பாடகர் கிருஷ்ணராஜ் இன் பாட்டுப் பயணம்

அவர் ஒரு அறிமுக இயக்குநர்

இவர் ஒரு அறிமுகப் பாடகர்

இருவருக்குமான முதல் வாய்ப்பு, பாடல் பதிவாகிறது, ஆனால் படமோ முடங்கிப் போகிறது.

அவர் அகத்தியன் என்ற இயக்குநர், இவர் கிருஷ்ணராஜ் என்ற பாடகர்.

இசையமைப்பாளர் தேவா அறிமுகத்தில் அவரிடம் பக்திப் பாடல்கள் பாடியவருக்குத் திரைப்படப் பாடல் வாய்ப்பு வாய்க்கிறது, சரத்குமார் நடிப்பில் அகத்தியன் இயக்கவிருந்த,  “அதிகாலை சுபவேளை” படத்தில் இடம்பெற்ற 

“உன்ன நான் தொட்டதுக்கு”

https://youtu.be/vz3I-8kMk10?si=YQzr-IyDxeMYRisw

பாடல் வழியாக. ஆனால் அந்தப் படம் வெளிவராமல் முடங்கிப் போனது.

இந்தப் பாடல் பின்னர் SPB பாடிய “ஊர்மரியாதை” படத்தில் வெளிவந்தது

https://youtu.be/eap91tjwFQI?si=Vl7eCz8e583T7lTy

பாருங்கள் அப்பவே கிருஷ்ணராஜ் பாடிய பாடல் இன்னொருவருக்குப் போயிருக்கிறது. பின்னாளில் நலம் நலமறிய ஆவல் பாடலுக்கும் இப்படித்தானே நேர்ந்தது.

பின்னாளில் இதே அகத்தியன் இயக்கிய “காதல் கோட்டை” படம் “வெள்ளரிக்கா பிஞ்சு வெள்ளரிக்கா” பாடல் வழி பாடகர் கிருஷ்ணராஜுக்குப் பெரும்  புகழ், இருவருக்கும்  மறுவாழ்வு அளித்தது வரலாறு.

வேம்படிதாளம் என்ற ஊரில் சேலம் மாவட்டத்தில் பிறந்தவர். 

உள்ளூர் இசைக்கச்சேரிகளில் பாடி வந்தவருக்கு ஒரு சமயம் பாடல் போட்டியில் முதற் பரிசு கிடைக்கிறது. அந்தப் பரிசைக் கொடுத்தவர் பிரபல இசையமைப்பாளர் வி.குமார்.

அப்போது தான் முழுமையான பாடகராக வேண்டும் என்ற எண்ணம் அவர் மனதில் கிளர்கின்றது. இந்தப்பதிவை எழுதியவர் கானா பிரபா

தமிழ் நாடு இசைக்கல்லூரியில் முறையாக இசை பயின்று, “சங்கீத வித்துவான்” பட்டத்தை மட்டுமல்ல, முதல் மாணவர் என்ற உன்னதத்தைத் தொட்டதால் அன்றைய தமிழக முதலமைச்சர் எம்.ஜி.ஆர் பதக்கம் வழங்கிக் கெளரவித்தார்.

தமிழ்த் திரைப்பட உலகில் அவருக்குத் திறவுகோலாய் அமைந்தது, இசையமைப்பாளர் ஆர்.ராமானுஜன் அவர்களுடனான அறிமுகம்.  அவரிடமேயே முதல் பாட்டு பாடியிருக்கிறார். அந்த சமயம், விளம்பரப் பாடல்கள், பக்திப் பாடல்களைப் பாடல்கள் என்று தொடர்கிறார்.

அது சரி

யார் அந்த ராஜன் சக்ரவர்த்தி?

அதுவும் இவர் தான்.

“ வா அருகில் வா” திரைப்படத்தில்

சாணக்யா இசையில்

இதயக் கோயிலில்

https://youtu.be/-7_6Wk28kAs?si=Jk03zuJoZ3rl0zIV

பொன்னுமணி பூச்சரமே

https://youtu.be/-VchU84LUqw?si=qP0gwLsalW50HIKE

ஆகிய இரு பாடல்கள் வழியாக அறிமுகமாகிறார்.

தேவாவின் இசையில் ராஜன் சக்ரவர்த்தி என்ற பெயரிலேயே, 

அம்மா தானம்மா - மண்ணுக்கேத்த மைந்தன்

https://youtu.be/1Mm7T6_lus8?si=6OzyqbwI0zp__oNb

மாலைக் கருக்கல் வந்து - நாடோடிக் காதல்

https://youtu.be/NHuh1EoSrAE?si=M6hARLHnjGwNKMIR

வைகாசி பொறந்தாச்சு படத்தில் “வாழை மரம்” பாடல், 

அண்ணாமலை அண்ணாமலை (மாங்கல்யம் தந்துனானே)

https://youtu.be/I59WC79Cfrs?si=XsH0rG3rjl2vuuSh

மேலும் “வாயாடி” என்ற இன்னொரு பாடல். “வைதேகி கல்யாணம்” படத்தில்

ஆலமரத்தடி” என்று பாடிக் கொண்டே பயணித்தாலும் பெரிய அடையாளம் இவருக்கு வாய்க்கவில்லை. 

“அறிமுகம் கிருஷ்ணராஜ்” 

என்று தேவா இசையில் ஆனந்த ராஜ் நடித்த, மணிவண்ணன் இயக்கிய “கவர்ன்மெண்ட் மாப்பிள்ளை” படம் இவருக்கு இன்னொரு தடவை அறிமுகம் கொடுக்கிறது.

தேனிசைத் தென்றல் தேவாவின் பாசறையில் track பாடகர் மட்டுமல்ல, பாட்டுச் சொல்லிக் கொடுப்பவரே இவர் தான் என்று இயங்கினார்.இந்தப்பதிவை எழுதியவர் கானா பிரபா

தன்னுடைய முதல் பாடலை அகத்தியனுக்குப் பாடி, படம் வெளிவராமல் இருந்ததோ அதே அகத்தியனின் “காதல் கோட்டை” வழியாக “வெள்ளரிக்கா பிஞ்சு வெள்ளரிக்கா” இவருக்குப் பெரிய புகழைக் கொடுக்கிறது.

பிறகென்ன ஏறுமுகம் தான்.

ராஜன் சக்ரவர்த்தி என்று 

ரஜினி புகழ் பாடல்கள் 

https://youtu.be/bRed4MvIV2E?si=3nm26JIIQh8aKMyd

என்ற தனிப்பாடல் தொகுப்பில் பாடியவர் பின்னாளில் சூப்பர் ஸ்டார் ரஜினிகாந்துக்கே பாடுவேன் என்று நினைத்திருப்பாரா?

“நகுமோ” பாடலை track பாடியவர், ஹரிஹரன் பாடிய இன்னொரு வடிவமும் பதிவாகியது. ஆனால் ரஜினி தேர்ந்தெடுத்தது கிருஷ்ணராஜ் பாடியதையே.

கிருஷ்ணராஜ் பாடிய எண்ணற்ற புகழ்பூத்த பாடல்களில், நான் அடிக்கடி விரும்பிக் கேட்பவை ஐந்து

தேவா இசையில்

“உன்னருகே நான் இருந்தால்”

https://youtu.be/xranbNagWoU?si=m4FAvHIM6uD3LAHn

இதயம் இதயம் இணைகிறதே

https://youtu.be/SVT_HaaVyA4?si=JBtfuWjJ9q4AcpjG

“ஜனவரி நிலவே நலம் தானா”

https://youtu.be/8snzPlRDKjc?si=_6rI6BwDy8yLI6DN

யுவன் ஷங்கர் ராஜா இசையில் 

“ஆம்பளைக்கும் பொம்பளைக்கும் அவசரம்”

https://youtu.be/nXIU8aiB-NM?si=_tPDqBKjdEqIbu_w

“ஐயய்யோ” 

https://youtu.be/uS8Z4nLJ53I?si=O06jyH5MNqZIPEzX

இவரின் பிரிவுச் செய்தியைக் கேட்ட கணம்  “நீ பார்த்துட்டுப் போனாலும்” 

https://youtu.be/DsWdEBZf4Fk?si=PJYUKydtkN7p2lUc

பாடல் தான் மனசுக்குள் ஓடியது. 

கிருஷ்ணராஜ் மகளின் அறிமுகம் கிட்டியதும் அகத்தியன் படத்தில் தான். தேனிசைத் தென்றல் தேவா இசையில் ஜீவரேகா, கார்த்திக் உடன் இணைந்து “ஓவெண்புறா ஒன்று” பாடலைப் பாடியிருக்கிறார்.

தஞ்சாவூரு மண்ணெடுத்து பாடலைக் கூட கிராமியப் பண் பாடும் பாடகருக்காக கிருஷ்ணராஜ் பாடிய ஒத்திகைப் பாடல் தானாம். ரோஜா கம்பைன்ஸ் ஒட்டுமொத்தமாக இதை ஆதரிக்க இதுவே இறுதியானது தான் பின்னாளில் சரித்திரம் படைத்தது.

சிங்கப்பூர் ஜனாதிபதி எஸ்.ஆர்.நாதன் வாழும் காலத்திலேயே அவர் முன்னால் “தேனிசைத் தென்றல்” தேவாவின் தஞ்சாவூரு மண்ணெடுத்து பாடி அவரிடம் பாராட்டுப் பெற்றவர்.

எஸ்.ஆர்.நாதனுக்குப் பிரியாவிடை கொடுத்த பாட்டைப் பாடிய இருவரும் பிரியாவிடை கொடுத்து விட்டனர்.

கானா பிரபா

23.10.2026

Shared post

தேவா இசையில் இயக்குநர் கூட்டு

90 களில் ஒரு வித்தியாசமான கூட்டணி நிகழ்ந்தது. இயக்குநர் P.வாசுவின் கதையை கே.எஸ்.ரவிகுமார் இயக்குவார்.  கே.பாக்யராஜை தன்னுடைய நாயகனாக்கி இயக்குவார் P.வாசு.

இந்த இரண்டு வித்தியாசமான கூட்டணியிலும் பொதுவாக இருந்த இருவரில் ஒருவர் குஷ்பு, இன்னொருவர் தேவா.

செம்பட்டுப்பூவே

வெண்மொட்டுத்தேரே

ஸ்ரீரங்கக் காவிரியே..

பொன் மொட்டு மானே

பூந்தட்டுத் தேனே

பூமியின் தேவதையே..

https://youtu.be/AScsdiUGgUY?si=ePW9Q6KdWxQEhtnN

இலங்கையின் பண்பலை வானொலிகளில் பொற்காலத்தில் அந்தந்த வானொலி நேயர்கள் மட்டுமல்ல, வானொலிப் படைப்பாளர்களாக இருந்தவர்களுக்கும் கூட இந்தப் பாடலைக் கேட்டால் உச்சி குளிர்ந்து விடும், கண்கள் பூத்து விடும்.

“புருஷ லட்சணம்” படத்தில் இடம்பெற்ற அந்தப் பாடல் தேனிசைத் தென்றல் தேவா இசையில் SPB முழுமையாக ஆக்கிரமித்து, சின்னக் குயிலுக்கும் இடம் கொடுத்த அற்புதமான பாடல். 

புருஷ லட்சணம் படம் பி.வாசு கதையில் கே.எஸ்.ரவிகுமார் இயக்கத்தில் ஜெயராம் & குஷ்பு அந்தக் காலத்தில் ஜோடி போட்டு நடித்த வெற்றிச் சித்திரங்களில் ஒன்று. 

“ஒரு தாலி வரம் கேட்டு வந்தேன்”

https://youtu.be/-P9xW2c0owc?si=RdPOqhHYvo0YgUrE

பாடலில் அம்மன் பெயர்களை நிரலிட்டு எழுதிய

கவிஞர் காளிதாசனை மறக்காமல் இன்னும் வைத்திருக்கிறது. 

இப்படிப் பக்தி மயமான சித்ராவுக்கு இன்னொரு ரகளையான பாட்டாக

“அண்ணாசாலை” 

ஈழத்தில் இருந்து இந்தப் பாடலைக் கேட்ட போது சென்னையில் ஃபேமசான றோட்டாம் என்று நண்பர்களுக்குள் பேசிக் கொள்வோம். 😁

“காக்கைச் சிறகினிலே நந்தலாலா” 

https://youtu.be/9Sd3l945lBE?si=WHRsb9EUifFDWw2L

எஸ்பிபி & சித்ரா கூட்டணியில் அற்புதங்களில் ஒன்று. இந்தப் படம் தெலுங்குக்குப் போன போது இந்த மெட்டையும் தேவா பயன்படுத்திக் கொண்டார், ஆனால் “செம்பட்டுப் பூவே” பாடலுக்குப் பதில் வேறொன்று. ஆகவே செம்பட்டு நமக்கு மட்டுமேயானது என்று பெருமையடித்துக் கொள்ளலாம் 😊

ஜெயராம், குஷ்பு பற்றிச் சொல்லும் போது அவர்கள் ஜோடி கட்டிய இன்னொரு படமான “மனசு ரெண்டும் புதுசு” படம் கூட மலையாள இயக்குநர் லோகிததாஸின் மூலகதையை எடுத்து அமிர்தம் இயக்கியது.

இதில் “சோளிக்கே பீச்சே” 

https://youtu.be/K0Ei4lHF6aM?si=Ehi6CpbV67cSiId8

பாடலைத் தமிழுக்குத் தருவித்திருப்பார் தேவா.

“சொர்க்கத்தில் அம்மா”

இந்தப் பெயரில் தான் முதலில் உருவானது பி.வாசு கதை, திரைக்கதை, வசனம் எழுத, திரைக்கதை மன்னன் கே.பாக்யராஜ் நடித்த “அம்மா வந்தாச்சு”

“நந்தினி நந்தினி ஓ நந்தினி”

https://youtu.be/wZ_XzaEw0LI?si=EA8ptHuo7XfzwtYr

மனோகரமான பாட்டு ❤️

“உனக்கொரு தாயிருக்கா” 

https://youtu.be/6poxe3BY-Ak?si=ZgYco-6EEwLpkzMs

சோக ராகம் பாடும்.

“தினத்தந்தி பேப்பரில” 

https://youtu.be/M6_y3gxZLTY?si=gxqAGvjUmaKMSXu4

அந்தக் காலத்தில் ஹிட் அடித்த ஒன்று.

“இது உனக்காகப் பாடும் ராகம்” 

https://youtu.be/2UUBcfsalsE?si=60S583S22FsHt5HS

SPB, சுசீலாம்மா, சித்ரா இணைந்த வித்தியாசமான பாட்டு.

“அம்மா வந்தாச்சு” படத்தை கே.பாக்யராஜின் பூர்ணிமா தயாரிப்பில், பாக்யராஜ், குஷ்பு, ஶ்ரீதேவி விஜயகுமார் நடித்திருந்தார்கள்.

பாடல்கள் அனைத்தையும் கவிஞர் வாலி எழுத, தேனிசைத் தென்றல் தேவா இன்னிசை வழங்கினார்.

இந்த மாதிரி வித்தியாசமான இயக்குநர் கூட்டணி என்று சொல்லும் போது, இயக்குநர் அகத்தியன் கதையில், கே.எஸ்.ரவிக்குமார் இயக்கிய “பொண்டாட்டி ராஜ்யம்” குறிப்பிட வேண்டிய ஒன்று. 

“அணிலுக்கு மூணு கோடு போட்ட ராமரே”

https://youtu.be/D_vXZ2SHmUU?si=SGt_CqAdb438UD-d

என்னவொரு தேனிசைத் தென்றல்

“பொண்டாட்டி ராஜ்ஜியம் தான் நடக்குது”

https://youtu.be/HTNnr_Cg7nQ?si=iD2D53Us-QWKqSjw

SPB மிரட்டுவார் இப்படி “தண்டால் எடுங்கடா”

https://youtu.be/IKwZju7NqAA?si=DU9r-hXu_RqIk4Qm

முன்பே “அதிகாலை சுபவேளை” படத்துக்குக் கொடுத்து அங்கே பயன்படாமல், அதாவது அந்தப் படமே வராமல் இடம் மாறிய 

“ராகம் ஒன்று சுகமானது” 

https://youtu.be/0QaJCsolfFg?si=QQ0G3xx7rMKE9k7v

கேட்டால் சொர்க்க லோகமானது ❤️

சரவணனைக் கச்சிதமான குடும்பத் தலைவராகக் காட்டி ஜனரஞ்சக அந்தஸ்துக் கொடுத்தது “பொண்டாட்டி ராஜ்ஜியம்” 

பின்னாளில் சரவணன் இயக்குநர் அகத்தியனிடம் வேண்டி வாங்கிக் கொண்ட கதை “சந்தோஷம்” ஆனது.

அட இங்கேயும் தேனிசைத் தென்றல் தேவா தான்.

இந்தப் படத்தில் 

“சாமியே ஐயப்பா” 

https://youtu.be/gaKvxng8JXg?si=g8fayih9whAJoidm

தேவா குழுவினர் பாடும் பாடலும்,

சேதுமாதவா உன்னைச் சேர்த்து அணைக்கவா

https://youtu.be/E8pQMjo31sA?si=3b_3DMNgyRX10nvq

உன்னிகிருஷ்ணன், அனுராதா ஶ்ரீராம் குரல்களிலும் இனிக்கும்.

கானா பிரபா

22.10.2026

சக இசையமைப்பாளர்களோடு தேனிசைத் தென்றல் தேவா

நெஞ்சமே நெஞ்சமே

கொஞ்சியே சொல்லுதே 

ஆரீரோ….

தஞ்சமே தஞ்சமே

சொந்தமாய் வந்ததே 

ஆராரிரோ….

இசையமைப்பாளர் ஒருவர் இன்னொரு இசையமைப்பாளரிடம் பாடுவது ஒன்றும் புதுமை அல்ல.

மெல்லிசை மன்னர் எம்.எஸ்.விஸ்வநாதன், இசைஞானி இளையராஜா போன்ற ஜாம்பவான்களோடு நீண்டு செல்லும்.

அந்த இரு சாதனையாளர்களோடு இணைவது பெருமையாகவும் உணர்வார்கள்.

ஆனால், கங்கை அமரனைப் போலவே ஒரு தோழமை உணர்வோடு நெருங்கி அழைத்துப் பாடக் கேட்டிருப்பார்கள் என்றே தேனிசைத் தென்றல் தேவாவை நினைப்பேன்.

“உனக்கென்ன குறைச்சல்

 நீயொரு ராஜா…”

என்று வெள்ளி விழா படத்தில் வி.குமார் இசையில் மெல்லிசை மன்னர் எம்.எஸ்.விஸ்வநாதன் அது போலவே அணுகுவேன் “மாமன்னன்” படத்தில் இசைப்புயல் ஏ.ஆர்.ரஹ்மான் இசையில் “மாமன்னன்” படத்தில் தேவா பாடிய “நெஞ்சமே நெஞ்சமே” பாடலைக் கேட்குந்தோறும்.

ஒரே காலகட்டப் பகுதியில் நடிகர் மணிவண்ணனுக்காக “ஐயா வூடு தெறந்து தான் கிடக்கு” என்று இசைஞானியார் பாடியது போன்ற ஒரு பக்கம், இன்னோர் பக்கம் தேவாவும் அச்சொட்டாகப் பிரதிக் குரலாக “கோகுலத்துக் கண்ணா”, “மனிஷா போலிருப்பாளா” என்று தன் இசையில் பாடியது மட்டுமல்ல, சிற்பி அவர்களின் இசையில் கூட “உதவிக்கு வரலாமா” படத்தில் பாடியிருக்கிறார் அந்தப் பாடல் 

நீதான் நீதான் 

https://www.youtube.com/watch?v=CTQedBBGcno

காதல் மன்னன் படத்தில் “மெட்டுத் தேடித் தவிக்குது” மெல்லிசை மன்னர், “திலோத்தமா” பரத்வாஜ்,  இவர்களோடு “மாரிமுத்து மாரிமுத்து நில்லப்பா” 

https://youtu.be/SrDeTvc-URU?si=cUzl_h6voDyJa1x5

என்று கவலைப்படாதே சகோதரா என்று அஜித் படத்தில் முன்பே அதே சூழலில் கொடுத்த தேவாவையும் களமிறக்கி இருக்கிறார். 

இதே காலகட்டத்தில் இயங்கிய ஆதித்யனும் தேவாவுக்கானது என்று சப்பா சப்பா 

https://youtu.be/-LRl0i9Dh9M?si=XB5c-Zgskw-JCr9g

பாடலை “கலர் கனவுகள்” படத்துக்காகப் பாட வைத்திருக்கிறார்.

இங்கே ஒரு சிறப்பு இருக்கிறது, ஒரு காலத்தில் தேவா பக்திப் பாடல்களுக்கு இசையமைத்த சூழலில் அவருக்காகப் பாடிய கே.பி.சுந்தராம்பாளை நினைவுபடுத்தும் கோவை கமலாவும் இணைந்து பாடியுள்ளார்.

தேவா இசையில் ஹரிஹரன் குரல் தனித்துவமானது. அது குறித்து முழு நீளக் கட்டுரையே வரைந்துள்ளேன். இங்கே ஹரிஹரன், லெஸ்லி,  லூயிஸ் கூட்டணியில் மோதி விளையாடு (மோதி விளையாடு) 

https://www.youtube.com/watch?v=ZP6y3F3GyFA

என்று கூட்டணியில் ஒருவராகப் பாடினார்.

தேவாவின் குரலை வேறு பரிமாணத்தில் கொண்டு போன முக்கியமான பாடல் வரிசை உண்டு.

அதில் வாழ் திரைப்படத்துக்காக பிரதீப்குமார் இசையில் இவர் பாடிய 

Feel Song (வாழ் ) – பிரதீப் குமார்

https://www.youtube.com/watch?v=FoC2wmBcBJM

பாடலைக் கேட்டுப் பாருங்கள். புதுமையாக இருக்கும்.

தேவாவை நீண்ட இடைவெளிக்குப் பின்னர் ஜனரஞ்சகமாக அடையாளப்படுத்தியவர் ஜி.வி.பிரகாஷ்குமார்.  தெறி படத்துக்காக

ஜித்து ஜில்லாடி 

https://www.youtube.com/watch?v=9lkT6HnwCzQ

தெறிக்க விட்டது. பின்னர் கேப்டன் மில்லரிலும் பாட அழைத்தார்.

இளையராஜா தன் புதல்வர்கள் இசையில் பாடியது போலவே தேவாவும் தன் மகன்  ஶ்ரீகாந்த் தேவா  இசையில் “வள்ளியம்மா வள்ளியம்மா” 

https://www.youtube.com/watch?v=uH8zHrPvO2c

பாடலை “தீ” படத்துக்காகப் பாடியிருக்கிறார்.

இளைய தலைமுறை இசையமைப்பாளர்களில் தேவா மீது நேசமும் பாசமும் கொண்டவர் அநிருத். அவரும் மான் கராத்தே படத்தில்

Open The Tasmac 

https://www.youtube.com/watch?v=yJehMbu4MdQ

பாடலுக்காக இவரை அழைத்தார்.

கர்ணன் படத்துக்காக சந்தோஷ் நாரயணன் இசையில்

மஞ்சனத்தி புராணம் 

https://www.youtube.com/watch?v=OQGRugYyvok

இன்னொரு முக்கியமான பாடல். இதில் நாட்டுப்புறத் தெம்மாங்குக் குரலாய் ஒலித்திருப்பார்.

தேவாவுக்கு இன்னொரு அழகான பக்திப் பாட்டு “சாமி குலசாமி” (மூக்குத்தி அம்மன்) – கிரிஷ் கோபாலகிருஷ்ணன்

https://www.youtube.com/watch?v=w4brafYUvc0

ரஹ்மானுக்கு மெல்லிசை மன்னர் குரலுக்குப் பிரதியீடாக தேவாவை நினைத்திருப்பார் போல, “லால் சலாம்” படத்தில் “அன்பாளனே” என்று மீண்டும் அழைத்தார்.

மேலும் தமன், கோபி சுந்தர், ஹிப் ஹாப் தமிழா, ஷான் ரால்டன், ஜிப்ரான் என்று நீண்டு செல்கிறது புதுப் புது இசையமைப்பாளர் இசையில் தேவாவின் குரலில் ஒலித்த பாடல்கள்.

இவ்விதம் நீண்டு செல்லும் பாடகர் தேவா இன்னொருவருக்காகப் பாடிய பாடல்களில் சமீபத்தில் வெளிவந்த ஈழத்துத் திரைப்படம் “போராட்டம்” படத்தில் “சோறு தான் முக்கியம்”

https://www.youtube.com/watch?v=tFxiDagMXuo

என்ற பாடலைத் துள்ளிசையாக ஈழத்து இசை இளவல் மதீசன் இசை வழங்கப் பாடியிருக்கிறார். இன்றைய கணக்கில் தேவா பாடி திரைக்கு வெளிவந்த இறுதிப் பாடல் இதுதான்.

ஒரு “கானா” பாடகரை எல்லாவித பரிமாணங்களிலும் அலங்கரித்துப் பாட வைத்திருக்கிறார்கள்.

அதற்குக் காரணம் அவரது நெகிழ்வுப் போக்கு அவர்தம் குரலிலும் மிளிர்ந்ததே.

❤️❤️❤️

இந்தப் பதிவை இன்று காலை ரயில் பயணத்தில் எழுத வேண்டும் என்று எண்ணிக் கொண்டே இலக்கியாவைப் பள்ளிக்கூடத்துக்கு அழைத்துப் போகும் காரில் ஏறும் போது “நெஞ்சமே நெஞ்சமே” பாடலை முணுமுணுத்தேன். 

“அப்பா! எனக்கு இந்தப் பாட்டுப் பிடிக்கும் காரில் போகும் போது போடுங்கோ” என்றார் இலக்கியா

பிறகென்ன வழி நெடுக 

நெஞ்சமே…நெஞ்சமே… தான்

❤️❤️❤️

அன்பு தான் வெல்லுமே 

எந்த நாளும்

ஒளி எங்கு போகும்

உனை வந்து சேரும்

நெஞ்சமே நெஞ்சமே

கொஞ்சியே சொல்லுதே 

ஆரீரோ…❤️

கானா பிரபா

20.10.2026

தேனிசைத் தென்றல் தேவா சந்திரபோஸ் உடன்

நியாயமாகப் பார்த்தால் தேவா இசையமைப்பாளராகி, அடுத்த ஆண்டுடன் 50 ஆண்டுகள் நிறைவு கொள்கிறது.

இசையமைப்பாளர் சந்திரபோஸ் குடும்பக் கட்டுப்பாட்டு நாடகங்களில் நடிக்கும் போது, அவரோடு தேவாவின் அறிமுகம் அமைகின்றது. போஸஸ் – தேவா இரட்டையரின் மெல்லிசைக் குழு பிறக்கிறது.

தென்னிந்தியாவின் “லஷ்மிகாந்த்- பியாரிலால்" என்ற அடைமொழியோடு மேடைக் கச்சேரிகள் மட்டுமல்ல, மேடை நாடகங்கள், வானொலி நாடகங்கள் என்று இருவரும் இசையமைத்துப் புகழீட்டுகிறார்கள்.

அடுத்த கட்டமாக திரைப்படங்களில் இசையமைப்பாளராக வாய்ப்புத் தேடும் போது, இயக்குநர் வி.சி.குகநாதன் அறிமுகம் கிட்டவும், அவர் ஒன்றல்ல இரண்டு அடுத்தடுத்து வாய்ப்புகளை இருவருக்கும் வழங்குகிறார். அதில் ஒன்று தான் “மதுர கீதம்", இன்னொன்று “மச்சானைப் பார்த்தீங்களா”. இந்த இரண்டு படங்களின் பாடல் மெட்டு உருவாக்கத்தில் (composing) தேவாவும் இணைந்தே பணி புரிந்தார். 

ஆனால் சந்திரபோஸுக்கோ நடிப்பின் மேல் தீராத ஆசை, அவரை நம்பி எப்படி முழுதாகத் திரைத்துறையில் இறங்குவது என்ற அவ நம்பிக்கையில் தூரதர்ஷனில் சேர்கிறார் தேவா.

இது குறித்து அவர் சந்திரபோஸ் பிறந்த நாள் சிறப்பு நிகழ்வில் வழங்கிய பகிர்வைப் பார்க்க

https://www.youtube.com/watch?v=6Oh0YQpDQ9A

தேவா இசையில் சந்திரபோஸ் “தாமரை” படத்துக்காக “அத்திமரம் பூத்ததே” 

https://www.youtube.com/watch?v=lP8iqYflHj4

பாடலைப் பாடியிருக்கிறார்.

கிட்டத்தட்ட பத்தாண்டுகளுக்கும் மேலாக தமிழ் சினிமாவில் சந்திரபோஸ் முதலில் (80 களில்)  அடுத்து தேவா (90 களில்) என்று இயங்க வைத்தது. 

ஒளிப்படங்கள் நன்றி : கலைமாமணி சந்திரபோஸ் தளம்

கானா பிரபா

19.10.2026

சிங்கீதம் முதல் சிங்கீதம் வரை

இந்திய சினிமாவின் மிக முக்கியமான படைப்பாளியாக விளங்கிய சிங்கீதம் சீனிவாசராவ் தனது 95 ஆவது வயதில் அக்டோபர் 3 ஆம் திகதி மறைந்து விட்டார். திரைப்படத் துறையில் 71 வருடகாலம், 54 வருடங்களாக இயக்குநர் என்று வாழ்ந்து தன் வாழ்க்கையை அர்த்தப்படுத்தியிருக்கிறார்.

கமல்ஹாசன் & சிங்கீதம் சீனிவாசராவ் கூட்டணியைப் பாருங்கள், Sommokadidhi Sokokadidhi (தமிழில் இரு நிலவுகள் என்று வெளிவந்தது), ராஜ பார்வை, புஷ்பக் (பேசும் படம்), அபூர்வ சகோதரர்கள், மைக்கேல் மதன காமராஜன், காதலா காதலா, மும்பை எக்ஸ்பிரஸ் மற்றும் மகளிர் மட்டும் என்று ஒவ்வொன்றும் தனி ரகம். 

சிங்கீதம் சீனிவாசராவ் இயக்கி இந்த ஆண்டு வெளிவந்த இறுதிப் படமான சிங்கீதம் கூட ராஜபார்வை காலத்தில் அதாவது 45 வருடங்களுக்கு முன்னர் கமல்ஹாசனிடம் சொல்லப்பட்ட கதை. அதை இப்போது எடுத்து முடித்து நிறைவு கண்டார்.

தொண்ணூறுகளுக்கு முன்பெல்லாம் கமல் படங்களின் இயக்குநர் சிங்கீதம் சீனிவாசராவ் என்று காணும் போது கமல் தான் புனைப்பெயரில் விளையாடுகிறாரோ என்று எண்ணுவதுண்டு.

“அபூர்வ சகோதரர்கள்” படத்தில் ஒரு பரபரப்பான காட்சி.

அப்பு கமல் செய்த கொலைகளுக்காக ராஜா கமல் துரத்தப்படும் காட்சி. அப்போது தான் தன்னுடைய மறுபிள்ளை வளர்ந்து ஆளாகியிருப்பதைத் தாய் ஶ்ரீவித்யா கண்டு உணர்ச்சி மேலிடுகிறார்.

இந்தக் காட்சியை கமல்ஹாசன் விபரித்ததும் “ஆகா அட்டகாசமான செண்டிமெண்ட் சீன் அகப்பட்டுடுதுடா” என்று கமலின் உசுப்பேற்றலில் கிட்டத்தட்ட 15 பக்க வசனக் காட்சியாக கிரேஸி மோகன் எழுதித் தள்ளிவிட்டாராம். அதைச் சும்மா படிக்கவே ஏழெட்டு நிமிடங்கள் பிடிக்கும்.

படத்தின் இயக்குநர் சிங்கீதம் சீனிவாசராவ் முன் கமல் அந்தக் காட்சியை ஒத்திகை காட்டுகிறார். எல்லாவற்றையும் பார்த்து விட்டு மெல்லச் சிரித்து விட்டுச் சொன்னாராம்,

“கமல் ! உங்களுக்கு இந்தக் காட்சிக்காக 30 sec அல்லது

போனாப்போகுது அதிகபட்சம் ஒரு நிமிடம் தர்ரேன்” 

போய் வேற மாதிரிச் சிந்திச்சுட்டு வாங்க”

என்று சொல்லி அனுப்பி விட்டார் சிங்கீதம்.

கமல் குழுவினருக்குப் படு ஏமாற்றம். வேண்டா வெறுப்பாக மாற்றியமைத்தது தான் இப்போது திரையில் காணும் காட்சி. அதில் தாய் ஶ்ரீவித்யா & மகன் ராஜா கமல் சந்திக்கும் காட்சி அதிகபட்சம் 30 விநாடிகள் தான்.

இந்தச் சம்பவத்தை கமல்ஹாசனோடு  அந்தக் காலத்தில் இணைந்து பணியாற்றிய திரு ராசி அழகப்பன் அவர்கள் குறிப்பிட்டிருப்பார்.

ராஜாஜியின் கதையில் திக்கற்ற பார்வதி, கமல்ஹாசனின் ராஜபார்வை. பேசும் படம் என்று தமிழில் வெளியான, வசனம் ஏதும் இல்லாமல் எடுத்த கன்னடப் படமான புஷ்பக விமான , கால் ஊனமுற்ற பெண் நடனத்தில் சாதிக்கும் மயூரி, அபூர்வ சகோதரர்கள், கால இயந்திரத்தில் கிருஷ்ண தேவராயர் என்ற மன்னன் காலத்துப் பயணிக்கும் ஆதித்யா 369, கார்ட்டூன் சித்திரமான Ghatothkach போன்ற படங்களின் வழியாக சிங்கீதம் இந்திய சினிமாவின் முக்கிய அடையாளமாக அறியப்படுகிறார்.

ஒரு கலைப்படைப்பாளி தான் வாழும் காலத்திலேயே தன்னுடைய படைப்புலக அனுபவத்தைக் காணொளி வழியாக ஆக்கித் தந்த வகையில் மிகச் சொற்பமான பகிர்வுகளே இருக்கின்றன.

சிங்கீதம் சீனிவாசராவ் தன்னுடைய வாழ்வியல் அனுபவங்களைத் தனக்கென ஒரு பிரத்தியோகத் தளத்தில் பகிர்ந்திருப்பது.

ஒன்றல்ல இரண்டல்ல மொத்தம் 53 பாகங்கள். எப்பேர்ப்பட்ட அசுர முயற்சி இது.

கதாசிரியர், இயக்குநர், தயாரிப்பாளர், பாடலாசிரியர், இசையமைப்பாளர், ஒரு நடிகர் என்று பன்முக ஆளுமையாகத் திகழ்ந்தவர்.

நான் இசையமைக்கும் படத்துக்கு நீங்கள் தான் இசை ஒருங்கமைப்பாளராக இருக்க வேண்டும் என்று இளையராஜாவிடம் ஒரு சமயம் சொல்லி இருக்கிறார் சிங்கீதம்.

1986 ஆம் ஆண்டு கன்னட சூப்பர் ஸ்டார் ராஜ்குமார் படத்தை இயக்கியதோடு படத்தில் இசையும் சிங்கீதம் தான்.

அந்தப் பரபரப்பான காலத்திலும் இளையராஜா வந்து சிங்கீதம் படத்தின் இசை ஒருங்கமைப்பாளராக/ நெறியாளராக (conductor)

தான் முன் சொன்ன வாக்குறுதியை நிறைவேற்றுகிறார். 

அந்தப் படம் தான் “பாக்யலஷ்மி பரம்மா” .

இப்படித்தான் வாழ்ந்து முடிக்க வேண்டும் என்று சொல்லி வைத்த மனிதர்களில் புது உதாரணம் நம் சிங்கீதம்.

அந்தக் குறும்புப் புன்னகையும், இடிச் சிரிப்புமாக சிங்கீதம் நம் மனதில் நிறைந்திருப்பார்.

கானா பிரபா

04.10.2026

இளையராஜா எனும் பிரமிப்பு ❤️ மலையாள தேச இயக்குநர் சத்யன் அந்திக்காட்

 

இளையராஜா எனும் பிரமிப்பு  ❤ 

மலையாள தேச இயக்குநர் சத்யன் அந்திக்காட் வாய்மொழியில் இருந்து

நான் இயக்குநராகத் தொடங்கியதில் இருந்தே இளையராஜாவைக் கொண்டு ஒரு படத்திற்காவது இசையமைக்க வைக்க வேண்டும் என்பது என் மனதிலிருந்த ஆசை. அது எட்டாத உயரத்தில் உள்ள ஒரு கனவு, அது சாத்தியப்படாது என்றுதான் நினைத்திருந்தேன்.   

'கொச்சு கொச்சு சந்தோஷங்கள்' படம் வந்தபோது, இளையராஜாவை வைத்துப் பண்ணலாம் என்று நினைத்து, பாசில் மூலமாகப் பரிந்துரைக்கச் செய்துதான் நான் ராஜா சாரைப் பார்க்கச் சென்றேன். 

அவர் என்னைக் கூப்பிட்டு உள்ளே அழைத்தார். 

உள்ளே கம்போசிங் அறையில் நாற்காலிகள் எதுவும் இல்லை. உட்காருவதற்காகப் பாய்கள் மட்டுமே இருந்தன. அவரிடம் நான் சிரமப்பட்டு எனக்குத் தெரிந்த தமிழில் கதையை விவரிக்கத் தொடங்கினேன். 

அவர், "மலையாளத்திலேயே சொன்னால் போதும், எனக்கு மலையாளம் தெரியும், மலையாளத்திலேயே பேசுங்கள்" என்று கூறினார்.   

நான் என் மனைவி நிமியிடம் சொல்லியிருந்தேன், கம்போசிங்கிற்குப் போகிறேன், வழக்கமாக ஒரு வாரம் அல்லது இரண்டு வாரங்கள் கழித்துத்தான் வருவேன்; படத்தில் 5 பாடல்கள் இருக்கின்றன என்று.   

இளையராஜா சார் சூழலைக் கேட்டுக்கொண்டே வேறு ஏதோ வேலை செய்வது போலத் தோன்றும். ஜெயராம் மற்றும் அந்தப் பெண் இருக்கும் காட்சிக்கு இந்த டியூன் செட் ஆகுமா என்று கேட்டார். அந்தச் சூழலுக்கு 4-5 டியூன்களை மாற்றி மாற்றிப் போட்டுக் காட்டினார். அடுத்த பாடலையும் உடனே செய்துவிட்டார்.   அதாவது 9:30 மணிக்கெல்லாம் 5 பாடல்களின் கம்போசிங்கும் முடிந்துவிட்டது! 

நான் அதிர்ந்துபோனேன். 

நான் வெளியே வந்து பாசிலை அழைத்து, "எனக்கு ஒரு சிறிய சந்தேகம் உள்ளது. நான் இளையராஜாவின் தீவிர ரசிகன் என்பதால் அவர் போடும் டியூன்கள் எல்லாம் எனக்குப் பிடித்துள்ளதா, அல்லது உண்மையிலேயே நன்றாக இருக்கிறதா? என்று.

 9:30 மணிக்கெல்லாம் 5 பாடல்களும் முடிந்துவிட்டதே" என்றேன். 

அதற்கு பாசில், 

"9:30 மணி வரை எடுத்தாரா? வழக்கமாக ஒரு மணி நேரத்திலேயே 5 பாடல்களையும் முடித்துவிடுவாரே!" 

என்று கேட்டார். 

இப்படியாக சத்யன் அந்தக்காட் இசைஞானி இளையராஜாவுடன் தன் முதல் பாடல் பதிவு அனுபவத்தைப் பகிர்ந்து கொண்டார்.

https://www.facebook.com/reel/2224684808061504

கானா பிரபா

மூலக் காண்பகிர்வு இணைப்பில் உள்ளது. தமிழில் பிரதியாக்கித் தந்திருக்கிறேன்.

இந்தப் பாடல்கள் இடம்பெற்ற கொச்சு கொச்சு சந்தோஷங்கள் பாடல்களைக் கேட்டுப் பாருங்கள் அற்புத அனுபவம்.

https://www.youtube.com/watch?v=OZvt6u95L_Y

சிறந்த படம்,  நடனம் ஆகியவற்றுக்கானதேசிய விருதையும் அள்ளியது.

வேகமாக வேலை செய்வது மட்டுமல்ல, அங்கே விவேகமாகவும் பிரமிப்பூட்டும் விதத்திலும் அற்புதமான பாடல்களைப் பிறப்பாக்கித் தருவதுதான் இசைஞானி என்ற அதிசயம்.

மக்களே சந்தோஷப்படுங்கள், கொண்டாடுங்கள் ! 

இப்படியொரு அபூர்வமான இசைப்பிறவி வாழும் காலத்தில் நாமும் இருக்கிறோம் என்று.

கானா பிரபா

02.102026

இசைஞானி இளையராஜாவின் காதல் ரோஜாவே

 "இளவேனில் இது வைகாசி மாதம்" காதல் ரோஜாவே படப் பாடலைத் தான் மனசு முணுமுணுத்தது, சாய் வித் சித்ராவில் நடிகை ஷீலாவின் பேட்டி வருவது தெரிந்ததும்.

ஷீலா - ரவிச்சந்திரன் ஜோடியின் மகனான ஜார்ஜ் விஷ்ணுவோடு, பின்னாளில் கமல்ஹாசனோடு விஸ்வரூபம் எடுத்த பூஜாவின் அறிமுகப் படம்.  இசைஞானி இளையராஜா இசையில் 1997 இல் ஆஸ்கார் மூவீஸ் இயக்குநர் எம்.பாஸ்கரின் குடும்பத் தயாரிப்பில் கேயார் இயக்கம் என்று ஏகப்பட்ட நட்சத்திரம் இருந்தாலும் காதல் ரோஜாவே மூன்று வருட இழுபாட்டில் தான் வெளியே வந்து வாடிப் போனது.

பத்துப் பாடல்களும் பலாச்சுளைகள். நினைத்த வரம் கேட்டு, இளவேனில் இரண்டும் முன்னிற்கும் ரகம்.

https://www.youtube.com/watch?v=7cc4PujeX78

இதற்கு முன் தன் வாரிசு விஜய் ஐ வைத்து ஒரு படம் தயாரிக்கச் சொல்லி எஸ்.ஏ.சந்திரசேகர் வேண்டவும், அவரையே இயக்குநராக்கி பாஸ்கர் தயாரித்த திரைப்படம் "விஷ்ணு". ஆனால் அந்தப் பட அனுபவம் கொடுத்த கசப்பை குமுதத்திலும் பகிர்ந்து கொண்டார் பாஸ்கர்.

இன்னொரு வாரிசைக் களத்தில் இறக்கிக் காட்டுவோம் என்று நினைத்தார் போல. ஆனால் காதல் ரோஜாவே படமும் அவருக்குக் கை கொடுக்கவில்லை.

நடிகை ஷீலா & பிரேம் நஸீர் ஜோடி 100+ படங்கள் ஜோடியாக நடித்து சாதனை படைத்தவர்கள். ஷீலாவின் மகன் ஜார்ஜ் விஷ்ணு போலவே பிரேம் நஸீர் மகன் ஷா நவாஸ் கூடத் தம் பெற்றோர் அளவுக்குப் பெரிய அளவில் எடுபடாதது காலத்தின் தீர்ப்பு.

தன்னுடைய மூன்று மகள்களை எப்படிக் கரை சேர்ப்பேன் என்று பத்திரிகையாளர் மதி ஒளி சண்முகம் தன்னுடன் பேசும் போது குறைப்படவும், அவரைத் தயாரிப்பாளராக்கி, தானே நிதி ஏற்பாட்டைச் செய்து ஷீலா இயக்கி நடித்த படம் தான் யக்‌ஷ கானம். இதை சாய் வித் சித்ராவில் குறிப்பிட்டிருக்கிறார்.

அந்தப் படம் தான் ஆயிரம் ஜென்மங்கள் என்று சூப்பர் ஸ்டார் ரஜினியின் ஆரம்பங்களில் முக்கிய படமாக அமைந்தது.

சமீபத்தில் ஜென்ஸீ கிட்ஸ் ஊடகர் ஒருவர் தர்மன் படத்தில் தான் ரஜினி டாக்டர் வேடம் ஏற்று நடிக்கப் போகிறார் என்று இந்த வரலாறு தெரியாமல் போட்டிருந்தார்.

எனக்குப் பேய்ப் பயம் வந்து, அந்த ஏரியாப் படங்களே பார்க்கக் கூடாது என்று முடிவெடுக்க வைத்தது, என் சின்ன வயசில் நியூ விக்ரேர்ஸ் இல் வீடியோ கேஸட் காலம் வந்த புதிதில் அண்ணன்மார் இந்தப் படத்தை அப்பப்பா வீட்டில் போட்டுக் காட்டிக் கிலி கொள்ள வைத்ததுதான்.

தன்னுடைய "சிகரங்கள்" கதையைக் கூட பஞ்சு அருணாசலம் உரிமை பெற்று "ருசி கண்ட பூனை" படமாக எடுத்ததை சாய் வித் சித்ராவில் பெருமையோடு நினைவுகூர்ந்தார் ஷீலா.

மதி ஒளி சண்முகம் குறித்து எனக்கு ஸ்பெஷலாகப் பிடிக்கக் காரணம், இளையராஜாவின் குரு நாதர் ஜி.கே.வெங்கடேஷ் இசையில் நெஞ்சில் ஒரு முள், காஷ்மீர் காதலி ஆகிய இரண்டு படங்களை இயக்கி இருக்கிறார்.

இரண்டு படங்களின் பாடல்களுமே பூந்தி லட்டுகள்.

அட இளையராஜாவில் ஆரம்பித்து ஜி.கே.வெங்கடேஷில் முடிக்க வைத்திருக்கிறதே இந்தப் பதிவு :-)

கானா பிரபா.

உன்னைத் தொட்டு என்னைத் தொட்டு போனவனைப் பார்த்தியா

பாடல் வெளிவந்த போது ஒரு தடவை கேட்டு விட்டு, இன்று தான் மீண்டும் மூன்று சுற்றுப் போய் வந்தேன்.

ஆசையைக் காத்துல தூதுவிட்டு தூவல் இருப்பதை ராஜாவின் ஜென்ஸீ கிட்ஸ் வெறியர்களே கண்டு பிடித்தாலும், அந்த இழையை வைத்துக் கொண்டு அவர் இசையிலும், பாடல் மெட்டிலும் கொடுக்கும் புதுமை அதகளம்.

பிரியா ஜெர்சன் தன்னுடைய சூப்பர் சிங்கர் காலத்திலேயே மோகக் குரல் பாடல்களால் பிரபலமானவர், அவரோடு தீப்தி சுரேஷ், ஶ்ரீஷா விஜயசேகர் இணைந்து பாடிய பாடல். ஶ்ரீஷா தொடர்ந்து ராஜாவின் இசைமேடைகளில் பயணிக்கிறார்.

இந்தப் பாட்டு வேக நடையில் போகும் போதும் "கண்ணமா" என்று வரும் போது ஒரு நெகிழ்வானதொரு இறக்கம் கொடுத்துத் தளர்த்தி விடுகிறார் இசைஞானி.

பாட்டு முடியும் போது "நான் போகும் பாதைகள்" வருமிடத்தில் அச்சொட்டான ஸ்வர்ணலதாக் குரல், தீப்தி அல்லது ஶ்ரீஷாவாக இருக்கலாம்.

"ஆசையைக் காத்துல" பாடல் மீளுருவாக்கத்தில் 

ஸ்ருதி ஹாசன் பாடிய "ஷமிதாப்" பாட்டு

Stereophonic Sannata 

https://www.youtube.com/watch?v=o0PFiyuhRz4

அட்டகாஷ் மேற்கத்தேய விருந்து படைத்திருக்கும்.

மோகன்பாபு மகள் லஷ்மி மஞ்சு இயக்கிய படத்தில் ஶ்ரீவர்த்தினி பாடிய Gundello Godari படத்தின் 

"ராத்திரி நேரத்து"

https://www.youtube.com/watch?v=WdhgPpm2384

பாடலாகவும் வெளிவந்தது குறிப்பிடத்தக்கது.

ஆனந்த் - மிலிந்த் இரட்டையர்கள் வழக்கம் போல உருவிப் போட்டிருக்கிறார்கள் இப்படி https://www.youtube.com/watch?v=sKX7r0OcNK4

"ஆசையைக் காத்துல" பாடலைப் போலவே வேண்டியிருப்பார் கார்த்திக் சுப்பாராஜ் போல. ஏனெனில் இந்தப் பாடலின் ஒளியோட்டத்திலும் ஜானி ரஜனியின் சுவர் அலங்காரங்கள்.

அது மட்டுமல்ல தளபதி ஒலிப்பேழை, ராக்கம்மா கையத்தட்டு சுவர் அலங்காரம் என்று

இசைஞானி இளையாராஜா & சூப்பர் ஸ்டார் ரஜினிகாந்த் இருவர் மேலும் வெறித்தனமான ஒரே ரசிகர் எப்படி இருப்பாரோ அப்படிக் கொடுத்திருக்கிறார் கார்த்திக். 

இம்மட்டுக்கும் ரஜினியை வைத்து பேட்டையை இயக்கியும் கூட ரஜினி மீதான ரசிக நேசம் எள்ளளவும் குறையவில்லைப் போல.

ஆக, கார்த்திக் சுப்பராஜ் ரஜினியை வைத்து ஒரு படத்தை இயக்கி, அதற்கு இசைஞானி பாட்டுப் போட்டால் பட்டாசாக இருக்கும் போல.

கானா பிரபா

25.09.2026

கங்கை அமரன் எனும் பன்முகம்

கங்கை அமரன் எனும் பன்முகம்'

தன் ஆத்ம நண்பன் எஸ்.பி.பாலசுப்ரமணியம் அவர்களது ஆறாவது நினைவு தினத்தில், கங்கை அமரனின் திரைப்படமான “லெனின் பாண்டியன்” வெளியாகின்றது.

ஒரு முழு நீள நடிகராக அவருக்கு இது புது அவதாரம் அல்ல, “ஏற்கனவே ஆர்யா சூர்யா’ என்ற படத்தில் நகைச்சுவைப் பாத்திரத்தில் நடித்திருக்கிறார்.

இசையமைப்பாளர் கங்கை அமரன் என்ற அடையாளத்தோடே “பயணங்கள் முடிவதில்லை”, “இதயம்", "பிரம்மா", “ஜோடி", “பாட்டுப்பாடவா”, “உள்ளம் கொள்ளை போகுதே”, “கண்டு கொண்டேன் கண்டு கொண்டேன்", “உன்னிடத்தில் என்னைக் கொடுத்தேன்" ஆகிய படங்களில் சிறப்புத் தோற்றத்தில் வந்திருக்கிறார். இதுவும் ஒரு புதுமையான சாதனை இல்லையா?

ஒரு கதாநாயகனாக நடிக்க வேண்டிய “புதிய வார்ப்புகள்” வாய்ப்பை இவர் மறுத்ததும், அது கே.பாக்யராஜுக்குப் போய்ச் சேரவும், 

அவருக்குப் பின்னணிக் குரல் கொடுத்த வகையில் பின்னணிக் குரல் கலைஞராகவும் கங்கை அமரனுக்கு இன்னொரு அவதாரம்.

செந்தூரப் பூவே செந்தூரப் பூவே……. பாடலைக் கேட்டு முடித்தாலோ அல்லது இந்தப் பாடலை நினைத்தாலோ கூட மனம் செந்தூரப் பூவே…. செந்தூரப் பூவே…. என்று தான் கூவும். 

பாடலாசிரியாரக கங்கை அமரனுக்கும் 16 வயதினிலே தான் பிறப்பு. தன் 30 வயதினிலே தொடங்கிய ஓட்டம், இதோ 50 ஆண்டுகளைத் தொடப் போகின்றது. 

இளையராஜாவின் இசைக்கு தேசிய அங்கீகாரம் கிட்டிய எஸ்.ஜானகிக்கு முதல் தேசிய விருதை "செந்தூரப்பூவே செந்தூரப் பூவே சில்லென்ற காற்றே" என்று தேன் கவியைக் குழைய விட்டு அண்ணனுக்குப் பெருமை சேர்த்தார் கவிஞர் கங்கை அமரன்.

“மாலை வரும் அந்த நாளை உரைத்திடுங்கள் 

சாலை வழியெங்கும் பூவை இறைத்திடுங்கள்”

தன் பாடல்களில் கொடுஞ்சொல் வராமல் பார்ப்பேன் என்பார் தன்னம்பிக்கையோடு பாடலாசிரியர் கங்கை அமரன்.

இளையராஜாவின் ஆரம்ப காலப்படங்களில் "பத்ரகாளி" உட்பட இசை உதவி அமர்சிங் என்றே இருக்கும். ஆனால் அந்த அமர்சிங் என்ற கலைஞன் வெறும் நார் அல்ல அவரும் சிறந்ததொரு படைப்பாளி என்பதை நிரூபித்தது அவர் தனியாக நின்று தன்னை வெளிக்காட்டிய போது. ஆமாம் கங்கை அமரன் என்று பேர் வைத்த முகூர்த்தமோ என்னவோ இவருக்கும் ஒரு தனித்துவம் கிட்டியது 

அமர்சிங் என்ற கங்கை அமரன் அடிப்படையில் நல்லதொரு இசைக்கலைஞன், தன் அண்ணன்மார் பாவலர் வரதராஜன், ராசய்யாவோடு ஊர் ஊராய்ப் போய்ப் பாட்டுக் கட்டியவர். ஆரம்பத்தில் பெண் குரலுக்குப் பொருத்தமாக ராசய்யாவின் குரல் பவனி வந்து கொண்டிருந்து ஒரு கட்டத்தில் அவரின் குரல் நாண் ஆண் சுருதி பிடித்தபோது பெண் குரலுக்கு அடுத்த ரவுண்ட் கட்டியவரே இவராம்.

“இசைக்கவோ நம் கல்யாண ராகம்.....”

இந்தப் பாடலை இலங்கை வானொலிக் காதலர்கள் மறக்க மாட்டார்கள். கங்கை அமரன் இசையமைப்பாளராக உருவெடுத்த காலத்தில் வந்த ஆரம்பப் படங்களில் ஒன்று “மலர்களே மலருங்கள்”. விஜயகாந்த், ராதிகா, சுதாகர் என்று நிறம் மாறாத பூக்கள் படத்தின் நடிகர்கள் கூட்டத்தோடு (ஆயிரம்) மலர்களே மலருங்கள் என்று தலைப்பு ஈறாகக் கவர்ந்த படம் ஆனால் ரசிகர்களைக் கவராது பெட்டிப் பாம்பாய் அடங்கிப் போனது. ஆனாலும் பாடல்களைச் சுளை சுளையாகக் கொடுத்திருந்தார் கங்கை அமரன்.

“மலர்களே மலருங்கள்” படத்தைச் சொல்லும் போது கங்கை அமரனுக்கு முதலில் வாய்ப்புக் கிட்டிய “மலர்களிலே அவள் மல்லிகை” படத்தையும் சொல்லி வைக்க வேண்டும். இதுதான் கங்கை அமரன் இசைத்த முதல் படம். ஒரு தயாரிப்பாளரிடம் மலேசியா வாசுதேவன் கங்கை அமரனைப் பரிந்துரைத்து அந்தப் பட வாய்பைப் பெற்றுக் கொடுத்ததை கங்கை அமரன் வேடிக்கையாகப் பேட்டியில் பகிர்ந்திருக்கின்றார்.

ஆனால் வெளிவராத பாவத்தால் “விடுகதை ஒரு தொடர்கதை” படம் அந்த லாபத்தைப் பெற்றுக் கொண்டது.

“சோலை புஷ்பங்களே என் சோகம் சொல்லுங்களேன்”

சுசீலாம்மாவோடு பாடும் கங்கை அமரன் ஆற்றொழுக்கான பாடகர் என்பதை இன்று வரை கெடாத அவரின் குரல் வளம் நிரூபிக்கும்.

கங்கை அமரனுக்குக் கிடைத்த பெரும் வரப்பிரசாதம் அவரைப் பாடலாசிரியராகப் பெரும்பாலான இசையமைப்பாளர்கள் பயன்படுத்தியது போலவே இளையராஜா தொட்டு, பல்வேறு இசையமைப்பாளர்களின் இசையிலும் பாடிய மகத்துவம் பெறுகிறார்.பதிவு கானா பிரபா

ஐந்து பாடல்களை வைத்து எப்படியாவது கதை பண்ணி விடலாம் என்ற கதைக்கே இடமில்லை. கோழி கூவுது தொடங்கி தன் ஒவ்வொரு படங்களிலும் கதையம்சத்திலும் கூடத் தன் முத்திரை பதிப்பார் கங்கை அமரன்.

இயக்குநராக கங்கை அமரன் தன் பயணத்தைத் தொடங்கி 40 ஆண்டுகள் கடந்து விட்டது.

பிரபுவை பொழுது விடிஞ்சாச்சு, கும்பக்கரைத் தங்கையா, சின்னவர் ஆகிய படங்களை இயக்கியவர்.

இன்றைக்கும் கிராமியப்படங்கள் வந்து கொண்டு தானிருக்கின்றன, ஆனால் கிராமியம் என்றாலே "செண்பகமே செண்பகமே" என்று முணுமுணுக்கும் எண்பதுகளின் திரைப்பிரியர்களைத் தாண்டி எல்லார் மனசலும் இருக்கிறான் "எங்க ஊரு பாட்டுக்காரன்" . கோழி கூவுது படத்தின் பெரு வெற்றியை கங்கை அமரனாலேயே ஜீரணிக்க முடியாமல் தடுமாறித் தோல்விப்படங்களாகக் கொடுத்தவருக்கு பாட்டுக்காரன் மீண்டும் கைதூக்கி உயர்த்தி விட்டான். பிரபல தயாரிப்பாளர் சங்கிலி முருகன் தயாரிப்பில் வந்த அந்தப் படத்தில் ராமராஜனின் தலையெழுத்தை மாற்றியது.

ராமராஜன் இயக்குநராக இருந்த போதும் அவருக்கு கங்கை அமரன் இசையமைப்பாளராக இயங்கினார் என்பதும் புதுமையானதொரு தொடர்பு.

"செண்பகமே செண்பகமே" பாடல் பாடாத தமிழ் பேசும் ஊர்களே இல்லை என்றாகிவிட்ட பின்னர் அதே தலைப்பில் மீண்டும் கங்கை அமரன், ராமராஜன் இணைந்த படம். பதிவு கானா பிரபா

ஒரு வருடம் ஓடி மிகப் பெரும் சாதனையைக் கொடுத்தது இசைஞானி இளையராஜா இசையில் கங்கை அமரனுடன், ராமராஜன் இணைந்த"கரகாட்டக்காரன்". 

இயக்குநராக விஜயகாந்த், பிரபு, ராமராஜன் போன்ற முன்னணி நட்சத்திரங்களோடு இணைந்து வெற்றிப் படங்கள் கொடுத்த வகையிலும் தனி முத்திரை பதித்தார்.

அண்ணனுக்கு ஜே உட்பட அவர் இயக்கிய மற்றைய படங்கள் எதிர்பார்த்த வெற்றியைப் பெறாவிட்டாலும் இன்றும் பார்த்து ரசிக்க வைக்கும் தரம் கொண்டவை.

இன்னும் அவரின் பணிகளை விரித்துச் சொல்ல வேண்டுமென்றால் சின்னத்திரை நிகழ்ச்சி நெறியாளராகவும் தொடர்ந்தவர்.

பாடலாசிரியர், இசையமைப்பாளர் என்ற அவதாரங்களோடு ஒரு இயக்குநராகவும் தன்னை வெற்றிகரமாக நிலை நிறுத்திக் கொண்டவர் கங்கை அமரன்.

அவர் அளவுக்கு பன்முகத்தோடு பணியற்ற இன்னொருவர் வரலாம் ஆனால் அவர் அளவுக்கு அந்த நேர்த்தியை எதிர்பார்க்க முடியாது.

அதுதான் கங்கை அமரன் எனும் பன்முகத்தின் தனித்துவம்.

கானா பிரபா

25.09.2026