப் பாடலின் பல்லவியை அப்படியே கையாண்டு

பேராசிரியர் ஜெகன்னாதன் வரிகளில் “சிறை கதவுகள்” படத்தில் V.ஜெயசேகர் இசையில் இப்படி வந்திருக்கிறது கேளுங்கள்

https://youtu.be/6DaABIcBK0U?si=GcWRgt_C0qWjkd48

அதுவும் மெட்டுக் கூட ஒத்திசைக்கிறது

இரண்டாவது 

தண்ணி கருத்திருச்சு தவளைச் சத்தம் கேட்டிருச்சு

இப்படி அந்த நாட்டுப் பண் பாடலில் வரும் வரிகளை அப்படியே

“இளமை ஊஞ்சலாடுகிறது” படத்தில் வாலியின் வரிகளோடு இணைத்து வந்திருக்கிறது கேளுங்கள்

இன்னொன்று

இந்த நாட்டுப் பண் முடியும் போது வரும் வரிகள்

மருத அழகரோ மாமதுர சொக்கரோ

இதை சுந்தர புருஷன் படத்தில் சிற்பி இசையில் வைரமுத்துவின் பாடலின் பல்லவியாக எழுதப்பட்டிருக்கும்

இப்படி

https://youtu.be/2RMtg963ovk?si=nv2f2XcW4TpR8ijS

இந்த கிராமியப் பண் பாடல்களின் தாக்கத்தால் மேலும் சில பாடல்கள் வந்திருக்கின்றன. அவற்றைப் பின்னர் பார்ப்போம் 😊

கானா பிரபா

07.08.2026

நடிகர் விக்னேஷ் திரையிசைப் பாடல்கள்

நடிகர் விக்னேஷின் பேட்டி Chat with Chithra வில் போய்க் கொண்டிருக்கிறது.

பல நாட்களுக்குப் பின்னர் கூடப் பழகிய கூட்டாளியைப் பார்த்தது போலவொரு உணர்வு.

விக்னேஷ் போன்ற நாயகர்கள் வந்த காலத்தில் தான் சொந்தமாகப் பாட்டு கேட்கவும், படம் பார்க்கவும் மாறிய காலம் அது.

சிறு வயதிலேயே விக்னேஷின் தாய், தகப்பன் இறந்து போனதும், முட்டி மோதி வாய்ப்புத் தேடிய கதை எல்லாம் அந்தக் காலத்து சினிமாத் துணுக்குகளாக வந்ததால் இவர் மேல் ஒரு அனுதாபப் பார்வை இருக்கும்.

நடிகர் பிரேம் போலவே ஒரு படத்தில் ஒப்பந்தமாகிப் பின்னர் நீக்கப்பட்ட கதையும் நடந்தது.

வண்ண வண்ணப் பூக்கள் படத்தின் இரண்டாவது நாயகனாக ஒப்பந்தமாகி நீக்கப்பட்ட விக்னேஷ்,  இதே மாதிரி கிழக்குச் சீமையிலே படத்தில் நீக்கப்பட்ட பிரேமுக்குப் பதிலாக நடித்ததும் முரண்.

அது போலவே பாலாவின் அகிலன் படத்தில் (பின்னாளில் சேது) நடிக்கக் கைகூடாமல் போனது இவருக்கு.

அற்புதமான பாடல்கள் கிடைத்த வகையில் நடிகர் விக்னேஷ் உண்மையில் பெரிய அதிஷ்டக் கட்டை என்று தான் சொல்ல வேண்டும்.

பாரதிராஜாவின் “கிழக்குச் சீமையிலே” படத்தில் “ஆத்தங்கரை மரமே” பாடலும், “பசும்பொன்” படத்தில் “தாமரைப் பூவுக்கும்” என்று 

இரண்டு படங்களிலேயே அப்படியொரு நல்வாய்ப்பு.

“ஊரார் ஒதுக்கி வச்ச ஓவியம் என்னைப் பொறுத்தவரை காவியம்”

இன்று ஜென்ஸீயும் வைப் பண்ணும் “சின்னத்தாயி” நாயகன்,

“நான் ஏரிக்கரை மேலிருந்து” எல்லாம் இவருக்கு வாழ் நாள் வரம்.

விக்னேஷுக்குக் கிடைத்த புது இசையமைப்பாளர்கள் கூட அவருக்கு அருமையான பாடல்களை அளித்தார்கள்.

“அம்மா பொண்ணு” பாடல்களில்

“சுதியோட ஒண்ணா சேருடா” 

https://www.youtube.com/watch?v=JFim27Kbmqk

ஏகாந்தன் இசையில் ஒரு மகுடிப்பாட்டு.

இளைய கங்கை இசையில் “மனதிலே ஒரு பாட்டு” படத்தில்

கண்ணே அழகிய கண்ணே

https://www.youtube.com/watch?v=F3WcYVVBPGg

இவற்றில் பெரும்பாலும் எஸ்பிபி பாடியதும் குறிப்பிடத்தக்கது.

இசைஞானி கொடுத்த “ராமன் அப்துல்லா” பாட்டு

“என் வீட்டு ஜன்னல் எட்டி ஏன் பாக்குறே”

https://www.youtube.com/watch?v=QodNZpcNYVg

என்று அடுக்கிக் கொண்டே போகலாம்.

இன்னும் சொல்ல வேண்டுமென்றால் “காதலி” படத்தில்

“மும்பை காற்றே மும்பை காற்றே” 

https://www.youtube.com/watch?v=M8AFpflpp4s

கேட்டுப் பாருங்கள் தேனிசைத் தென்றல் தேவாவும் நிகராக அள்ளித் தெளித்திருப்பார்.

ஹரிஷ் ராகவேந்திரா போன்ற இளையவர்களும் கூட விக்னேஷுக்கு அருமையான பாடல்களைப் பாடியளித்திருக்கிறார்கள் என்பதற்கு 

“பிரிவெல்லாம் பிரிவல்ல நண்பா”

https://www.youtube.com/watch?v=32IH3ELsK-U

உதாரணம் பறையும்.

இதற்கெல்லாம் உச்சமாக ஒரு பாட்டு உண்டு. அந்தப் பாட்டு இடம்பெற்ற திரைப்படம் “செல்லக்கண்ணு”.

விக்னேஷ் பேட்டி என்றால் கண்டிப்பாக இந்தப் படம் பற்றி யாரும் பேசுவார்கள் என்றே எதிர்பார்த்தேன்.

செல்லக்கண்ணு படத்தின் சேலம் உரிமையை வாங்கி அந்தப் படம் பெரு வெற்றி பெற்று 20 லட்சம் லாபம் பார்த்ததாக (இன்றைய கணக்கில் கோடி தாண்டும்) இந்தப் பேட்டியில் விக்னேஷ் குறிப்பிட்டிருந்தார்.

செல்லக்கண்ணு படத்தில் நான் குறிப்பிட்ட அந்தப் பாடல்

“வண்டியில மாமன் பொண்ணு

ஓட்டுறவன் செல்லக்கண்ணு

எங்க வீட்டு ராணி வாரா

எல்லாம் வந்து பாத்துக்குங்க

https://www.youtube.com/watch?v=BZsC-RiejL4

இந்தப் பாடலைப் பொறுத்தவரை எஸ்பிபி & ஸ்வர்ணலதா என்ற இரட்டைக் குதிரைகளை வைத்து தேவா அதகளம் பண்ணியிருப்பார்.

ஒரு மாட்டு வண்டியின் குலுங்கல் சந்தத்தைப் பின் தாளக் கட்டுடன் கொண்டு வருவார். வண்டியின் அடியில் தொங்கும் அந்தக் கட்டை மேலும் கீழுமாக அசைந்து ஒலிக்கும் ஓசை போல.மாட்டு ஆண் பாடகர் வண்டியை ஓட்டிக் கொண்டு, மாடுகளை அரவணைத்து ஒலியெழுப்பி கூடவே ஜோடிப் பாடலாகப்  கொடுப்பது ஒரு புதுமை. 

தேனிசைத் தென்றல் தேவாவின் உச்சங்களில் இதுவுமொன்று.

எஸ்பிபி & ஸ்வர்ணாவின் ரகளை சொல்லவே வேண்டாம்.

இந்தப் பாடல் படமாக்கப்பட்ட விதம் கூடக் கொள்ளை அழகு. விக்னேஷ் & யுவராணி ஜோடியின் அந்த கிராமத்து உடைகள் மாற்றி மாறிப் பாடலோடு அழகுணர்வைக் காட்டும்.

https://www.youtube.com/watch?v=tEVHFiKmsUw

இப்படியான பாடல்களை மீண்டும் பார்க்கும் போது நம் கிராமத்து அந்த அழகிய வாழ்வின் நினைவுகள் தான் மிதந்து வரும்.

கானா பிரபா

ஜானுவும் சுப்ரமணியமும்

 

கோட்டையை விட்டு வேட்டைக்குப் போகும் சுடலமாடசாமி….

https://youtu.be/CIl5itfu8yk?si=n-Afq3BJWdeDORxk

இழுத்து இழுத்து ஒரு தயக்கக் குரலோடு கொடுப்பார் அந்தக் குண்டுப் பையன்.

அதே பாட்டு தான் ஆனால் நூறு கிமீ வேகத்தோடு ஏற்றுவார் ஜானு.

https://youtu.be/biWEAGVc3nY?si=OYAaHlw6ejaQKIVt

ஒரு பாடலை ஆண் குரல், பெண் குரல் என்று தனித்தனியாக ஒரே பாடலைக் கொடுக்கும் மரபு திரையிசையில் இருக்கிறது.

அங்கு கூட எஸ்.ஜானகி & எஸ்.பி.பாலசுப்ரமணியம் ஆகியோரே உச்சபட்ச நியாயம் கற்பித்திருக்கிறார்கள்.

இன்னொன்றைப் பாருங்கள்

இங்கே மானமுள்ள 

பொண்ணு ஒண்ணை 

மனம் துடிக்க விட்டாக 

மறுதலிக்க வச்சாக….

https://youtu.be/Rru5bWyBHoU?si=qq9y98hYO05wW3J7

அடிபட்டுக் கீழே விழுந்த குரலாய் எஸ்பிபி.

என்னை மானமுள்ள 

பொண்ணு இன்னு

மருதையில கேட்டாக 

மன்னார்க்குடியில கேட்டாக

அந்த மாயவரத்துல கேட்டாக

https://youtu.be/BobkirXNQp0?si=ocqzmVF5g_RDBb2D

தெனாவெட்டு மரிக்கொழுந்தாய் அவதாரம் எடுப்பார் ஜானகி.

இவர்கள் ஒன்று சேர்ந்த “இதயம் ஒரு கோவில்” ஜானகி ஆலாபனை கொடுத்ததிலாகட்டும்

“பாடு நிலாவே தேன் கவிதை பூமலர”

ஜோடிப் பாடலிலாகட்டும் ஒற்றைப் பாடகராக ஒரு பிரமையை எழுப்புவார்கள்.

“நிலவு தூங்கும் நேரம் நினைவு தூங்கிடாது” ஜோடியாகப் பாடியவர்கள். பதிவு கானாபிரபா அங்கே தனித்து ஜானகிக்கு ஒற்றைப் பாடல் விதைத்திருக்கும்.

இதே மாதிரியான ஜோடிப் பரிமாணத்தில் “வைகை நதியோரம்” பாடலில் இணைந்தவர்கள், இங்கேயும் ஜானகிக்கும், இளையராஜாவுக்கும் ஒற்றைப் பாடல்கள் சோக ராகம் பாடும்.

“ஆடுங்கள் பாடுங்கள்” குரு படத்தின் எஸ்பிபி குழுப் பாடல் போல ஜானகிக்கும் ஒன்றுண்டு.

“காதலின் தீபம் ஒன்று” 

அலுக்க அலுக்க எஸ்பிபியைக் கேட்டாலும் அங்கேயும் ஜானகியின் தனிப் பாடலுக்கும் இதயத்தின் மறுபாதியைக் கொடுத்திருப்போம்.

ஜானகி

https://youtu.be/ix7QcsU7bmE?si=OunjvMVJPipuQwZ_

எஸ்பிபி

https://youtu.be/c6KoQ8eCbKw?si=Hnizb4wglNOCRuz-

“தேனே தென்பாண்டி மீனே”

இங்கே பாசப் பாடல் இதுவும் இரண்டு பரிமாணங்களில் அக்காவும், தம்பியும் அம்மாவுக்கும், மகனுக்காகவும் கொடுத்திருப்பார்கள்.

ஜானகி

https://youtu.be/YqFHrpOEVEk?si=SNIFd6WKpfJCBIPP

எஸ்பிபி

https://youtu.be/eIuB7XiOyuY?si=ZIO9Q1YoYU_Ljbdp

உதயகீதம் கொடுத்த அதே கே.ரங்கராஜின் “நினைவே ஒரு சங்கீதம் தரும்” இருவர் குரலில் தனித் தனியாய்,

“எடுத்து வச்ச பாலும் விரிச்சு வச்ச பாயும் வீணாகத் தான் போகுதே”

ஜானகி

https://youtu.be/ImpesKVIjPQ?si=JXr9byFMqV-Jவ்ச்

எஸ்பிபி

https://youtu.be/qjDPmpcZPU4?si=CeGPHXa5SKI9q1Dc

வாரணம் ஆயிரம் சூழ வலஞ்செய்துநாராணநம்பி நடக்கின்றான்

கேளடி கண்மணி தந்த அந்த ஆண்டாள் பாசுரத்தில் பக்தி என்னும் ஆழியில் இறக்கி விடுவார்கள்.

ஜானகி

https://youtu.be/SFR13To0ZXk?si=Wv_nad73te47GlyV

எஸ்பிபி

https://youtu.be/rv7t0ubd0Zc?si=nGI5kk0U-HOexXNQ

இசைஞானி இளையராஜா இசையில் எஸ்.ஜானகி & எஸ்.பி.பாலசுப்ரமணியம்  பாட்டுக் கூட்டணிகள் தந்த வித்தைகள் தான் எத்தனை எத்தனை.

கானா பிரபா

05.08.2026