Pages

Friday, December 2, 2022

யுகபாரதி


"பல்லாங்குழியின்

வட்டம் பார்த்தேன் 

ஒற்றை நாணயம் 

புல்லாங்குழலின்துளைகள் 

பார்த்தேன் 

ஒற்றை நாணயம்"

https://www.youtube.com/watch?v=ppU1JFRRbx8

எஸ்.ஏ.ராஜ்குமாரின் இசை வண்ணத்தில் என்னவொரு அழகான ஆரம்பத்தோடு தொடங்கினார் யுகபாரதி பாருங்கள்.

“ஆனந்தம்” படத்தில் ஐவரோடு ஒருவரானவர், வித்யாசாகரின் பாண்டவர் அணியிலும் தவறாது பயணித்து இன்று 20 ஆண்டுகளைக் கடந்து 1000 க்கும் மேற்பட்ட பாடல்களில்

தன் தனித்துவத்தை நிறுவிக் கொண்டே பயணிக்கிறார்.

"ஒரு கதாபாத்திரத்தின் தன்மையை முழுக்க உள்ளுணர்ந்து, அதன் பிறகு அந்தக் கதாபாத்திரமாகவே மாறி, அவனுடைய உடல் மொழி என்ன, அவனுடைய அறிவு மட்டம் என்ன, அவனுடைய சிந்தனையின் எல்லை என்ன என்பதை உணர்ந்து அதன் வழி பாட்டு எழுதுவார்"

இப்படியாகப் பாடலாசிரியர் யுகபாரதி குறித்து டி.இமான் சாய் வித் சித்ராவில் குறிப்பிட்டார். இந்தக் கூற்றை நியாயப்பட்டுத்த, யுகபாரதி அவர்கள் பாட்டெழுத்திய எல்லா இசையமைப்பாளர்கள், பாடல்கள் என்று ஒரு சுற்று சுழன்று விட்டு வந்தால் கச்சிதமாக ஒட்டிக் கொள்ளும்.  

அற்றைத் திங்கள் வானிடம்

அல்லிச் செண்டோ நீரிடம்

சுற்றும் தென்றல் பூவிடம்

சொக்கும் ராகம் யாழிடம்

காணுகின்ற காதல்

என்னிடம்

நான் தேடுகின்ற யாவும்

உன்னிடம்

https://youtu.be/e8UR4e_phMM

இந்தப் பாடலில் தொடங்கி யுகபாரதியின் வரிகளைக் காதலித்துக் கொண்டே இருக்கிறேன்.

"ஜெய் பீம்" படத்தின் அந்த இறுதி நொடிகளில் நீதிமன்றக் காட்சி கடந்த ஆறுதற் பெருமூச்சுக்குப் பின் என்ன கிட்டப் போகிறது எனும் போது "மண்ணிலே ஈரமுண்டு" என்று கொடுப்பாரே ! அங்கே தான் அந்த ஒட்டு மொத்தப் படைப்புக்கும் தன்னாலான நியாயத்தையும் விதைத்து விட்டுப் போவார். இன்னும் ஆழமாக அவரின் பாடல்கள் இன்றைய தலைமுறையால் ஆய்வு செய்யப்பட வேண்டியவை.

வித்யாசாகரின் பாடல்களைக் கேட்கும் போதெல்லாம் அவர் கொண்ட சாகித்தியத்துக்கு மலையளவு கொண்டாட வேண்டிய நம் சமூகம் நண்டு சிண்டுகள் கொட்டம் அடிக்கும் இந்த நேரத்திலும் கூடக் கண்டு கொள்ளாமல் இருக்கிறதே என்ற விரக்தி மேலிடும். அதில் உச்சம்

“கண்டேன் கண்டேன் கண்டேன் கண்டேன் காதலை” பாடலைக் கேட்கும் போதெல்லாம். செட்டி நாட்டுத் திருமண மரபை ஆவணப்படுத்திய “இரு விழியோ”, அந்தாதி வடிவில் “நெஞ்சத்திலே நெஞ்சத்திலே” என்று இன்னும் கொண்டாட இரண்டு உண்டு.

இயக்குநர் கரு.பழனியப்பன் - வித்யாசாகர் ஜோடி அந்தக் காலத்து ஆர்.சுந்தரராஜன் - இளையராஜா கூட்டணி போன்று வெகு சிறப்பாகப் பயணித்தவர்கள். குறிப்பாக "பார்த்திபன் கனவு" தொட்டு "சதுரங்கம்", "சிவப்பதிகாரம்", "பிரிவோம் சந்திப்போம்", "மந்திரப் புன்னகை" என்று இந்தப் படங்களில் வந்த ஒவ்வொரு பாடல்களுமே இருந்து இருந்து பொறுமையாக நேர்த்தியாக இழைத்த அற்புதங்கள் போல மிளிரும். சொல்லப் போனால் வித்யாசாகரைத் தொடர்ச்சியாகவும், சிறப்பாகவும் பயன்படுத்தியவர்களில் மெல்லிசைக் களத்தில் கரு.பழனியப்பனுக்குத் தான் முதலிடம்.

இவர்களோடு கூட்டணி சேர்ந்த பாடலாசிரியர்கள் பலர் இருந்தாலும் பாடலாசிரியர் யுகபாரதி மட்டும் தனித்துத் துலங்குவார். இந்தப் பாடல் கூட அவரின் கை வண்ணமே.

இரு மனம் ஒப்புவிக்க திருமணம் நிச்சயக்கபட்ட அடுத்த கணமே சம்பந்தப்பட்ட ஆணும் சரி பெண்ணும் சரி உணர்வு ரீதியாக ஒரே நிறத்தில் தான் இருப்பார்கள். அவர்களின் கனவுலகம் திருமண பந்தத்தால் கைகூடும் இன்பத்தை மட்டுமே கோட்டையெழுப்பும்.

இந்தப் பாடல் எவ்வளவுக்கெவ்வளவு சுவை மிகுந்ததாக இருக்கிறதோ அதில் ஒரு சொட்டும் வீணாகாத காட்சிப்படுத்தல் இருக்கும்.

உதாரணமாக, முதலாவது சரணத்துக்கு முந்திய இடை இசையில் 1.09 நிமிடத்தில் இலிருந்து 1.11 நிமிடம் வரையான காட்சியமைப்பைப் பாருங்கள். நிச்சயிக்கப்பட்டவன் நினைவில் தோய்ந்த நாயகி ஸ்நேகா குளிர்சாதனப் பெட்டியில் இருக்கும் தண்ணீர்ப் போத்தலை எடுத்துக் குடித்துக் கொண்டே தன்னிலை மறந்து நகருவதைத் தன் பார்வையால் வெட்டிவிட்டு ஒரு மின்னல் சிரிப்புச் சிரிக்கும் தந்தையாக மகாதேவன், அந்த இடம் ஒரு ஹைக்கூ.

அதே போல் மறுபக்கத்தில் 1.30 நிமிடத்தில் இழைத்த காட்சியில் வெறும் இலையில் சோறுன்ணும் தோரணையில் சேரன்.

"பட்டின் சுகம் வெல்லும் விரல்

 மெட்டின் சுகம் சொல்லும் குரல்

 எட்டித் தொட நிற்கும் அவள்

 எதிரே எதிரே"

இந்தப் பாடலில் மகத்துவம் உணர்ந்து உயிரோட்டமுள்ள காட்சி வடிவம் கொடுத்த்த இயக்குநர் கரு.பழனியப்பனையும் எவ்வளவு பராட்டினாலும் தகும்.

 http://www.youtube.com/watch?v=hQmpVS1qsVk&sns=tw

இம்மூவர் கூட்டணியைப் பாருங்கள் 

“கனா கண்டேனடி தோழி” (பார்த்திபன் கனவு) 

“கண்டேன் கண்டேன்” ( பிரிவோம் சந்திப்போம்)

“சொல் சொல்” ( பிரிவோம் சந்திப்போம்)

“கண்டும் காணாமல்” ( பிரிவோம் சந்திப்போம்)

“நெஞ்சத்திலே நெஞ்சத்திலே” ( பிரிவோம் சந்திப்போம்)

அன்பில்லாமக் கரைஞ்சது போதும் (மந்திரப் புன்னகை)

https://www.youtube.com/watch?v=g93O0VXjcgA

அம்புலிமாமா ( சதுரங்கம்)

எங்கே எங்கே (சதுரங்கம்)

அற்றைத் திங்கள் (சிவப்பதிகாரம்)

சித்திரையில் என்ன வரும் (சிவப்பதிகாரம்)

அடி சந்திர சூரிய (சிவப்பதிகாரம்)

https://www.youtube.com/watch?v=amGzQrGY10g

🌼கண்ணம்மா கண்ணம்மா அழகுப் பூஞ்சிலை

என்னுள்ளே என்னுள்ளே பொழியும் தேன்மழை 🌴

உண்மையைச் சொல்ல வேண்டும் என்றால் இந்தப் பாடல் பற்றி எங்காவது கண்டாலோ ஏதாவது வானொலியில் ஒலிக்க ஆரம்பித்தாலோ அதைக் கடந்து போயிருக்கிறேன். அவ்வளவுக்கு அலுப்புத்தட்டுகிறாரே இந்த டி.இமான் என்று மனசுக்குள் நினைத்துக் கொள்வேன்.

இசையமைப்பாளர் டி.இமானின் ஆரம்ப காலப் பாடல்களில் நிறையத் தேடல் இருந்தது. ஆனால் எப்படி எஸ்.ஏ.ராஜ்குமார் புது வசந்தம் படத்துக்கு முன்னர் விதவிதமான அழகான பாடல்களைக் கொடுத்து வந்தாரோ அதே போல. ஆனால் எஸ்.ஏ.ராஜ்குமாருக்குப் புது வசந்தம் கொடுத்த பெரிய திருப்புமுனை போலவே டி.இமானுக்கு மைனா  படமும். அதற்குப் பின் அள்ளுப்பட்டு வந்த பாடல்கள் எல்லாமே மைனாத் தனமாகவும் கும்கித் தனமாகவும் அமைந்து விட்டது. ஒரே இசைப் பரிணாமத்தில் கிட்டத்தட்ட எல்லா இளம் நாயகர்களும் இமானின் இசையில் நடிக்கும் அளவுக்கு. "கண்ணம்மா கண்ணம்மா அழகுப் பூஞ்சிலை" பாடலின் ஆரம்பமே அப்படியானதொரு எடுகோளை எடுக்க வைத்தது. ஆனால் வார இறுதியில் பொழுது போகாத பொம்முக்குட்டியாக "றெக்க" படத்தைப் பார்க்கும் வாய்ப்புக் கிட்டியது. அன்று தொட்டதுதான் இந்த நிமிஷம் வரை முணுமுணுத்து ரசிக்க வைக்கிறது இந்தப் பாட்டு.

"கண்ணம்மா கண்ணம்மா அழகுப் பூஞ்சிலை" பாடலைத் தூக்கி நிறுத்துவதே இந்தப் பாடலை வெகு அற்புதமாக, படத்தின் மிக முக்கியமான காட்சியமைப்புக்குப் பயன்படுத்திய வண்ணமே.

அதற்குப் பின்னர் தான் இந்தப் பாடலைக் காதலிக்கத் தொடங்கியிருக்கிறேன்.

யுகபாரதி இந்தப் பாடலை எழுதும் போதே பாரதியராக முண்டாசு கட்டியிருப்பார் போல, வரிகளில் அச்சொட்டான சுப்ரமணிய பாரதித்தனம் அழகோ அழகு. 

அந்தப் பாடல் படம் திரைக்கு வரும் வரை ரசிகர்களை ஆட்டிப் படைத்தது. ஆனால் விழலுக்கு இறைத்த நீராகப் பொருந்தாத படைப்புக்குப் போனதால் இன்று பாடலையே மறந்து போகும் நிலை. ஆகவே தான் இம்மாதிரியான பாடல்கள் படமாக்கும் அடுத்த நிலையில் தான் அதன் ஜீவிதமும் இன்றைய காலத்தில் இருக்கிறது.

"புதிய உலகைத் தேடிப் போகிறேன்" பாட்டைப் பாடிய வைக்கம் விஜயலட்சுமி தானே இந்தப் பாட்டையும் பாடியது என்று ஊர்மிளா கேட்டார். எனக்கு முன்பே றெக்க படம் பார்த்து விட்ட அவரும் இந்தப் பாடலைக் கேட்டு உருகிப் போனார்.

இல்லை இந்தப் பாட்டைப் பாடியது நந்தினி ஶ்ரீகர்.

“சக்க சக்களத்தி” 

https://www.youtube.com/watch?v=ioH20FxEZgM

வழியாக ரஹ்மான் மெட்டுக்கும் வரிகள் பதியம் போட்டார்.

இசைஞானியிடம் இன்னும் நிறைய எழுதியிருக்க வேண்டும் என்று ஒரு சோறு பதமாகச் சுவைக்க வைக்கும் 

“பூவைக் கேளு காத்தைக் கேளு” (அழகர்சாமியின் குதிரை)

https://www.youtube.com/watch?v=kTAm3TltwrE

மெட்டில் இசைஞானி

என்றும் அழகாக செய்கின்ற

மாயம் போல

உன்னில் பல நூறு இன்பம் தர

நீயும் வந்தாயே கூடி வாழ 

https://www.youtube.com/watch?v=q_XoN95NvnI

இனிய பிறந்த நாள் வாழ்த்துகள் 

இனிக்க இனிக்க எழுதும் கவிஞர் யுகபாரதிக்கு ❤️ 🎻💐 

கானா பிரபா

02.12.2022

Thursday, December 1, 2022

நிலவு வந்தது நிலவு வந்தது


நீயும் நானும் சேர்ந்ததற்கு

காதல் தானே காரணம்..

காதல் இங்கு இல்லை என்றால்

வாழ்வில் ஏது தோரணம் 💚


ஒரேயொரு ஐந்து நிமிடத்துக்குள்ளான பாடலில் அந்தக் காதலர்களின் அன்னியோன்யத்தை நிறுவிக் காட்ட வேண்டும். ஏனெனில் இந்தக் காட்சியமைப்பு நினைவொழுக்கின் பழைய வாழ்வைக் கிண்டிப் பார்க்கும் சூழல். சவாலை வாங்கிக் கொண்டது இசைஞானி ஆயிற்றே.


நிலவு வந்தது நிலவு வந்தது

ஜன்னல் வழியாக

ஒரு கவிதை தந்தது கவிதை தந்தது

கண்கள் வழியாக

https://youtu.be/Oz2JryqZOog


என்னை இழந்தேன்

செந்தேன் மொழியில்..

விண்ணில் பறந்தேன்

சிந்தும் கவியில்.. ❤️


ஒரு பக்கம் வாலியார் உருகித் தள்ளி எழுதி விட உயிர்கொடுக்கும் காதலர் வாய் மொழியாக ஜானும்மாவும், மனோவும்.

பாடலைப் பின்னிப் போட்ட அந்த இசைத் தூவல் எல்லாம் அவளை இழந்த போதும், அந்தக் காதலின் ஈரம் இன்னும் அவன் மனசுக்குள் இருப்பதைக் காட்டும். 


அந்த ஆரம்ப இசைச் சத்தம் இடையிசை எல்லாம் நீர்த்துளிகள் பட்டுத் தெறிக்கும் ஓசை நயம் அப்படியே வளித்து அள்ளும் புல்லாங்குழல்.


இரண்டாவது சரணத்தில் ஒலியெழுப்பும் மணியோசையோடு துளிர்க்கும் இசை தரும் தேவாலயத்தின் சன்னல் வழியே சுதந்திரமாக எட்டி  வான வெளி பறக்கும் புறாக்களாய்.


ஈழத்தில் போர் கனன்று கொண்டிருந்த அந்தத்


தொண்ணூறுகளின் காலப் பகுதியில் ஒவ்வொரு பாடல்களையும் “ஆழக் கடலில் தேடிய முத்து” போலக் கேட்டது. 5 வருடம் மின்சாரமில்லா இருட்டு வாழ்க்கையில் பாட்டுக் கேட்க மட்டும் குறைச்சலில்லை.

“இதயம்” கொடுத்த பரவசத்தில் “என்றும் அன்புடன்” படப் பாடல்கள் ஷண் றெக்கோர்டிங் பார் இல் வந்திருக்குது என்றறிந்து சுதாவின் மக்ஸெல் காஸட்டை காற்சட்டைப் பைக்குள் போட்டுக் கொண்டு யாழ் நகர பாஸ் ஸ்ராண்ட்டடியில் நடு நாயகமாக இருந்த அந்தக் கடைக்குப் போய் சதீஷ் அண்ணையைக் குசலம் விசாரித்து, நாளைக்கே தந்துடுங்கோ என்று அன்புக் கட்டளை போட்டு.

அடுத்த நாளும் விமானக் கழுகுகளின் இரையாகாமல் தப்பிப் பிழைத்து ஒலிப்பதிவு செய்த “என்றும் அன்புடன்” பாடல்களை, சைக்கிளைத் தலைகீழாகக் கிடத்தி மிதியடியைச் சுழட்டி டைனமோ வழியாக வயரில் பாயும் மின்சாரத்தை டேப் ரெக்கார்டரில் பாய்ச்சினால்

❤️❤️❤️❤️❤️❤️

இன்பம் என்றால் என்னவென்று

உன்னிடத்தில் கண்டு கொண்டேன்..

இன்னும் என்ன உண்டு என்று

சொர்க்கம் வரை செல்லுகின்றேன் 

❤️❤️❤️❤️❤️❤️


இப்போதும் கூட “நிலவு வந்தது” பாடலைக் கேட்டால் அந்தப் பள்ளிக்கூடக் காதலியைக் காணும் ஒரு இன்பப் பரவசம் தலையில் இருந்து கால் வரை அதிர்வலையை எழுப்பும்.


“என்றும் அன்புடன்” படம் வந்து இந்த ஆண்டோடு 30 ஆண்டுகளைத் தொட்டு நிற்கின்றது. ஆனால் எனக்கென்னவோ பிறந்த குழந்தையைக் குளிப்பாட்டி அதன் நறுமணத்தை மேவி நாசிக்குள் இழுக்கும் அனுபவம்.


நண்பர்களுக்கு டியூசன் போய் வர, மதியா சாப்பாட்டுச் செலவுக்குக் கொடுக்கும் பணத்தில் கொஞ்சம் மிச்சம் பிடித்துப் பங்கு போட்டு, ஒரு போத்தல் மண்ணெண்ணை வாங்கி 

இந்தப் படத்தையும் சூட்டோடு சூடாகப் பார்த்து ரசித்தோம்.

எங்கள் தமிழர் பகுதியில் பொருளாதாரத் தடை போட்ட அந்தக் காலம் மண்ணெண்ணெய் 200 ரூ என்றால் இப்போது எத்தனை ஆயிரம் என்று கணக்குப் பண்ணிப் பாருங்கள். 


“சின்னஞ்சிறு அன்னக்கிளி கண்ணில் ஆடுது”


https://youtu.be/Aukv-5HuAoE


இந்தப் பாட்டுக்குப் பின்னால் உள்ள கதை சொல்வார் இசைஞானி தன் மேடைகள் தோறும். மெல்பர்னில் அவர் 2013 இல் மெல்பர்ன் மேடையில் பகிர்ந்து கொண்டதை முன்னர் எழுதியிருந்தேன், அது ;


வாலி அண்ணன் எனக்கு முதலில் எழுதிய பாட்டு "கண்ணன் ஒரு கைக்குழந்தை". ஆனால் நான் இசையமைப்பாளரா வர்ரதுக்கு முன்னாடியே எனக்காக என் அண்ணன் பாஸ்கர் ஒவ்வொரு படக்கம்பெனியா ஏறி இறங்கினார். அப்போ ஒரு தயாரிப்பு நிறுவனம் தாங்கள் தயாரிச்சிட்டிருக்கிற ஒரு படத்தில் எம்.எஸ்.விஸ்வநாதன் இசைக்காக வாலி எழுதிய பாடலைக் கொடுத்து அந்தப் பாடலை இசையமைக்கச் சொன்னார்கள், நானும் "வட்ட நிலா வானத்திலே" என்ற அந்தப் பாட்டை இசையமைத்துக் காட்டினேன்" என்று அந்தப் பாடலைப் பாடிக்காட்டினார்.

அந்தப் பாடலின் மெட்டை எங்கோ கேட்ட மாதிரி இருக்கே என்று என் வலது புற மூளை இயங்கத் தொடங்கியது. சட்டென்று கண்டுபிடித்து விட்டேன். அந்த மெட்டில் "என்றும் அன்புடன்" படத்தில் வரும் "சின்னஞ்சிறு அன்னக்கிளி கண்ணில் ஆடுது" என்ற பாடல், அதுவும் வாலி தான் எழுதியது என்பது குறிப்பிடத்தக்கது.


“இதயம்” படத்தைத் தயாரித்த சத்யஜோதி பிலிம்ஸ் தான் அதே முரளி & ஹீரா ஜோடியை வைத்து “என்றும் அன்புடன்” படத்தைத் தயாரித்தது. இங்கு காதலர்களாக ஒன்று சேர்ந்தாலும் மண வாழ்வில் ஒன்று சேராதிருப்பர். சித்தாராவுக்கும் ஒரு கதை, காலனி கலாட்டா என்று படம் ரசிக்கும் தரமென்றாலும் முன்னதைப் போல ஓடிச் சம்பாதிக்கவில்லை.


“என்றும் அன்புடன்” படத்தை இயக்கிய பாக்யநாதன், பின்னர் விஜய்யை வைத்து” நெஞ்சினிலே” படத்தை இயக்கினார். ஆனால் படப்பிடிப்பு நேர விஷயத்தில் கறார்த்தனம் காட்டிய எஸ்.ஏ.சந்திரசேகருக்கு ஒரு முறை படப்பிடிப்பில் எழுந்த சோதனையால் அவரைத் தள்ளி விட்டுத் தானே இயக்கினார். இதனால் மனமுடைந்த ஒளிப்பதிவாளர் விஜய் மில்டன் அந்தப் படத்தோடு விலகிய பின்னணிக் கதையை சாய் வித் சித்ராவில் சொல்லியிருக்கிறார்.


இயக்குநர் பாக்கியநாதன் & ராதிகா  ஜோடியாக “சித்திரச்சோலை” படம் எடுத்து முடிக்காமலேயே முடங்கிப் போனது.


“துள்ளித் திரிந்ததொரு காலம்”


https://youtu.be/v7X316JzJUo

 

அதுவரை “நிலவு வந்தது” பாட்டிலேயே மோகித்துக் கிடந்த எங்களுக்கு, படம் பார்த்த பின் பிடித்துப் போனது இந்தப் பாடலின் காட்சி அனுபவத்தோடு கேட்ட போது….


காலங்கள் ஓடுது பூங்கொடியே பூங்கொடியே

இன்பத்தை தேடுது பூங்கொடியே பூங்கொடியே


துள்ளித் திரிந்ததொரு காலம்

பள்ளிப் பயின்றதொரு காலம்


கானா பிரபா

01.12.2022

Monday, November 21, 2022

கதை வசனகர்த்தா "ஆரூர்தாஸ்"

தமிழகத்தில் நான் முதன் முதலில் காலடி வைத்து இந்த ஆண்டோடு 20 ஆண்டுகள் நிறைவுறுகிறது. வேலை நிமித்தம் பெங்களூருக்கு வந்தவன், பெரியம்மா வீட்டையும் (!) எட்டிப் பார்ப்போம் என்று சென்னைக்கு வந்தேன்.

தேவி பாரடைஸ் சென்று “கன்னத்தில் முத்தமிட்டால்" பார்த்து விட்டுத் திரும்பியவன் முன்னால் ஒரு சிறு புத்தக அங்காடி கண்ணில் படவும், அங்கே தொங்கியிருந்ததில் ஒன்றை எடுத்தேன்.
அதுதான், ஆரூர்தாஸ் எழுதிய “சினிமா : நிஜமும் நிழலும்".
ஆகவே பெரியம்மா வீட்டுப் பரிசாக இன்னும் ஞாபகத்தில் நினைப்பூட்டிக் கொண்டிருப்பது இந்த நூல் தான். இதுவரை ஆரூர்தாஸ் அவர்களைச் சந்திக்கவே வாய்ப்பில்லாமல் போனவனுக்கு, அவரின் கையெழுத்தும் பொறிக்கப்பட்டதைப் பெற்றதைத் தான் ஒரு அதிசயமாக நினைத்துக் கொள்கிறேன்.

“சிற்றுளியும் மலையைப் பிளக்கும் !
சிறிய படமும் வசூலை அளக்கும்”

“விதி” படத்தின் விளம்பர வாசகம் கூட ஆரூர்தாஸின் கைவண்ணமே. அறிஞர் அண்ணாவின் “வேலைக்காரி”, கலைஞர் கருணாநிதியின் “பராசக்தி” படத்தின் நீதிமன்றக் காட்சிகள் எவ்வளவு தூரம் ரசிகர் மனதில் கோலோச்சினவோ அதுபோலவே, பராசக்திக்குப் பின் 32 ஆண்டுகளுக்குப் பிறகு “விதி” படத்தின் நீதிமன்றக் காட்சிகள்
ஆரூர்தாஸின் சிற்றுளியால் செதுக்க, பெரும் வசூல் மழையைக் கொட்டிய வெற்றிச் சித்திரம் ஆனது.
அந்தக் காலத்தில் திருவிளையாடல், சரஸ்வதி சபதம் போன்ற படங்களின் வசன ஒலிப்பேழைகளுக்கு நிகராகச் சக்கை போடு போட்டது “விதி” படத்தில் ஆரூர்தாஸ் எழுதிய வசனங்களோடு மிளிர்ந்த ஒலிச்சித்திரம். இன்றும் நமக்கெல்லாம் அந்தப் படத்தின் வசனங்கள் மனப்பாடம் ஆகுமளவுக்குப் பதியம் போட்டது.

மொழி மாற்றுப் படங்களுக்கு வசனமெழுதித் தொடங்கிய இவரின் கலைப்பயணத்தில் தமிழில் நேரடி கதை, வசனகர்த்தா என்ற அந்தஸ்தைக் கொடுத்தது தேவரின் “வாழ வைத்த தெய்வம்”.
தொடர்ந்து நீண்ட நெடுங்காலம் அவரைக் கதை வசனகர்த்தாவாக வாழ வைத்தது. தேவரின் அன்புக்குரியவராக அங்கே தொடர்ந்தும் அவரின் பேனா இயங்கியது.

பின்னாளில் இது போலவே “விதி” பட வெற்றி தொடர்ந்தும் கே.பாலாஜியின் தயாரிப்பில் உருவான படங்களில் இவரை எழுத வைத்துச் சிறப்பித்தது.

கவியரசு கண்ணதாசனால் “பாசமலர்கள்” என்று சூட்டப்பட்டு, பீம்சிங்கால் “பாசமலர்” ஆக்கப்பட்டதில் வசனம் எழுதிய ஆரூர்தாஸ் அந்தப் படம் பெற்ற பெரும் புகழில் பங்கு போட்டுக் கொண்டார்.

“என் படங்கள்லே டைரக்டர் மாறுவாரு, மத்தவங்கள்ளாம் மாறுவாங்க, ஆனா ரெண்டே ரெழ்ண்டு பேர் மட்டும் எப்பவும் மாற மாட்டாங்க, ஒருத்தர் சிவாஜி கணேசன் இன்னொருத்தர் ஆரூர்தாஸ்” என்று சொன்னவர்கள் தயாரிப்பாளர்கள் சந்தானம் மற்றும் வி.சி.சுப்புராமன். அதன்படியே பாசமலர், அன்னை இல்லம், அன்பளிப்பு என்று சந்தானம் தயாரித்தவைகளிலும், வி.சி.சுப்புராமனின் பார் மகளே பார், தேனும் பாலும் படங்களிலும் சிவாஜியும்,ஆரூர்தாசும் தான்.
ஜெமினி கணேசனுக்கு அடையாளத்தை நிறுவிய “வாழ வைத்த தெய்வம்” வசனகர்த்தாவை சிவாஜிக்கு ஜெமினியே அறிமுகப்படுத்தியதால் தான் 29 படங்களில் எழுதியிருக்கிறேன் என்று நன்றி பாராட்டியிருக்கிறார் ஆரூதாஸ்.

இன்னொரு பக்கம் எம்.ஜி.ஆருக்காக, தாய் சொல்லைத் தட்டாதே, குடும்பத் தலைவன், அன்பே வா, பெற்றால் தான் பிள்ளையா, தனிப்பிறவி உட்பட ஒரு தொகைப் படங்களிலுமாக இரண்டு முன்னணி நட்சத்திரங்களுக்குச் சமகாலத்தில் வசனகர்த்தாவாகப் பரபரப்பாக இயங்கியவர்.

அதுபோலவே தேவர் பிலிம்ஸ், ஏவிஎம் என்று முன்னணி நிறுவனங்களின் முக்கிய வசனகர்த்தா. சிவாஜி பிலிம்ஸின் முதல் வித்தான “புதிய பறவை” படத்துக்கும் சிவாஜியே விரும்பி அமர்த்தப்பட்டவர், கடைசிக் காட்சியில்
“பெண்மையே நீ வாழ்க!
உள்ளமே உனக்கு நன்றி”
என்று முத்தாய்ப்பாக முடிக்க வேண்டும் என்று சொல்லி மீண்டும் காட்சியமைக்க வைத்தவர் ஆரூர்தாஸ்.

தெலுங்கிலிருந்து தமிழுக்கு மொழி மாற்றப்பட்ட “பூ ஒன்று புயலானது” (விஜயசாந்தியை உச்சாணிக் கொம்பில் ஏற்றிய படம்) படத்தில் ஆரூர்தாஸ் எழுதிய வசனங்கள் ஆனந்த விகடனில் வாரா வாரம் பிரசுரமானது.

“நாட்டிய தாரா” மொழி மாற்றுப் படத்தோடு தொடங்கியவருக்கு அவரின் இன்னொரு சுற்றாக மொழிமாற்றுப் படங்கள் வெற்றியைக் குவித்தன. மை டியர் குட்டிச்சாத்தான், வைஜெயந்தி ஐ.பி.எஸ், இதுதாண்டா போலீஸ், அம்மன் உள்ளிட்ட படங்களின் வெற்றியில் ஆரூர்தாசின் வசனமும் முக்கிய நாயகன்.

தொண்ணூறுகளின் ஆரம்பத்தில் தெலுங்கிலிருந்து தமிழுக்கு மொழி மாற்றுப் படங்கள் கொட்டிக் கொண்டிருந்தன. ஒரு பக்கம் மருதபரணி இன்னொரு பக்கம் ஆரூர்தாஸ் என்று பங்கு போட்டுக் கொண்டிருந்தார்கள் அப்போது.

Touring Talkies இல் அடிக்கடி வந்த கேள்விகளில் ஒன்று சித்ரா சாரை  ஆரூர்தாஸைப் பேட்டி எடுக்கும் படி கேட்பார்கள். முன்பு கொரோனா, பின்னர் சில மாதங்களுக்கு முன் ஆரூர்தாஸின் மனைவியார் இறந்த காரணத்தால் அந்தப் பேட்டி நமக்கெல்லாம் கிடைக்கும் வாய்ப்பே இல்லாமல் போனது ஆரூர்தாஸ் என்ற திரையுலக வசன “கர்த்தா”வின் நினைவுகளை அவரின் நீண்ட நெடிய பேட்டியாகப் பதியாமலேயே போய் விட்டது.

ஆரூர்தாஸ் என்ற கதை வசனகர்த்தா,
தமிழ்த் திரையுலகம் செழிப்பான உரையாடல் வளத்தோடு வாழ்ந்தது என்பதன் சாட்சியம், ஏசுவின் திருவடிகளைச் சேர்ந்தார்.

கானா பிரபா
21.11.2022

உசாத்துணை நன்றி : சினிமா : நிஜமும் நிழலும் - ஆரூர்தாஸ்


Monday, November 14, 2022

அப்பிடிப் பாக்குறதுன்னா வேணாம் 💜❤️


சுற்றிச் சுழன்றிடும் கண்ணில்

இசைத் தட்டு ரெண்டு பார்த்தேனே

பற்றி இழுத்தென்னை அள்ளும்

கன்னக் குழிகளில் வீழ்ந்தேனே....

அடித்துப் போட்டது போலதொரு களைப்பில் அமர்ந்தவன் இந்தப் பாடலை ஏனோ கேட்கவேண்டும் என்று தோன்ற கடந்த 1 மணி நேரமாகச் சுழற்றிச் சுழற்றிக் கேட்டுக் கொண்டே இருக்கிறேன்.

சிலர் சாப்பிடும் போது பார்த்திருப்பீர்கள் தட்டில் அடுக்கி வைக்கப்பட்ட கறிகளை ஒவ்வொன்றாக நோகாமல் மெல்ல எடுத்துச் சாதத்தோடு கலந்து ஆற அமரச் சாப்பிட்டுக் கொண்டிருப்பார்கள். குறைந்த பட்சம் அரை மணி நேரம் அவர்களுக்குத் தேவையாக இருக்கும். கருமமே கண்ணாயினர் என்பது போல வேறெங்கும் கவனமில்லாது அன்னப் படையலை உருசி காண்பதே அவரின் சிந்தனையில் இருக்கும். சாப்பாடு ஒன்றே தான் ஆனால் அதை மள மளவென்று அள்ளி வாயில் திணித்து, கோப்பையை வழித்துத் துடைத்து ஐந்து நிமிடத்துக்குள் தமது "வேலை" முடிந்ததே என்று போய்க் கொண்டிருப்பர்.

அது போலத் தான் ஒரு பாடலை அனுபவித்துக் கேட்பதும்.

ஐந்து நிமிடப் பாடல் தான் ஆனால் அந்தப் பாடலின் மெட்டமைப்பு, வரிகளின் பொருத்தப்பாடு, இவற்றையெல்லாம் சுவை கூட்டிச் செவிக் குணவாகத் தரும் இசைக் கோவை இவற்றையெல்லாம் நேசித்துக் கேட்கும் போது அந்தப் பாடல் பதிலுக்கு நம்மிடம் காட்டும் நேசம் இருக்கிறதே ஆஹா.

அப்படி ஒரு பாடலோடு தான் இன்று வந்திருக்கிறேன்.

"அப்படிப் பாக்குறதுன்னா வேணாம் கண்ணுல தாக்குறதுன்னா வேணாம்" இயக்குநர் பார்த்திபன் சில வருடங்களுக்கு முன் இந்தப் பாடல் பிறந்த கதையை எள்ளுப் போலச் சொல்லியிருந்தார்.

ஒரு சம்பாஷணைக்குண்டான இந்த வரிகளை இசைஞானி இளையராஜா ஆரம்ப வரிகளாக்கிச் சுடச் சுட மெட்டமைத்துப் பிரமிக்க வைத்ததாகப் பார்த்திபன் கூற்று.

இனி நான் முன் சொன்ன விடயத்துக்கு வருகிறேன்.

முதலில் இதைக் கேளுங்கள்

https://soundcloud.com/ashaheer/appadi-parkarathu

இந்த இசைக் குளிகை பாடலின் இரண்டாவது சரணத்தில் பிரவாகமாகப் பாயும். கேட்கும் போது கடல் குளியலில் கைகளைச் சுதந்தரமாக அகல விரித்து நீர்வலையை அலம்பும் போது பிறக்கும் இன்பம் வருகிறதா இல்லையா.

சரி இனி இந்தப் பாடலின் ஆரம்ப இசைக்குப் போவோம்.

https://m.soundcloud.com/ravinat14/appadi?in=ravinat14/sets/ring-tones-raja

இளமைத் துள்ளலாய்க் குதிக்கும் இந்த ஆரம்ப இசையைப் பிரசவித்த போது இசைஞானிக்கு 59 வயது. எண்பதுகளில் வந்த பாடல்களையே மீளவும் கொடுத்துக் கொண்டிருக்கலாம் என்றொரு கருத்தைக் கொண்டிருப்போரின் எண்ணத்தையெல்லாம் இது மாதிரியான புத்திசை கரைத்து விடும். இந்தப் பாடல் வந்த போது 20 வருடங்களுக்குப் பின் இன்று போல் கரைந்து போய் விடுவேன் என்று நினைத்தே இருக்கவில்லை.காலம் போன பின் தான் இன்னும் இனிக்கிறது.

தன் வாழ்நாள் பூராகவும் புதிது புதிதாய் தேடிக் கொண்டிருக்கும் இசைஞானி இளையராஜாவுக்கெல்லாம் தான் கட்டிக் காத்த ரசிகச் சூழலுக்குள் (comfort zone) நின்று கொண்டு படைக்க முடியாது.

இது இசைக்கு மட்டுமல்ல எல்லா விதமான வினைத் திறனிலும் உச்சத்தைத் தேடிக் கொண்டிருப்போருக்கான அடிப்படைப் பண்பு. அதுதான் அவரை மாண்பு மிக்கோர் ஆக உயர்த்தும்.

"அப்படிப் பாக்குறதுன்னா வேணாம்" 

https://soundcloud.com/sridharravi/appadi-parkirthenna-ivan

மாதங்கியின் மயக்கும் குரலோடு இடை இசையில் ஜதி ஒன்று சொல்லி அவரை முழுமையாகப் பாட விட்டு இரண்டாவது சரணத்தோடு இணைந்து கொள்வார் உன்னிகிருஷ்ணன்.

இசைஞானி இளையராஜாவின் இசை மேதமையால் இணைந்து பணியாற்ற வேண்டும் என்றிருக்கும் இயக்குநர் குழாம் ஒரு புறமிருக்க, அவரை உள்ளார்ந்த நேசத்தோடு காதலித்துப் போற்றும்

மிகச் சில இயக்குநர்களில் பார்த்திபனும் ஒருவர்.

பொண்டாட்டி தேவை படத்தில் இருந்து இளையராஜாவோடு பார்த்திபன் கூட்டில் இசைப் படையல்கள் வாய்த்ததும் அவை பாடல்களிலும் குறை வைக்காதவை என்றாலும் பார்த்திபனின் குருநாதர்கள் ராஜாவோடு பணியாற்றிய போது கிட்டிய பரவலான வெகுஜன அந்தஸ்த்தைக் கொடுக்கக் கூடிய வெற்றி கிடைக்க வேண்டும் என்று நினைத்துக் கொள்வேன்.

பாடகி சுதா ரகு நாதன் தமிழ்த் திரையிசையில் பாட வந்து இந்த ஆண்டோடு 20 ஆண்டுகள் “நிறைந்திருக்கிறது"

“எனை என்ன செய்தாய் வேங்குழலே” வாலியின் கை வண்ணம்,

https://www.youtube.com/watch?v=WQMs5enVRTs

“எனக்கிணை யார் இங்கே இசையில்" 

https://www.youtube.com/watch?v=Hc5uqId_APw

“கண்ணன் நீயென் இசை நாத ஓவியம்"

https://www.youtube.com/watch?v=0jchEUXPTw0

கவிஞர் முத்துலிங்கம் கணக்கில் இரண்டு என்று முத்தான மூன்று பாடல்களோடு, இசைஞானி இளையராஜா இசையில் இருபது வருடங்களுக்கு முன்னர் திரையிசையில் அறிமுகமானார் சாஸ்திரிய சங்கீதப் பாடகி சுதா ரகுநாதன்.

பின்னாளில் பார்த்திபனின் சிஷ்யர் கரு.பழனியப்பன் இயக்கிய “மந்திரப் புன்னகை” படத்தில் இன்னொரு தேமதுரைப் பாடல்

“என்ன குறையோ” என்று தொடங்கும் கண்ணன் பாடலையும் சுதா ரகுநாதன் பாடியளித்ததை ரசித்துப் பகிர்ந்துள்ளேன்.

http://www.radiospathy.com/2010/12/blog-post.html

இசைஞானி இளையராஜாவின் “இவன்" பாடல்களில் வாலி, முத்துலிங்கம், மேத்தா, இளையராஜா, பழநிபாரதி, கபிலன், நா.முத்துக்குமார் என்று பழமைக்கும் புதுமைக்கும் பாலம் அமைக்கும் கவிஞர் குழாம் ஆகா.....

“அப்படி பாக்குறதுன்னா வேணா

கண் மேலே தாக்குறது வேணா

தத்தித் தாவுறதுன்னா னானா

தள்ளாடும் ஆசைகள் தானா”

தன் மேல் படரும் காதலன் கண்களைத் தவிர்ப்பதற்குத் தான் திரையிசை நாயகிகள் எத்தனை பாடல்களைப் பாடியிருப்பார்கள் இதற்கு முன்பும். அவை காலத்தால் அழியாதவை என்றால் இதுவும் தானே?

“வளையாத மூங்கிலில்

ராகம் வளைஞ்சு ஓடுதே”

போலத் தன் பாட்டுகளில் இசையையும், வாழ்க்கையையும் பிணைத்துக் கவி பாடும் திறனாளர் பழநிபாரதி அவர்கள்.

அதனால் தான் கண்களை இசைத்தட்டாகச் சுழற்றி விடுகிறார்.

“இவன்” பார்வையை அவள் தடுக்க, இவனோ அந்தப் பார்வையின் தேடலில் விளைந்ததை உச்சபட்ச உவமைகளோடு ஒப்புவிக்கிறான்.

அந்தப் பேரின்ப வெள்ளத்தில் விழுந்தவர்கள் நாமும் தான்.

தீக்க்ஷண்யாவின் கண்களில் “இவன்” விழுந்தான்.

“பேரின்ப வெள்ளத்தில்

நான் மூழ்கிப் போனேனே.....”

இந்தப் பேரின்ப இசையில் “இவன்” விழுந்தேன்”

"அப்படிப் பாக்குறதுன்னா வேணாம்" இன்று முழு நாளையும் என்னை ஆக்கிரமித்திருக்கும் இசை விருந்து.

ஆதி தாளம் போட்டு

எனை பாதியாக செய்து

தத்தளிக்க விட்டாயே


https://www.youtube.com/watch?v=Azodz4PitV8


கானா பிரபா


Thursday, November 10, 2022

காலங்கள்.. மழைக்காலங்கள்...❤️


தேன் குடித்த வண்டுக்குத் தேன் தான் கள்ளு. அது போல இந்தப் பாடலைக் கேட்டால் இசைத்தேன் இன்பதேன். அதுவே கள்(ளு) ஆகியும் விடுமல்லவா? 

தேன் குடித்த வண்டின் களிப்பு இந்தப் பாடலைக் கேட்கும் தோறும் எனக்கெழும். 

கவியரசர் கண்ணதாசனும் “காலங்கள் மழைக்காலங்கள்” பாடலில் “கள்” ஐப் பரவ விட்டிருக்கிறார். ஒவ்வொரு அடிகளும் கள்ளால் நிறைவுற்றிருக்கும்.

வெறும் “கள்” உண்ட மயக்கத்தை அனுபவித்ததில்லை, ஆனால் தாயகத்தில் இருந்த காலத்தில் அப்பம் செய்வதற்குக் கள்ளைப் பயன்படுத்தி மாவைப் புளிக்க வைக்கும் வழக்கம் இருந்ததால் அந்தக் கள் சுவை எப்படியோ ஒட்டிக் கொண்டு விட்டிருக்கலாம்.

“கள் பெற்ற பெருவாழ்வு” டாக்டர் மு.வரதராசனர் எழுதிய அந்தக் கட்டுரையில் “கள்” என்ற விகுதியின் பொருள் மயக்கத்தைப் பற்றி எழுதியிருப்பார். அந்தக் கட்டுரை நம் பள்ளிக்காலத்துத் தமிழ்ப் பாட நூலின் ஒரு அங்கமாக அப்போது இருந்தது.

“கள் பெற்ற பெருவாழ்வு” கட்டுரையைப் படிக்க

https://madhuramoli.com/%E0%AE%95%E0%AE%B3%E0%AF%8D-%E0.../

“கள்ளோ காவியமோ” என்ற நாவலைக் கூட டாக்டர் மு.வரதராசன் எழுதியளித்தும் உள்ளார்.

“காலங்கள் மழைக்காலங்கள்” பாடல் இடம் பிடித்த “இதயத்தில் ஓர் இடம்” படத்தில் ஜெயச்சந்திரனுக்கு ஒரு துள்ளிசை “காவேரி கங்கைக்கு மேலே”  https://www.youtube.com/watch?v=RUTVbpv2CWs  

இலங்கை வானொலியின் அந்தக் காலத்துப் பிறந்த நாள் வாழ்த்துப் பாடல்களில் ஒன்றாகிப் போன “மாணிக்கம் வைரங்கள் முல்லைப்பூ பிள்ளைகள்” https://www.youtube.com/watch?v=krYjIaZeT8c

ஜேசுதாஸ் குரலில் ஒலித்தது பலரின் மலரின் நினைவுகளில் கறுப்பு வெள்ளையாக நிழலாடும்.

இளையராஜா இசையில் எல்.ஆர்.ஈஸ்வரி பாடவே இல்லை என்று அலும்பு பிடிப்பவர்களின் மூக்கை உடைக்க இதே படத்தில் அவரோடு  சந்திரன் பாடிய “மணப்பாறை சந்தையிலே” https://www.youtube.com/watch?v=Ew7N1LZYtd8 பாடலும் உண்டு.

மலேசியா வாசுதேவன் அவர்களின் தலை சிறந்த பத்துப் பாடல்களைக் கொடுக்கச் சொன்னால் இந்தப் பாடலை எப்படியாவது முதல் மூன்றுக்குள் நுழைத்து விடுவேன்.

“மணி முத்தங்கள்

நகை மின்னல்கள்

சிரிக்கின்ற பெண்கள் 

காவியங்கள்

மலர் மொட்டுக்கள்

இளஞ்சிட்டுக்கள்

அணைக்கின்ற ஆண்கள் 

ஓவியங்கள்

நேரங்கள் நதி ஓரங்கள்

ஆனந்த காலங்கள்”

என்று மனுஷர் உருகித் தத்தளிக்க, 

“எனை அள்ளுங்கள்

கதை சொல்லுங்கள்

அழகென்னும் தேரில் 

நடை போடுங்கள்

மலர் மஞ்சங்கள்

இரு நெஞ்சங்கள்

பிறர் காண வேண்டாம் 

திரை போடுங்கள்”

சுதந்திரப் பறவையாய் ஜானகியார் கடந்து விடுவார்.

“ஆட்டுக்குட்டி முட்டையிட்டு”, “தண்ணி கருத்திருச்சு” போன்ற பாடல்களில் ஒரு கிராமியத்தனமான குரலாக வெங்கலமாக மிளிர்ந்தவர், மிக மெருதுவானதொரு குரல் அலைவரிசைக்கு மாறிப் போய் இந்த மாதிரியான பாடல்களில் அடங்கிப் போய் விடுவார்.

கோடு கிழித்த அந்த அலைவரிசைக்கு மேலே எழாது தன் கோட்டுக்குக் கீழேயே நின்று ஜாலம் செய்யும் மலேசியா அண்ணரின் குரல்.

கிட்டார் மழைத்துளிகள், தபேலாவின் முத்தங்கள், 

உச்சி மோந்து வருடும் புல்லாங்குழல்கள்.....வயலின்கள்

இந்த ராகதேவன் பாடல்கள் சொர்க்கங்கள்

ராகங்களே சுகங்கள்

நாங்கள் கலை மான்கள் 

பூக்கள்….

காலங்கள் 

மழைக்காலங்கள்

புதுக்கோலங்கள்……

https://www.youtube.com/watch?v=jfVoCIS0xv0

கானா பிரபா

Wednesday, November 9, 2022

யாரிகாகி ஆட்டா மனசொலி ஹேளு ❤️❤️❤️


இசைஞானி இளையராஜா தன் பாடல்களில் வெவ்வேறான காட்சிச் சூழல்களிலும் புதுமையான உத்திகளைக் கையாண்டிருப்பதைப் பார்க்கும் போது ஆச்சரியம் மேலிடும்.


அவ்வாறானதொரு பாடல் தான் இந்த “ யாரிகாகி ஆட்டா”


https://youtu.be/mK1ak5B9tXo


கன்னடத்தில் Bharjari Bete 

படத்துக்காக 41 வருடங்களுக்கு முன்பே செய்து காட்டிய உத்தி அது. ஒரு காபரே நடனத்துக்கு 3 beats உத்தியைக் கையாண்டு அந்தப் பாடலை அமைத்திருக்கிறார்.

இந்த உத்தியைப் பற்றி ராஜா விளக்கிய பின்னர் பாடலைக் கேட்கும் போது அட போடத் தோன்றும்.


https://youtu.be/dqU5XM7ZuYQ


எஸ்.ஜானகி போன்ற அசுரத்தனமான பாட்டுக்காரர் தான் ராஜாவின் மனதில் ஓடும் இவ்வாறான புதுமைகளுக்கு வழி கோலுவார்கள். அதையே நிரூபித்தும் காட்டியிருக்கிறார் ஜானகிம்மா. ஆரம்பத்தில் பதுங்கிப் பதுங்கிப் பின் சுதந்திரப் பிரவாகமாகக் கொட்டுவார் பாருங்கள் அப்பப்பா


கன்னடத்தில் “ஹ” வகை வார்த்தைப் பிரயோகத்தைக் கேட்கும் போது அவ்வளவு இனிமையாக இருக்கும். இங்கே “ஹேளு” என்று ஜானகிம்மா உச்சரிக்கும் போதெல்லாம் அதே இன்ப அனுபவம்.


பாடலின் இசைக் கோப்பும் இந்தப் புதுமை அனுபவத்தின் உச்ச சோடனையாக இருக்கும். தாள லயம் மூன்று மூன்று என்று தட் தட் தட்


இந்த மாதிரியான அற்புதமான பாடல் கன்னடத்தில் படமாக்கப்பட்ட வகையிலும் ஒரு பிரமிப்பான அனுபவத்தைக் கொடுக்கும்.

ஆனால் இது நான்கு வருடங்கள் கழித்துத் தமிழில் அந்த ஒரு நிமிடம் (1985) ஆன போது “நல்ல நேரம்” என்று ஜெயமாலினிக் குலுக்கலுக்குப் பயன்பட்ட போது கண் கொண்டு பார்க்க முடியவில்லை. அதை நீங்களே YouTube இல் பார்த்துக் கொள்ளுங்கள்.

அந்தத் தமிழ் வடிவத்தின் ஒலிப் பகிர்வை மட்டும் இங்கே கேளுங்கள்.


https://youtu.be/ELpXrToXfwE


எப்படி அந்த 3 beats உத்தியை யாரிகாகி ஆட்டா வரிகளும் மெய்ப்பித்ததோ அதே அளவு நியாயத்தைத் தமிழில் வைரமுத்து கொடுத்த வரிகளும் கொடுக்கவில்லை. இந்த மாதிரிப் பாட்டுக்கு வாலியோ, கங்கை அமரனோ அதிகபட்சமாக இருந்திருப்பார்கள்.


எஸ்.பி.பாலசுப்ரமணியம் என்ற இசை அசுரன் தான் பாடாத பாடல்களின் இசை நுணுக்கங்களைக் கூடப் பாட்டுப் பேட்டி மேடைகளில் பகிர்ந்து விளக்குவார். இந்தப் பாடலைக் கூட அவர் விட்டு வைக்காததைப் பார்க்கும் போது ஆச்சரியமும், இன்னொரு பக்கம் இப்படியான ஞானஸ்தரை எப்பிறப்பில் காண்போமோ என்ற கவலையும் எழும். 


https://youtu.be/RHP5_vcksMI


இசையமைப்பாளர் ஹம்சலேகாவை மட்டுமல்ல கணேச சதுர்த்தி மேடைகளில் இன்னும் கன்னடர்களின் பெரு விருப்பப் பாடலாய் இது இன்னும் கொண்டாடப்படுகிறது.


கன்னடத்தின் மகா நடிகன் சங்கர் நாக் இப்போது நம்மிடையே இருந்திருந்தால் தனது 68 வது பிறந்த நாளை இன்று 09.11.2022 ரசிகர்கள் புடை சூழக் கொண்டாடியிருப்பார். 

தன் 36 வயதிலேயே அகாலம் கொண்ட அவரின் “ஜோதயலி” https://youtu.be/xfWnvQHdkNo பாடல் வழியாக இன்னமும் மொழி கடந்து வாழ்ந்து கொண்டிருக்கிறார். இசைஞானி இளையராஜா & சங்கர் நாக் தனிப்பதிவு பின்னர் கொடுப்பேன். சங்கர் நாக் இன் “Geetha” கன்னடப் படத்தில் ராஜா இசை கொண்டாடப்பட்டது போலவே Bharjari Bete பாடல்களும் இன்னொரு பரிமாணத்தில் அமைந்தவை. 

பாடல்களைக் கேட்க


https://youtu.be/VD4Vyfsg-zE


அவை கொண்டாடித் தீரா அனுபவம். 😍❤️


கானா பிரபா

Tuesday, November 8, 2022

உஷா உதூப் 75 ❤️❤️❤️

“பாப் இசை உலகின் ராணி” என்ற பட்டத்தோடு 56 வருடங்கள் தொடர்ந்து இளமைத் துடிப்போடு மேடைகளில் ஆட்டமும், பாட்டுமாகக் களிப்பூட்டும் மகாராணி. 

அண்மையில் ஒரு இசை நிகழ்வுக்குப் பயணிக்கும் போது அந்த வழியில் பாடகர் கார்த்திக் உள்ளிட்ட கலைஞர்கள் பக்கமிருக்க, இசைஞானி இளையராஜாவின் அரிய பாடலொன்றைப் பாடி அசத்தி விட்டு, ராஜாவைப் பார்த்து ”உங்க எல்லாப் பாட்டும் தெரியுமே” என்று சிரித்துப் பேசுகிறார்.

எஸ்பிபி போலத் தான் இவரும், தன்னுடைய ஒவ்வொரு மேடைத் துளிகளையும் உற்சாகக் கட்டுக்குள் வைத்திருப்பதில் உஷா உதூப் பாடகி என்ற எல்லையைத் தாண்டி, வாழ்வைக் கொண்டாடும் மகோன்னதம்.

வயசெல்லாம் வெறும் இலக்கம் தான் என்று துள்ளாட்டமும், கொட்டமுமாக இவரைப் பார்க்கும் போதே உற்சாகம் அள்ளும்.

இதை எழுதிக் கொண்டிருக்கும் போது YouTube ஐத் தட்டிப் பார்த்தால்

எஸ்பிபியை உஷா புகழும் காணொளி கண் பட்டது.

https://www.youtube.com/watch?v=zX6WGrgYOwg

இருவருமே 

மெல்லிசை மன்னர் எம்.எஸ்.விஸ்வநாதனும் தன் பங்குக்கு “ஊருக்கு உழைப்பவன்” படத்தில் 

It's Easy To Fool You https://www.youtube.com/watch?v=Kzw20o-_OcI

பாடலில் கூட்டுச் சேர்ந்து பாடியுமிருக்கிறார்கள்.

இசைஞானி இளையராஜா இசையில், உஷா உதூப் கடந்த ஆண்டு நவராத்திரி ஸ்பெஷலாகக் கொடுத்த “நிலா அது வானத்து மேலே” ஐ ஆன்மிகத்தில் கலக்கிக் கொடுத்த

Bhoi Maa Bhoiee

https://www.youtube.com/watch?v=gGNLG9yJiPk

பாடலுக்கு முன்பே, உன்னைச் சொல்லிக் குற்றமில்லை படத்தில் இரண்டு பாடல்கள்

“ராத்திரியில் தூக்கமில்ல"

https://www.youtube.com/watch?v=2O1n7y_HoZo

பாடகர் சாய்பாபாவுடன் கொட்டமடித்த 

“கற்சிலை சிலை தான்" 

https://www.youtube.com/watch?v=eNaPknsFNUA

இனிய உறவு பூத்தது பாடலின் அந்த உடற்பயிற்சிக் கட்டளைக் குரலாக எஸ்.ஜானகியோடு இணைந்த “சிக்கென்ற ஆடையில்”

https://www.youtube.com/watch?v=Udn3Y6Y1JQA


Keechuralu தெலுங்குப் படப் பாடல் (பரிந்துரை நண்பர் TC Prasan)

https://www.youtube.com/watch?v=6osVOyDKxG4

இசைஞானியின் 500 வது படமான “அஞ்சலி” கொடுத்த

“வேகம் வேகம் போகும் போகும்”

https://www.youtube.com/watch?v=1omuE_510gg

கூட்டுப் பாடல் என்று அமைந்திருந்தது. இன்று இசைஞானியின் உலகச் சுற்றுலாக்களில் பயணித்துக் கொண்டே இருக்கிறார்.

இளையராஜாவின் பிறந்த நாளுக்காக அவர் பாடியளித்த இசைக்கலவை

https://www.youtube.com/watch?v=U45DGYEuagA

1966 இல் பாடகியாக அறிமுகமான உஷா உதூப் 13 இந்தியப் பிராந்திய மொழிகளிலும், 8 வேற்று மொழிகளிலும் பாடியிருக்கின்றார். எந்த மொழி ஆனாலும் அது அந்நிய மொழி அல்ல தன் மொழி என்றாக்கி விடுவார்.

உஷா உதூப்பின் பயணம் தமிழில் 70 களிலேயே அமைந்திருந்தது. 

குன்னக்குடி வைத்திய நாதன் அவர்களின் இசையில்

“மேல் நாட்டு மருமகள்” படத்தில் Love is Beautiful https://www.youtube.com/watch?v=VXJzKk04a9A பாடலைப் பாடியதோடு காட்சியிலும் தோன்றி நடித்திருந்தார்.

இன்னொரு ஆங்கிலப் பாடலாக “Under A Mango Tree” https://www.youtube.com/watch?v=mqRdpqeJ37U

பாடலை “மதன மாளிகை” படத்துக்காக இசையமைப்பாளர் M.B.ஶ்ரீனிவாசன் வரிகள் எழுதி இசையமைக்கப் பாடினார்.

உஷா உதூப் தமிழில் “மன்மதன் அம்பு” படத்திலும் நடிக்க வைக்கப்பட்டார்.

https://www.youtube.com/watch?v=JY70nB3ePZk

உஷா உதூப்பின் மேடை எவ்வளவு தூரம் உற்சாகக் களையோடு இருக்கிறது என்பதற்கு உதாரணம் இது

https://www.youtube.com/watch?v=QO3oILb1vSY

பாப் இசைப் பாடகர் என்றால் அதீத முக்கல் முனகலோடு அந்நியப்பட்டு நில்லாது, பொதுமறை இசைப் பறவையாக ரசிகர்களை

மாற்ற வல்ல இயல்பு கெடாப் பாடகி இவர்.

தான் பாடாத பாடல்களைக் கூட, அது ஆண் குரல் என்றாலென்ன, பெண் குரலென்றால் என்ன அப்படியே தன்னுடையாக்கி மேடையேற்றிப் பிரதிபலிக்கும் பேராற்றல் மிகு அம்மணி இவர்.

இதோ பாருங்களேன்

https://www.youtube.com/watch?v=fDfojAS8C8I

வாழ்வைக் கொண்டாடப் பாடல்கள் மட்டுமல்ல, பாடகர்களும் தான் என்பதை மேடையில் நிரூபித்துக் கொண்டே இருக்கும்

உஷா உதூப் என்ற மகா கலைஞர் துள்ளிசையாய் ஓயாது இயங்க எல்லாம் வல்ல ஆண்டவன் துணையிருக்கட்டும்.

கானா பிரபா

08.11.2022


Monday, November 7, 2022

கமல்ஹாசன் என்ற பாட்டுக்காரர் தனக்காகப் பாடாத பாடல்கள் ❤️🎸

“பொன் மானை தேடுதே

என் வீணை பாடுதே

உன் பார்வை தொடுத்தது

எனக்கொரு பூ மாலை

சுகம் தர நடந்தது”

https://www.youtube.com/watch?v=Qr3PEIoio8s

எதுவித முன்னேற்பாடும் இல்லாமல் அப்படியே ராஜாவின் ஒலிப்பதிவுக் கூடத்துக்குள் வந்த கமல், இளையராஜா வேண்டிக் கேட்க அப்படியே “சுகம் தர நடந்தது" போலப் பாடி விட்டுப் போனார் மு.மேத்தா வரிகளில் நடிகர் மோகனுக்காக, அந்தச் சம்பவம் “ஓ மானே மானே” படத்துக்காக அமைந்தது.   

இதற்கு முன்பும் இன்னொரு சந்தர்ப்பம் கமல்ஹாசனுக்கு அமைந்திருக்கிறது. 

“பொய்யின்றி மெய்யோடு நெய் கொண்டு போனால் 

ஐயனை நீ காணலாம்” என்ற ஜேசுதாஸ் பாடல் சரணம் ஐயப்ப்பா படத்தை நினைப்பூட்டி விடும். இந்தப் படத்தின் இசைமைப்பாளர் சந்திரபோஸ் இசையில் “சரணம் ஐயப்பா” படத்தில் “அண்ணா வாடா தம்பி வாடா” https://www.youtube.com/watch?v=MmXkDbGJo2E  என்ற பாடலை கமல்ஹாசன் பாடியிருந்தாலும் அது வேறொருவருக்கானதாக அமைந்தது. இதே படத்தில் கமல் கெளரவ வேடத்திலும் தோன்றியிருக்கின்றார்.

கங்கை அமரன் இசையில் தெரு விளக்கு படத்தில் இளையராஜா பாடியது போல, கமல்ஹாசனும் & சைலஜாவோடு இணைந்து

"மதுரைப் பக்கம் என் மச்சான் ஊரு"

https://www.youtube.com/watch?v=bJaRXU_eC5A

பாடியுள்ளார்கள்.

கமல்ஹாசன் என்னும் கலைஞன் தன் நடிப்புத் திறனோடு, ஆடல், பாடல் திறனையும் ஒருங்கே வளர்த்துக் கொண்டவர். முன்னர் ஒருமுறை தொலைக்காட்சிப் பேட்டி ஒன்றில் பாலமுரளிகிருஷ்ணா கூட, கமல் தன்னிடம் சங்கீதம் கற்க வந்ததாகவும், ஒரு சில நாட்களிலேயே அவரின் திறமையைக் கண்டு தான் வியந்ததாகவும் முறையாக இன்னும் பயிற்சி எடுத்திருந்தால் அவரின் பாடும் திறன் இன்னும் உயர்ந்திருக்கும் என்று குறிப்பிட்டிருந்தார்.

குணா பாடல் ஒலிப்பதிவில் கூட இளையராஜா கமலோடு பேசும் போது கமலுக்கு ஹைபிட்சில் பாடும் திறன் இருப்பதைச் சிலாகித்து, சிங்கார வேலனில் "போட்டு வைத்த காதல் திட்டம்" பாடலைப் பாட வாய்ப்புக் கொடுத்ததைக் குறிப்பிட்டிருந்தார்.

“ஞாயிறு ஒளிமழையில்” (அந்தரங்கம்) https://www.youtube.com/watch?v=rLSmBy55ot0  படத்தில் ஜி.தேவராஜன் இசையில் தொடங்கி சங்கர் கணேஷ், இளையராஜா, ஏ.ஆர்.ரஹ்மான் உள்ளடங்கலாக ஏராளம் இசையமைப்பாளர் இசையில் கமல்ஹாசன் பாடியிருக்கிறார். அவற்றில் 99 வீதமானவை தனக்கான படங்களுக்காகவே பாடியிருப்பது குறிப்பிடத்தக்கது.

பின்னாளில் “காதலா காதலா” படத்தில் கார்த்திக் ராஜா இசையில் பாடி நடித்த கமல்ஹாசனை, தன் பெரியப்பா மகன் பார்த்தி பாஸ்கர் பாடல் வரிகளில் பவதாரணி, ஸ்வர்ணலதாவுடன் கூட்டுச் சேர்த்துக் கொடுத்த “முத்தே முத்தம்மா” https://www.youtube.com/watch?v=ippxU28VPMM 

அட்டகாஷ் ரகம். தனிப்பட்ட ரீதியில் கமல் பாடிய பாடல்களில் உச்சமாக ரசித்துக் கேட்பேன்.

அது போல இதுவரை யுவன் ஷங்கர் ராஜாவின் இசையில் கமல்ஹாசன் நடித்திருக்காவிட்டாலும், யுவனின் ஆரம்பகால ஆல்பமான “The Blast” இல் 

“பூக்கள் எல்லாம்” (பார்த்தி பாஸ்கர் & சுஜாதா வரிகள்) 

https://www.youtube.com/watch?v=jj1j2bN0Aws

“வா நந்தனே” (அமரர் வாசன் வரிகள்)

https://www.youtube.com/watch?v=kcbq05ZeNxg

அவள் தேவதை (கவி ரவி வரிகள்)

https://www.youtube.com/watch?v=1OXeyLqqx2Q

போன்ற பாடல்களில் தன் குரலைக் காட்டியிருக்கிறார் கமல்ஹாசன்.

பின்னாளில் புதுப்பேட்டையில் நா.முத்துக்குமார் வரிகளில்

“நெருப்பு வாயில்”

https://www.youtube.com/watch?v=nj2_XlOc5N4

பாடலில் யுவன் இசையில் ருத்ர தாண்டவம் ஆடியிருப்பார் கமல்.

தனிப்பட்ட ஆல்பம் என்று சொல்லும் போது கொரோனா காலத்தில் ஜிப்ரான் இசையில் கமல்ஹாசன் பகிர்ந்த “அறிவும் அன்பும்” பாடல் தொகுதியும் குறிப்பிட வேண்டியது. கானா பிரபா

கமலின் தயாரிப்பு என்று வரும் போது நளதமயந்தி படத்தில் வித்தியாசமான இரண்டு பாடல்கள் 

Sudupattadha

https://www.youtube.com/watch?v=ydrEqU1y-pE

Stranded On the Streets

https://www.youtube.com/watch?v=LyBGscQMRW4

ரமேஷ் விநாயகம் இசையில் கமல் பாடியளித்திருந்தார்.

முத்துராமலிங்கம் படத்திற்காக நீண்ட இடைவெளிக்குப் பின் தன் இசையில் கமல்ஹாசனைப் பாட வைத்தார் “தெற்கத்தி சிங்கமடா” இளையராஜா. பெரிதும் திருப்தி தராத படைப்பு அது. இளையராஜாவுக்காக பஞ்சு அருணாசலம் அவர்கள் எழுதிக் கொடுத்த இறுதிப் பாடல் அது.

ஆனால் Happi படத்துக்காக ராஜா மீண்டும் கமலை அழைத்துக் கொடுத்த Zindagi dish  https://www.youtube.com/watch?v=EYYn9rZvSdk பொக்கிஷம் எனலாம்.

“வானம் முழுதும் பௌர்ணமி

உன் அழகில் தான் வந்ததோ

தேசம் முழுதும் மின்மினி

உன் வரவை தான் தேடுதோ.....”

பன்முகத் திறமையாளர் நம்மவர் கமல்ஹாசனுக்கு இனிய 68 வது பிறந்த நாள் வாழ்த்துகள்.

கானா பிரபா

07.11.2022


Thursday, November 3, 2022

வான் மீதிலே …..💛 வா வெண்ணிலா 💚 ஏ வெண்ணிலா ❤️





“வான் மீதிலே இன்பத் தேன்மாரி பெய்யுதே”


என்ற அதியற்புதமான பாடல் “சண்டி ராணி” படத்தில் இடம்பெற்றிருந்தது. அதை ஒருமுறை இளையராஜா, எம்.எஸ்.விஸ்வ நாதனிடம் சிலாகித்துப் பேசவும், அப்போது சி.ஆர்.சுப்பராமன் அவர்களின் உதவியாளராக இருந்த சமயம் தானே அந்தப் பாடலை கம்போஸ் செய்த தகவலை சொல்லியிருக்கிறார். அதை ராஜா மேடையில் கூறுவதை 5 வது நிமிடத்தில் கேட்கலாம்.


https://youtu.be/OKT7psGQ41E


“வான் மீதிலே” பாடல் பிறந்த கதையை மெல்லிசை மன்னர் எம்.எஸ்.விஸ்வ நாதனே சொல்லும் அற்புதமான பகிர்வையும் கேட்டுப் பாருங்கள்.


https://youtu.be/fIOOK9QCb7k


இதே பாடலின் வழி மூலமாக 33 ஆண்டுகள் கழித்து மெல்லிசை மன்னரும் இசைஞானியும் ஓன்று கூடி இசையமைத்துப் பிறந்தது தான் “மெல்லத் திறந்தது கதவு” படத்தில் இடம் பெற்ற “வா வெண்ணிலா உன்னைத் தானே வானம் தேடுதே” 


https://youtu.be/9VMs5JITg5Q


இந்தப் பாடலின் காட்சியமைப்பில் இன்னொரு சிறப்பாக அந்த இசைப்பள்ளி ஆசிரியராக வெள்ளைச் சட்டையுடன் தோன்றுபவர் இன்னொரு இசை மகானுபவர் ஜி.கே.வெங்கடேஷ் அவர்கள்.

இப்படியாகப் பழமைக்கும் புதுமைக்கும் பாலம் அமைத்தது “வான் மீதிலே” பாடல்.


“வா வெண்ணிலா” பாடல் இன்று வரை 35 ஆண்டுகள் கழித்தும் புத்துணர்வோடு இருப்பதைத் தனியாக வேறு சொல்ல வேண்டுமா?


சண்டி ராணி படத்தைத் தமிழ், தெலுங்கு, ஹிந்தி என்று மும்மொழிகளிலும் இயக்கி நடித்தவர் பானுமதி ராமகிருஷ்ணா. நாயகன் என்.டி.ராமராவ்.


வான் மீதிலே” பாடலை கண்டசாலாவுடன் இணைந்து பாடியவரும் பானுமதி தான். இந்தப் பாடலில் கவரப்பட்ட

இசைஞானி பின்னாளில் பானுமதியைத் தன் இசையில் பாட வைத்த நேரம் என்ன பேசியிருப்பார்கள் என்றெல்லாம் கற்பனை செய்வேன்.

பானுமதி இளையராஜா பேட்டியில் 


http://isaignanibakthan.blogspot.com/2013/


அந்தச் சந்தேகமும் தீர்ந்தது.


“சண்டி ராணியே எனக்குக் கப்பம் கட்டு நீ” (மன்னன்) முதலடிகளை வழக்கம் போல் ராஜாவே எடுத்துக் கொடுத்தும் இருக்கலாம். 


ஆனால் இந்த சண்டி ராணியின் கணக்கு இன்னும் விட்டு வைக்கவில்லை. கங்கை அமரனும் இசையமைப்பாளராக இயங்கிய போது “வான் மீதிலே” பாடலின் பாதிப்பில் ஒரு பாடலைக் கொடுத்தார். அதுதான்

“ஏ வெண்ணிலா என் நெஞ்சமே

 உன் வானம் தானே”


https://youtu.be/-UuYqA04TGs


கங்கை அமரன் அவர்களே அந்தப் பாடலை எழுதி இசையமைத்து “இது ஒரு தொடர்கதை” படத்துக்காக வெளிவந்தது.

எஸ்.பி.பாலசுப்ரமணியமும், எஸ்.ஜானகியும் தனித்தனியாக “வா வெண்ணிலா” பாடியிருக்க (வா வெண்ணிலா எஸ்பிபியோடு ஆலாபனையிலும் ஜானகி) , 

“ஏ வெண்ணிலா” பாடலை இருவரும் சேர்ந்து பாடியிருப்பார்கள்.  அங்கேயும் ஒரு குறும்புத்தனம் பண்ணியிருப்பார் கங்கை அமரன்.  வா வெண்ணிலா பாடலின் எஸ்.ஜானகி வடிவம் ஒரு தபேலா தாளக் கட்டுடன் பாடுவதை இந்த  ஏ வெண்ணிலா பாடலிலும் பிரதிபலிக்குமாற் போலொரு சங்கதியை 2.30 நிமிடத்தில் கொடுத்து எஸ்பிபியை ஆலாபனை பாட வைத்திருப்பார்.


வா வெண்ணிலாவுக்கும், ஏ வெண்ணிலாவுக்கும் இன்னொரு ஒற்றுமை, மெல்லத் திறந்தது கதவு படத்தை ஆர்.சுந்தரராஜன் இயக்கியது போல, இது ஒரு தொடர்கதை படத்தை அவரின் உதவியாளர் அனு மோகன் இயக்கியிருக்கிறார்.


தமிழ் சினிமா ஜாதகப்படி மோகன் & அமலா ஜோடி சேர்வதில் ஏகப்பட்ட சிக்கல். “உன்னை ஒன்று கேட்பேன்” படத்தில் தன் காதலி அமலாவை வில்லன்களிடம் பறி கொடுத்து விடுவார். “மெல்லத் திறந்தது கதவு” படத்தில் சேற்றுக் குழியே வில்லன் ஆகி விடும். 

இது ஒரு தொடர்கதையிலும் அப்படி இப்படிச் சுற்றி ஒரு வழியாக ஒன்று சேர்ந்து விடுவார்கள்.


கங்கை அமரன் மிகச் சிறந்த இசையமைப்பாளர் என்பதில் சந்தேகமில்லை. ஆனால் மகா ரசிகர் என்பது இந்தப் பாட்டைக் கேட்ட மாத்திரத்தில் உணரும்.


காட்சியோடு ஏ வெண்ணிலா 


https://youtu.be/SRQfJFqstJw


ஆளுமைப்பட்ட மனிதர்களைப் பின்பற்றி வாழ்வது உலகியல் நியதி.

இங்கே “வான் மீதிலே”  என்ற பாடல் எத்தனை ஆண்டுகள் கழித்தும் இவ்விரு பாடல்களுக்கும் ஆளுமைப்பட்டு நிற்பதை உணரலாம்.


இசைஞானி சொல்வது போலத் தான் 

“ஒரு பாடல் தோன்றுவதற்கு முன் அது ஒவ்வொரு வாத்தியங்களின் இசையாக வெளிப்படும் போது இன்னதாகத் தான் வெளிப்படும் என்று அது உணருமா என்ன” ❤️


கல்யாணராகம் பாடி 

காதல் செய்ய வந்தேனே�இன்னிசை பாடும் ராகம் நூறு 

நீயே ஆதாரம்


உனை நான் தொடருவேன் தொடர்கதையாய்�நிலவே இன்று நீ விடியிரவாய்�ஏ வெண்ணிலா என் நெஞ்சமே உன் வானம் தானே 💚🎸


கானா பிரபா

03.11.2022

Saturday, October 29, 2022

வேட்டி கட்டிய சரஸ்வதி வாலி ❤️

“தென்காசிச் சாரல் கூட நீயில்லாமல்

வைகாசி வெய்யில் போல வாட்டுதே”

https://www.youtube.com/watch?v=A2Sb6x1F9o0

அனிச்சையாக அடிக்கடி முணுமுணுக்கும் பாடல்களில் இதுவுமொன்று. அதுவும் இன்று வாலியார் பிறந்த நாளில்

காலையில் முகத்தில் முழித்ததும் இந்தப் பாடலோடு தான்.

“சொல்லவா சொல்லவா ஒரு காதல்கதை” பாடலெல்லாம் ராஜாத்தனமான மெட்டும், இசையுமாக தேவா கொடுத்த உச்சம்.

அதில் சரிபாதி பங்கு இயல்பாகக் கவசகுண்டலமாக ஒட்டிக் கொண்ட வாலி அவர்களுக்கும் போய்ச் சேர வேண்டும்.

"மை அளந்த கண்ணும்

என் கையளந்த பெண்ணும்

மின்சாரம் பாய்ச்சுமா"

"கள்ளிருக்கும் கிண்ணம்

என்னுள்ளிருக்கும் வண்ணம்

உன் பார்வை பார்க்குமா"

என்று சொற்களோடு சிலம்பம் ஆடுவார்.

வாலியாரை “வேட்டி கட்டிய சரஸ்வதி” என்று விழித்தது சாட்சாத் தேவாவே தான். “வாலிப வாலி” நிகழ்வில் https://www.youtube.com/watch?v=WjvZw6nysFM

தன்னுடைய முதற்பாடலுக்கு நல்ல சகுனமாக வாலியார் தொடக்கி வைத்த வரிகளோடு நெகிழ்ந்து பேசியிருப்பார் தேவா. 

வாலியை நினைத்தால் நூறு தலைப்புகள் வரும். சரி வாலியும் தேவாவும் என்று கணக்குப் போட்டால் அதைப் பிரித்தாலேயே ஏகபட்ட கிளை பரப்பும். ஆகவே “சொல்லவா சொல்லவா ஒரு காதல் கதை”யின் நீட்சியாக அந்தப் பாடலின் பாட்டுடைத் தலைவன் சரத்குமாருக்காக வாலி(ப) வரிகளில் தேவா கொடுத்த பாடல்களை அலசிப் பார்த்தேன்.

“சூரியன்” திரைப்படம் தேனிசைத் தென்றல் தேவா வாழ்வில் வெளிச்சம் பரப்பிய பிரமாண்டம். அந்தப் பிரமாண்டத்தில் அணி சேர்ந்தவர் வாலி அவர்களும்.

எப்படி “மஸ்தானா மஸ்தானா”வுக்கும், “முக்காலா முக்காப்புலா”வுக்கும் அர்த்தம் தேடத் தேவை இல்லாமல் இசையின் தள லயத்தோடு வரிகளை ரசித்தோமோ அது போல ஒரு பாட்டு

“லாலாக்கு டோல் டப்பிமா”. ஆனால் இந்தப் பாடலுக்கு ஒரு தனிச்சிறப்பு உண்டு. அந்த மர ஆலையில் வேலை செய்பவர்களின் களைப்பு நீங்க ஒரு பாட்டு. அங்கே பாமரத்தனமாக, நாட்டுப்புற மனிதர்களுக்கான சொல்லாடலாகவே பாடலும் அமைகின்றது.

அதே சமயம் சூரியன் படத்தின் ஏனைய பாடல்களைப் பார்த்தால்

கந்த சஷ்டி கவசத்தில் இருந்து உருவிய சந்தத்தில் “பதினெட்டு வயசு இளமொட்டு மனசு” இந்தப் பாடலில் வாலியின் சொல்லாடல் எவ்வளவு தூரம் இலாவகமாக வந்து அமரும் என்பதற்கு உதாரணம் பறையும்

“பக்கம் நெருங்கிட.. 

விருந்திட.. ஆசை விடுமா”.

வளைகாப்புச் செய்யும் பெண்ணுக்கு ஒரு பாட்டு “கொட்டுங்கடி கும்மி” 

https://www.youtube.com/watch?v=p6o7rKU3P0I 

“சிவப்புக் கல்லு மாணிக்கம் போல்

புள்ளப் பொறக்கணும்

அது சூர்யகாந்தி பூவைப் போல

மெல்ல சிரிக்கணும்”

போகிற போக்கில் ஒரு அழகியலைப் பூப்போல எறிந்து விட்டுப் போய்க் கொண்டே இருப்பார் வாலி.

“தூங்கு மூஞ்சி மரங்களெல்லாம்” பாடலும் அது போலத் தான், 

பூமிக்கு என்னென்ன தாகங்களோ பங்குனி மாதத்திலே

பூவைக்கு என்னென்ன மோகங்களோ பூ பூத்த காலத்திலே"

இயற்கையையும், காட்சிச் சூழலையும் இணைத்து அழகு பார்ப்பார்.

சூரியனின் ஒவ்வொரு பாடல்களும் ஒவ்வொரு ரகம். அவற்றுக்கான வரிகளில் வாலி காட்சிப்படுத்தியிருக்கும் எளிமையும், பிரமாண்டமுமே காலம் தாண்டி மனசில் நிக்க வைக்கின்றது.  உணர்வு பூர்வமான நெகிழ வைக்கும் பாட்டாய் “மன்னாதி மன்னன்” கேட்டால் கண்கள் கசியும். 

வசந்த காலப் பறவை படத்தின் வெற்றியே சூரியனிலும் அதே வாலி & தேவா வெற்றிக் கூட்டணி தொடர வழி வகுத்திருக்கும். அடுத்த “இந்து” படத்திலும் அப்படியே ஆயிற்று. இம்மூன்றிலும் சரத்குமார் இருந்தாலும் சூரியனில் நாயகனாக மிளிர்ந்தார்.

“பாட்டுக்கு யாரடி பல்லவி சொல்வது

வீட்டுக்குள் நீ இருந்தால்......” 

https://www.youtube.com/watch?v=GtPCGimwZGI

எஸ்பிபியை 90களில் முழு வீச்சில் பயன்படுத்திய விதத்தில் தேனிசைத் தென்றல் தேவா குறையே வைத்திருக்க மாட்டார்.

கனத்த போர்க்காலத்தில் மின்சாரமில்லாப் பொழுதுகளில்

சைக்கிளில் இருக்கும் டைனமோ வழியாக மின்சாரம் கொடுத்து

இந்தப் பாட்டைக் கேட்ட காலமெல்லாம் நினைப்பில் வரும்

ஒவ்வொரு தாயகப் பயணத்திலும் பயணிக்கும் பஸ் இல் மீண்டும்

கேட்கும் போதெலாம். பேண்டு மாஸ்டர் படத்தில் இந்தப் பாடலின் சந்தோஷ & சோக வடிவங்களை மட்டும் வாலியாரை வைத்து எழுதி வாங்கியிருப்பார் தேவா.

சரத்குமாருக்காக தேவா இசைத்ததில் “மகா பிரபு” படத்தின் அனைத்துப் பாடல்கள் கணக்கில் இன்னொரு முத்து

“மைனா மைனா மடியிலே”

https://www.youtube.com/watch?v=xQ5IsSgDY6E

தேவா இசையில் சரத்குமாருக்கான படமாக வந்த “முன் அறிவிப்பு” பாடல்கள் அனைத்துமே பெண் குரல்கள். அவற்றையும் வாலியே எழுதினார்.

“நீலகிரி மலை ஓரத்தில ஒரு செவ்வந்தி மெட்டு”

https://www.youtube.com/watch?v=daoeLKrbZgs

அப்படியே 90களுக்கு அழைத்துப் போய்விடும். வாலி அவர்கள் எழுதிய அந்தப் பாடலோடு மொத்தம் நான்கு பாடல்களைக் கொடுத்தார் தேவா இசையில் “நம்ம அண்ணாச்சி” சரத்குமாருக்கு.  எஸ்.ஏ.சந்திரசேகர் இயக்கிய “தோஸ்து” படத்தின் அனைத்துப் பாடல்களும் வாலி கொடுத்தவையே.

இன்றும் தாயகப் பயணத்தில் நம்மூரை மிதித்தால் எங்கோ ஒரு வீட்டில் இருந்து தேனிசைத் தென்றல் தேவா கொடுத்த தொண்ணூறுகளில் ஒன்று காதில் விழும். அதில் தவிர்க்க முடியாதது “முத்து நகையே முழு நிலவே” பாடல். அதுவும் கலியாண வீடு என்றால் பாட்டுப் போடுபவர் மறவாது இந்தப் பாட்டு சீடியையும் எடுத்து வந்து விடுவார் போல. 

“மண்ணுக்குள் வைரம்” புகழ் இயக்குநர் மனோஜ்குமார் தொண்ணூறுகளில் பழி வாங்காத வில்லனே இல்லை எனுமளவுக்குப் பழிவாங்கும் கதையம்சம் கொண்ட படங்களை இயக்கி வந்தார். ஆனால் அதிலும் குடும்ப sentiment மசாலாவை அதிகம் தூவி விடுவார். நடிகர் சரத்குமார் நாயகனாக அரிதாரம் பூசிய போது கூடவே வித்தியாசமான தோற்றங்களும் கிட்டிய அதிஷ்டக்காரர். மனோஜ்குமார் இயக்கிய சாமுண்டி அப்படி இன்னொன்றாக அமைந்தது.

அந்தக் காலகட்டத்தில் தேனிசைத் தென்றல் தேவாவோடு படத்தின் முழுப்பாடல்கள் அல்லது அதிகபட்சப் பாடல்கள் என்று கணக்கு வைத்து எழுதிய காளிதாசன் இல்லாத படங்கள் அரிது. அப்படி அரிதாக தேவாவோடு கவிஞர் வாலி கூட்டணி அமைத்த படமே “சாமுண்டி”.

“முத்து நகையே.. முழு நிலவே.. 

குத்து விளக்கே.. கொடி மலரே”

https://www.youtube.com/watch?v=Onkgvb0cppw

பாடலில் மெட்டும், இசைக் கோப்பும் அப்பட்டமான இசைஞானி இளையராஜாவின் தாக்கத்தால் கொடுத்த பாட்டு.

எஸ்.பி.பி & எஸ்.ஜானகியின் குரல்களில் அப்படியே கிறங்கி விடுவோம். இந்தப் பாட்டு முழுக்க வாலியாரின் வரிகளும் தெம்மாங்கு இசையும் அப்படியே வயற்காட்டுக்கு இழுத்துப் போய் விடும்.

“மண்ணத் தொட்டு கும்பிட்டுட்டு 

பொட்டொண்ணு வச்சுக்கம்மா” 

https://www.youtube.com/watch?v=uCLBMbNOPt0

தங்கை பாசத்தோடு கலந்து வரும் படத்தின் முகப்புப் பாடல். முத்து நகையே பாடலுக்கு நிகராகக் கொண்டாடப்படுவது.

இந்தப் பாடலைக் கேட்கும் போதெல்லாம் வெள்ளையத் தேவன் படத்தில் இளையராஜா கொடுத்த “தங்கச்சி காலுக்கொரு தங்கக் கொலுசு” பாடல் வந்து ஞாபகமூட்டும். அதுவும் வாலியார் கைவண்ணம் தான்.


கண்ணுல பால ஊத்த வந்த கண்ணம்மா” 

https://www.youtube.com/watch?v=ZRa-FFtxsIc

அந்தக் காலத்து தொண்ணூறுகளின் தேவா முத்திரைப் பாட்டு. எஸ்.பி.பியோடு இதில் ஜோடி கட்டிப் பாடுபவர் சித்ரா. 

“ஏத்துங்கடி ஏத்துங்கடி நல்ல கார்த்திகை தீபம்”

சித்ரா மற்றும் குழுவினர் பாடும் பாடல் வட இந்திய இசையமைப்பாளர் கொடுத்த இசையமைப்போ எனுமளவுக்கு அதன் ஆரம்பம். கிராமியத் துள்ளிசையாக இனிக்கும்.

எஸ்.ஜானகி பாடும் “கும்மணும் கும்மணும்” பாடல் அதிகம் எடுபடாத பாடல்.  “கதவ சாத்து கதவ சாத்து மாமா”  அந்தக் காலத்துப் பட்டிமன்ற மேடைகளில் திரையிசைப் பாடல்களை எள்ளி நகையாடக் கை கொடுத்த பாட்டு.

இளையராஜாவின் இசையை ஆழ்ந்து கவனிப்பவர்கள் அந்த இசை அளிப்பில் காலத்துக்குக் காலம் மாற்றமொன்று நிகழ்வதை அவதானிக்கலாம். தொண்ணூறுகளிலும் அப்படியொரு மாற்றம் நிகழ்ந்தது. அந்தச் சூழலில் தேவாவின் வருகை இளையராஜாவின் பாடல்களைத் தழுவிய போக்கில் ரசிகனை ஈர்க்கும் வண்ணம் முந்திய காலகட்டத்துப் பாணியைக் கலந்து கொடுத்து தேனிசைத் தென்றல் தேவா ஆட்கொண்டார். அதில் இந்த சாமுண்டி படத்தில் கவிஞர் வாலியோடு இணைந்து அனைத்துப் பாடல்களைக் கொடுத்ததும் ஒரு புதுமை. ஏனெனில் இதே தொண்ணூறுகளில் இளையராஜாவின் இசையில் முழுப் படப் பாடல்கள், அதிக பாடல்கள் என்று சம காலத்தில் மீட்டர் ஏற்றிக் கொண்டிருந்தார் வாலி.

கண் இரண்டும்

மயங்கிட கன்னி மயில்

உறங்கிட நான் தான்

பாட்டெடுப்பேன் உன்னை

தாய் போல் காத்திருப்பேன்

இன்னொரு பிறவி இருந்தால் கவிஞர் வாலியாக அல்ல, மனிதர் வாலியாக ஜாலியாக வாழ்வைக் கொண்டாடிய மனிதனாகப் பிறக்க வேண்டும் என்றொரு ஆசை.

இனிய பிறந்த நாள் வாழ்த்துகள் நம் இறவாக் கவிஞருக்கு.

கானா பிரபா

29.10.2022


Friday, October 28, 2022

💚 Arziyan saari main…….❤️

ரஹ்மான் தமிழுக்கு அதிகம் தருவதே இல்லை என்ற குறையை கேட்டிருப்போம். ஆனால் இந்தப் பாடலைக் கேட்ட போது எனது எண்ண அலை வேறாக இருந்தது. கடந்த இருபது ஆண்டுகளில் தமிழையும், ஹிந்தியையும் ஒப்பிட்டுப் பாருங்கள். 

இரண்டு களங்களிலும் ரஹ்மானுக்குக் கிடைத்த வாய்ப்புகளைப் பார்த்தால் ரஹ்மானின் வற்றாத இசை வெள்ளத்துக்கு வடிகாலாகவும், அவரின் இசைத் தேடலுக்கு வாய்ப்புகளாகவும் ஹிந்தியில் எப்பேர்ப்பட்ட வெவ்வேறு பரிமாணங்களில் எல்லாம் மனுஷரைப் பாவித்திருக்கிறார்கள் என்று புரியும்.

இந்த விஷயத்தில் மணிரத்னம், கெளதம் எல்லோருமே ரஹ்மானுக்கான சரியான களத்தைக் கொடுக்கவில்லை என்றே சொல்லலாம். 

ஒரு பக்தி இலக்கியம் எப்படி இருக்கவேண்டும்?

அது இந்து மதமோ அல்லது கிறீஸ்தவமோ என்று இஸ்லாமியப் பாடலோ எதுவாகிலும் மதம் கடந்து கைகூப்பித் தொழ வைக்கும். 

அதனால் தான் 

“கனலில் கருவாகி புனலில் உருவான கந்தன் ஊர் எந்த ஊர்”

“தேன் இனிமையிலும் இயேசுவின் நாமம் திவ்விய மதுர மாமே”

“ஈச்சை மரத்து இன்பச் சோலையில் நபி நாதரை இறைவன் தந்தான்”

என்றெல்லாம் கேட்டபோது மெய்யுருகி நிற்கும் நம் சிந்தை.

ஏ.ஆர்.ரஹ்மான் புகழேணிக்கு வந்த பின்னர் அவரின் தனி ஆல்பங்களைக் கேட்டு ரசித்த போது இஸ்லாமியப் பாடல்கள் கொண்ட “தீன் இசைமாலை” ஐக் கூட விட்டுவிடாமல் ரசித்தோம்.

புகழேணியில் இருக்கும் எல்லா இசையமைப்பாளர்களும் பக்தி இலக்கியங்களைத் திரையிசையிலும், அது கடந்தும் செய்திருக்கிறார்கள். 

மெல்லிசை மன்னர் எம்.எஸ்.விஸ்வ நாதனின் “கிருஷ்ண கானம்” தொட்டு, வி.குமார், இளையராஜா, ஆயிரம் பக்திப் பாடல்களுக்கு மேல் இசையமைத்த தேவா என்போரெல்லாம் ஆகச் சிறந்த உதாரணங்கள்.

ஏ.ஆர்.ரஹ்மான் வட இந்தியருக்காகத் தன்னை மாற்றிக் கொண்டவரல்ல, அவர்களைத் தன் பக்கம் ஈர்த்து விட்டுத் தான் அவர்களின் அடையாள செவ்வியல் இசையிலும் தன்னால் கொடுக்க முடியும் என்று தான் கற்ற சுபி இசை மரபுகளையும் கொடுத்தார்.

ரஹ்மான் தன் திரையிசையில் கிடைக்கும் வாய்ப்புகளில் எல்லாம் அவற்றை வெவ்வேறு பரிமாணத்தில் காட்டிச் சென்றார்.

இந்து, முஸ்லீம் காதலின் அடி நாதமாய் விளையும் பாட்டு,

பாடலில் அப்படியே ஹிந்துஸ்தானியும், கவாலியும் நாத வெள்ள சங்கமமாய்.

Raanjhanaa படத்தில் கொடுத்த Piya Milenge

https://www.youtube.com/watch?v=QlHeJ7cWD38

அதற்கு முன்பு கொடுத்த 

Tere Bina  (Guru)  

https://www.youtube.com/watch?v=7HKbt19q3Rc

வில் காட்டிய பரிமாணம், அதைத் தாண்டி 

ஜோதா அக்பரில் நிகழ்த்திய இசைப் பெரு வெள்ளம் Khwaja Mere Khwaja

https://www.youtube.com/watch?v=4YbAaRFk70o

கேட்கும் போதெல்லாம் இசை ஒரு அசையும் உருவமாக வந்து அரவணைத்து சிலிர்த்து அழ வைக்கும். அதுதான் தெய்வீக இசையின் அடி நாதம்.




“மெய்யான இசை கேட்பவனிடம் வன்முறை எண்ணம் தோன்றாது” என்ற ராஜாவின் கூற்றின் ஆழத்தை நிரூபிக்கும் பாடல்கள் என்று என் எண்ணம் பல்வேறு திசைகளையும் தொட்டுக் கிளற வைத்து விட்டது இந்த Delhi 6 படப் பாட்டு.

Delhi 6 வந்த காலத்தில் இருந்தே வீட்டம்மா Masakali https://www.youtube.com/watch?v=SS3lIQdKP-A பாடலை ஆயிரத்துச் சொச்சம் தடவை கேட்டிருப்பார், அவர் மட்டுமல்ல இந்தப் பாடலை அதிகம் கொண்டாடியதால் இதே படத்தில் இடம்பெற்ற மற்றைய வைர மணிகளையும் அதிகம் கொண்டாடத் தவறி விட்டோமோ என்று எண்ண வைக்கிறது. ஒரு நல்ல இசை ஆல்பத்தில் ஒரு பாடல் தான் இன்னொரு பாடலுக்கு எதிரி.

ஆனால் நம் போலன்றி வட இந்தியர்கள் இன்னும் அதிகம் நேசித்துக் கொண்டாடுவது இந்த Arziyan ஐத் தான்.

இந்தப் பாடலுக்கு YouTube இல் பின்னூட்டியவர்களின் கருத்துகளைப் படித்துப் பாருங்கள். மதவாதம், இனவாதம் எல்லாம் கரைந்து விடும் இந்த மாதிரி நல்லிசையால்.

இந்து முஸ்லீம் ஒருமைப்பட்டின் ஒரு கூற்றாக விளைந்த இந்தப் படத்தில் ரஹ்மான் தன் வாய்ப்பைப் பயன்படுத்திக் கொடுத்த பாடல்  Arziyan.

ஜாவேத் அலியின் குரல் என்னமோ செய்கிறது, கூடவே கைலாஷ் கர் சேரும் போதும் அது கிளை பிரிந்து இன்னோர் வகை உணர்வலைகளைக் கிளப்புகிறது. ஜாவேத் அலியை அணுக்கமாகக் கேட்டால் ஒரு ஊதுபத்தியின் சுழல் புகை பேசுவது போலிருக்கும்.

இந்த இரண்டு நதிகளையும் இணைக்க வைத்த ரஹ்மானிய சிந்தனைக்கு ஒரு சபாஷ் போடலாம் இல்லையா?

ஜாவேத் அலி தேர்ந்த சுபி இசை வல்லுநர்  அதை மேடையில் பிரதிபலிக்கும் பாங்கையும் பாருங்கள்.

https://www.youtube.com/watch?v=7z-3JjHT2v4

கைதட்டல் தான் எல்லா மதங்களையும் இணைக்கிறது. இரு கை ஓசை தான் ஒற்றுமையின் வெளிப்பாடு. இந்தப் பாடலின் அடி நாத இசையில் தபேலாக் கட்டும் அதையே பிரதிபலிக்கிறது.

Arziyan பாடலால் இந்த வெள்ளிக்கிழமை என் மனமெல்லாம் ஊதுபத்தியின் சந்தன மணமாக வெள்ளமாக நிறைந்திருக்கின்றது.

https://www.youtube.com/watch?v=JA09HEGTzCU

Saturday, October 15, 2022

ஆயிரம் மலர்களே மலருங்கள் ❤️🌷


இக்கட்டான நேரத்தில் தான் அற்புதமான படைப்புகள் பிறக்கின்றன.
அப்படிப் பிறந்தது தான் இந்தப் பாட்டுமாம். ஒரு பின்னணி இசை வேலை நெருக்கடியில், பாரதிராஜா இடையில் வந்து ஒரு காதல் பாட்டுக் கேட்கவும், கவிஞர் கண்ணதாசனிடம் அந்த நேரத்தில் தோன்றிய மெட்டை வரிக்கு வரி சொல்லச் சொல்ல அவர் ஒவ்வொன்றையுன் தன் வரிகளால் உயிர்ப்பித்துக் கொண்டு போன அந்த கதையை இளையராஜாவே சொல்லக் கேட்போம்.
அதை இன்னும் விலாவாரியாகப் பேசியது இங்கே
இன்று காலை இந்தப் பாடல் எதேச்சையாகக் காரின் இசை வட்டு வழியே பிரவாகிக்கும் போது தோன்றிய எண்ண அலைகளுக்கு அளவு கணக்கே இல்லை.
அந்தக் காலத்து இலங்கை வானொலியின்
“திரைய்ய்ய்ய்ய்ய் விருந்த்த்த்த்து”
என்று எங்கள் கே.எஸ்.ராஜா கொடுத்த “நிறம் மாறாத பூக்கள்” ஐச் சொல்லவா?
இல்லை இந்தப் படத்தை “நியூ விக்டர்ஸ்” வீடியோ கடையில் வாடகைக்கு எடுத்து அண்ணன்மார் போட்டுக் காட்டிய கதை சொல்லவா?
அதையும் தாண்டி
“ஆயிரம் மலர்களே மலருங்கள்” என்று வரும் போது அந்த இசைத் துள்ளல் நாயகி ரத்தியின் துள்ளலாகவே மனப் பிரமை எழுப்புவதையா?
பாடலின் ரிதத்திலேயே ரத்தியின் துள்ளலைக் காட்சிப்படுத்தி விடும் இசை.
இரண்டு காதல் கதைகளும் சங்கமமாகும் “கதா சங்கமத்தின்” அற்புதமான விளைச்சல் இந்த நிறம் மாறாத பூக்கள். கே.பாக்யராஜ் கதையை மீண்டும் பாரதிராஜா படமாக்கிய காதல் காவியம்.
தன்னை ஒரு கிராமியப் படைப்பாளி என்ற முத்திரையை நீக்க முதலில் “சிகப்பு ரோஜாக்கள்” இப்போது “நிறம் மாறாத பூக்கள்”. இதில் கமலுக்குப் பதில் சுதாகர், ரஜினிக்குப் பதில் விஜயன். அதுவும் அந்த விஜயனுக்கு பாரதிராஜாவின் குரல். அதை அந்தக் காலத்தில் ஒலிச்சித்திரமாகக் கேட்கும் போதெல்லாம் அது கொடுத்த அதிர்வு அப்பப்பா இப்போதும் அதிரும்.
இந்த மாதிரிப் பாடல்களைப் பாடுவதற்கே பிறப்பெடுத்தது போலவே ஜென்ஸிம்மா பாடும் போது கொஞ்சம் துள்ளலுமாக.
அந்த ஆரம்பக் குரலோசை மலை முகடு எங்கெணும் தொட்டுத் தொட்டுப் போவது போல. இதையே நிறம் மாறாத பூக்கள் பட விளம்பரத்தின் ஆரம்பத்திலும் சேர்த்திருப்பார் கே.எஸ்.ராஜா.
அந்த இரண்டு பேரச் சுற்றியும் காட்சியைப் பாருங்கள். இயற்கையோடே உலாவ விட்டிருக்கிறார். ஆனால் கண் வெட்டாது பார்க்க முடியும் ஒரு பிரமாண்ட உணர்வு. அதுதான் பாரதிராஜா.
“பூமியில் மேகங்கள்
ஓடியாடும் யோகமே
மலையின் மீது ரதி உலாவும் நேரமே…,”
மலேசியா வாசுதேவன் வந்து கலக்கும் இடத்தை ஆரம்ப மெட்டிலேயே போட்டாலும் அதுவும் தொடக்கம் போலவிருக்கும். மலேசியா அண்ணனுக்கு இந்தப் பாடல் எல்லாம் மணி மகுடம். பாத்திரமாகவே ஆகி உருகித் தள்ளியிருப்பார் மனுஷர்.
காட்சிப் பொருத்தத்துக்கு ஏதுவாக சைஜலாவும் வந்து முடித்து வைப்பார். படத்தின் தலையெழுத்தே இந்தப் பாடல் தான்.
ஒரு பக்கம் பாடகர்களின் அந்த வசியத்துக்குக் கட்டுப்படுவதா இல்லை அதைச் சுற்றிப் பரவிய இசைத் துணுக்குகள் ஒவ்வொன்றாக மகரந்தத்தை நக்கும் தேனீ போல ஒன்று விடாமல் ஒற்றி ஒற்றிக் கேட்பதா என்ற இரு தலை மனது.
அதுவும் “குபுக் குபுக்” என்று நுரை தள்ளும் புல்லாங்குழல் பிரவாகத்தில் தேன் உண்ட களிப்பில் பூவை வட்டமிடும் வண்டாக மனசு.
“ராகங்கள் நூறு
பாவங்கள் நூறு
என் பாட்டும் உன் பாட்டும்
ஒன்றல்லவோ”
போகிற போக்கில் தமக்குத்தாமே வாழ்த்தி மகிழ்வது போல் கவியரசரும் இசைஞானியும்.
ராஜா அந்தக் காணொளியில் கவியரசர் பற்றிச் சொன்னதை மெய்ப்படுத்துவார் தன் வரிகளில்.
“பூமியில் மேகங்கள்
ஓடியாடும் யோகமே
மலையின் மீது ரதி
உலாவும் நேரமே…..
சாயாத குன்றும்
காணாத நெஞ்சும்
தாலாட்டு பாடாமல்
தாயாகுமோ…..”

Wednesday, October 12, 2022

ஒனக்காகப் பொறந்தேனே எனதழகா 💚💛♥️


ஒரு பாடல் தொடங்கும் போதே மெலிதான புன்முறுவல் வந்து விடும். அப்படியாகப்பட்ட பாட்டு இது.


“உனக்காக” என்ற சொல்லை “ஒனக்காக” ஆக்கி விடும் அந்தக் காலத்து சுசீலாம்மாவைப் பிரதியெடுத்த சந்தியாவின் குரலோடு, 

P.B.ஶ்ரீனிவாஸ் இன்றிருந்தால் “இங்கே வா பைய்யா” என்றழைத்து இவர் கைகளைப் பிடித்து இறுக்குவாரோ எனத் தோன்றும் பால்ராம் என்று அப்படியே ஐம்பது வருடம் முன்னகர்த்தி விடும் பிரமை அல்லது பிரமிப்பான குரல்கள்.


இந்தப் பாடலை எழுதும் போது என்ன தோன்றியது என்று கேட்டால் கதை கதையாகச் சொல்வாரோ வாலி ஐயா என்று காலம் கடந்த ஞானத்தால் மனம் நொந்து கொள்கிறது.


திரையிசையில் தொன்மம் தழுவிய சம காலத்துப் பாடல்கள் பலவற்றைக் கேட்டிருக்கிறோம்.

இந்தப் பாடலில் ஜோடி சேர்ந்த சந்தியா (சுசீலாம்மா மருமகள்) கூட 

“பூங்கொடியின் புன்னகை” ( இருவர்)


https://youtu.be/Jb4S3MCRt7Y


சற்று முன்னோக்கினால் சுரேந்தர் & சித்ரா “பாரிஜாதப் பூவே”


https://youtu.be/-m-M6yTaolI


ஜிக்கியம்மா தொண்ணூறுகளில் பாடியவை அதே பழைய பிரதிபலிப்பில் அதுவும் குறிப்பாக அபூர்வ சக்தி 369 இல் “இள வாலிபனே”


https://youtu.be/4sM5qDFoPRs


இன்னும் கொஞ்சம் பத்தாண்டுகள் முன்னோக்கினால் C.S.ஜெயராமனை அடியொற்றி மலேசியா வாசு தேவன் பாடிய


“இந்த அழகு தீபம்” (திறமை) உமா ரமணனுடன்,


https://youtu.be/NYe-8gNGQMI


சைலஜாவுடன் “ஆனந்தத் தேன்காற்று தாலாட்டுதே” (மணிப்பூர் மாமியார்) 


https://youtu.be/eEqNxMvBfM8


என்றெல்லாம் கொட்டும்.


முன் சொன்ன பாடல்கள் எல்லாம் இனிமை சொட்டும். அதில் சந்தேகமென்ன. ஆனால் அவற்றின் காட்சி வடிவத்தில் ஒரு பொய்மை இருக்கும், இருவர் நீங்கலாக. (மணிப்பூர் மாமியார் வரவில்லை).


இவற்றைத் தாண்டி “உனக்காகப் பிறந்தேனே” பாடலின் இசையின்பம், குரலின்பம், போடப்பட்ட வரிகளின்பம், இவை எல்லாமும் பிரதிபலிக்கும் காட்சி இன்பம். ஆகா 😍


இந்தப் பாடல் வெளிவந்து சில நூறு முறை கேட்டிருப்பேன். அவற்றில் பாதிக்கு மேல் காட்சியோடு ரசித்தது தான்.

ஒருமுறை கேட்க வேண்டும் என்று மனம் உந்திக் கேட்டால் விடாது நாலைந்து தடவையாவது கேட்க வைத்து விட்டுத்தான் மறு வேலை பார்க்கும்.


“ஒருவாட்டி என்னை

ஓரசாட்டி உன்னை

உறுத்தும் பஞ்சன மெத்தையும்

ராத்திரி பூத்திரி ஏத்துற வேளையில…”


காட்சிக்கு என்ன தேவையோ அதை ஏற்கனவே வரிகளில் வடித்திருப்பார் வாலியார்.

மின் வெட்டு நாளில் “வெளிச்சப் பூ” என்றவர் இங்கே கை விளக்கை “பூத்திரி” என்கிறார். என்னவொரு உவமை 😍


இந்தப் பாட்டு முழுக்க தன்னுடைய இயல்பில் இருந்து விலகிய கரிசக்காட்டுக் கவிஞர் ஆகி விடுவார் வாலி.


குறும்புக்காரக் கணவர் ஜெயபிரகாஷ், வெட்கப் புன்னகை துளசி இவர்களுக்குள் இருக்கும் அழகான தாம்பத்ய பந்தத்தை ஒரு மூன்று நிமிடப் பாடல் முன்னூறு பக்க நாவலாக்கி விடுகிறது.

பாட்டு அது பாட்டுக்குப் பயணிக்க, அதன் சின்னச் சின்ன அசைவுகளிலும் இவர்களின் ஹைக்கூ காதல் ❤️


இந்தப் படத்தை நான் இன்னும் பார்க்கவில்லை என்ற பொய்க்கோபம் இலக்கியா அம்மாவுக்கு 😀

இந்தப் பாடலே பெரு நிறைவு கொடுக்கிறது எனக்கு.


❤️


“ஒனக்கு வாக்கபட்டு வருசங்கள் போனா என்ன

போகாது உன்னோட பாசம்

என் உச்சி முத பாதம் வரை

என் புருஷன் ஆட்சி

ஊர் தெக்காலதான் நிக்கும் அந்த

முத்தாலம்மன் சாட்சி”


இந்தப் பாட்டைக் கேட்டுக் கேட்டு ஆனந்தக்  கண்ணீர் வந்ததுமுண்டு. என்னவொரு இசை வார்ப்பு ஜஸ்டின் பிரபாகரா 😍


ஒரு சுவையான உணவைச் சாப்பிட்ட பின் சப்புக் கொட்டும் நாக்குப் போல கேட்ட பின்னும் மனமும், நாவும் அசையும்.


ஒனக்காக பொறந்தேனே 

எனதழகா

பிரியாம இருப்பேனே 

பகலிரவா 


❤️

இறுக அணைத்துக் கொள்ளும்

பாட்டு


https://youtu.be/FEd-cRfygIk


கானா பிரபா

Tuesday, October 11, 2022

அஜித்குமாரின் தலைவிதியை மாற்றிய பாட்டு ❤️

ஏ.ஆர்.ரஹ்மானின் ஆரம்பகாலப் பாடல்களில் இப்போதும் தேடி ரசிப்பது என்னமோ அன்றைய காலகட்டத்தில் அதிகம் ஆர்ப்பாட்டம் பண்ணாது அடக்கமாக இருந்த இம்மாதிரிப் பாடல்கள் தான். அப்போது வரிசையாக ஒவ்வொரு பிரபல இயக்குநர்களுடன் பணியாற்றும் வாய்ப்புக் கிட்டியவிதத்தில் பவித்ரா படத்தில் கே.சுபாஷ் உடன் கை கோர்த்திருந்தார் ரஹ்மான்.

படத்தில் "உயிரும் நீயே" , "அழகு நிலவே" பாடல்களோடு "கோயம்முத்தூர் கோயம்முத்தூர் தாண்டி" என்ற எள்ளல் பாடல் அளவுக்குக் கூட செவ்வானம் பாடல் அப்போது பிரபலமாக இருக்கவில்லை. இந்தப் பாடல் வந்த நேரம் நான் கொழும்பில் தங்கிப் படித்துக் கொண்டிருந்த நேரம் எப்போதாவது அரிதாக இலங்கை வானொலி இந்தப் பாட்டைக் கொடுக்கும் போது நின்று கேட்டுவிட்டுப் போவேன்.

எஸ்.பி.பாலசுப்ரமணியத்தின் சகோதரி எஸ்.பி சைலஜாவிற்கு இளையராஜாவால் ஆரம்பத்திலிருந்து பாடும் வாய்ப்புகள் அதிகம் கிட்டியது போல, எஸ்.பி.பி மகள் பல்லவிக்கு ஏ.ஆர்.ரஹ்மான் வாய்த்திருக்கிறார். காதலிக்கும் பெண்ணின் கைகள் (காதலன்) படப்பாட்டில் தந்தையுடன் சேர்ந்து பாட வாய்ப்புக்கிட்டியது இவருக்கு. ஜீன்ஸ் படத்தில் உன்னிகிருஷ்ணனுடன் "ஹைர ஹைர ஐரோப்பா" வரிசையில் பவித்ராவில் இந்தப் பாட்டு. ஏ.ஆர்.ரஹ்மான் அதிகம் முன்னுறுத்தியும் தொடர்ந்தும் நிறையப் பாடவில்லை இவர். 

நீல மலர்கள் படத்தில் வந்த இது இரவா பகலா நீ நிலவா கதிரா பாடலைப்போலவே இந்தப் பாடலின் வரிகளும் அமைக்கப்பட்டிருக்கும்.

எஸ்.பி.பல்லவியை திரையிசையில் தனித்துவமான பாடகி என்றெல்லாம் உயர்த்த முடியவில்லை என்றாலும், அப்பாவித்தனம் ஒட்டிய அந்தக்குரலில் ஏனோ ஈர்ப்பு இருக்கிறது. குறிப்பாக "செவ்வானம் சின்னப்பெண் சூடும்" பாடல் அவருக்குக் கிடைத்த அருமையான வாய்ப்பு. மனோவை முந்திக் கொண்டு இவர் பாடும் போது கொடுக்கும் நுணுக்கமான சங்கதிகளைக் கவனித்தால் நீங்களும் என் கட்சியில் சேர்ந்துகொள்வீர்கள்.

ரஹ்மான் ஒவ்வொரு புதுக்குரல்களையும் புதுப்புது வாத்தியம் போலப் பயன்படுத்தும் அழகே தனி. அந்த வகையில் பல்லவியின் குரல் அவரின் இசையில் மிளிர்ந்தது எனலாம்.

“செவ்வானம் சின்னப் பெண் சூடும்" பாடல் உண்மையில் Yoddha படத்துக்காக முதலில் பாவித்த இசை வடிவம். அந்தப் பாடல்

“மாம்பூவே” https://www.youtube.com/watch?v=0W30AXI5CZA கே.ஜே.ஜேசுதாஸ் & சுஜாதா பாடியதன் மீள் வார்ப்பு. மலையாளிகள் தங்களுக்குத்தான் முதலில் ரஹ்மான் இசையமைத்தார்கள் என்று பெருமையடிக்கும் படம் இது. எனக்கென்னமோ முன்னதை விட “செவ்வானம்” தான் அருமையாக, இளமையாக வந்திருப்பது போன்றதொரு உணர்வு.

அண்மையில் சாய் வித் சித்ராவில் கலந்து கொண்ட நடிகர் விச்சு என்ற விஸ்வநாத் ஒரு தகவலைச் சொன்ன போது “செவ்வானம்” பாடல் மீது இன்னும் நெருக்கம் அதிகமாகி விட்டது.

அந்தச் சமயம் தன்னுடைய புதுப்படமான “பவித்ரா”வுக்கு இளம் நாயகனை கே.சுபாஷ் தேடிய போது பிரபுதேவா எல்லாம் பரிசீலனையில் இருந்தாராம். ஆனால் அதையும் தாண்டி அஜித்குமாரைப் பரிந்துரைத்தவர் “அமராவதி” இயக்குநர் செல்வா. 

ஆனால் அஜித்குமாரோ நடிப்பில் ஆர்வம் இல்லாமல் வெளிநாடு செல்லும் நோக்கத்தில் இருந்தாராம். அப்போது அவர் மோட்டார் பைக் விபத்தில் அடிபட்டு இருந்த நேரமும் கூட. 

ஆனால் இந்த ஒரேயொரு படத்தில் மட்டும் நடியுங்கள், அதுவும் நீங்கள் அடிபட்டு இருப்பதால், படத்தின் நாயகன் மருத்துவமனைக் கட்டிலில் இருக்கும் காட்சியமைப்புக்கும் பொருந்தும் என்று சொல்லிச் சம்மதிக்க வைத்தார்களாம்.

அப்படியாக அஜித்குமாரும் “பவித்ரா” படத்தில் நடித்துக் கொண்டிருந்த போது, தன்னுடைய அடுத்த படத்துக்கு நாயகன் தேடிக் கொண்டிருந்த இயக்குநர் வஸந்த் கண்ணில் “செவ்வானம் சின்னப் பெண் சூடும்” பாடல் அகப்படுகிறது. அப்படியே அஜித்குமாரை ஒப்பந்தம் செய்து ‘ஆசை” படத்தை உருவாக்குகிறார்.

“ஆசை” பட வெற்றிக்குப் பின் அஜித்குமார் தலையெழுத்தும் மாறிப் போனது உலகறிந்தது. அதற்கெல்லாம் அச்சாரமாக இருக்கிறது இந்த

“செவ்வானம் சின்னப் பெண் சூடும்

குங்குமம் ஆகாதோ

விண் மீன்கள் கன்னிப் பெண் சூடும்

மல்லிகை ஆகாதோ

கண்ணால் உன்னை வரவேற்று

பொன் கவிக் குயில் பாடாதோ

கண்ணாளன் தோளில் இடம் கேட்டு

என் வண்ணக்கிளி சாயாதோ”

https://www.youtube.com/watch?v=6iaFid2gqt4

எஸ்.பி.பாலசுப்ரமணியம் அவர்களின் பரிந்துரையில் அஜித்குமாருக்கு நாயக வாய்ப்புக் கிட்டியது. அஜித்குமாரின் தொடர்ச்சியான ஓட்டத்துக்கு எஸ்.பி.பல்லவியின் பாடல் ஏதுவாக அமைந்தது ஒரு ஆச்சரிய இன்பம். 


கானா பிரபா

11.10.2022



Thursday, October 6, 2022

புஞ்சை உண்டு நஞ்சை உண்டு

 


ஆற்றுக்குப் பாதை இங்கு 

யாரு தந்தது 

தானாகப் பாதை கண்டு 

நடக்குது 

காற்றுக்குப் பாட்டுச் சொல்லி 

யாரு தந்தது 

தானாகப் பாட்டு ஒன்னு 

படிக்குது  🏝️❤️


உன்னால் முடியும் தம்பி படத்துக்குப் புலவர் புலமைப் பித்தன் பாட்டெழுகிறார். 

“இதழில் கதை எழுதும்” பாடல் கவிஞர் முத்துலிங்கம், “என்ன சமையலோ” இளையராஜா எழுத மீதி எல்லாம் அவரே. “உன்னால் முடியும் தம்பி தம்பி” என்றொரு நம்பிக்கை விதையை முகப்புப் பாடலில் கொடுத்திருப்பார்.


அதில் நாயகன் உதயமூர்த்தியின் சமூகப் பார்வைக்கு இலக்கணமாய் இரண்டு பாடல்கள் கிடைக்கின்றன.

அந்த இரண்டு பாடல்களிலும் இருக்கும் சொற்கட்டுமானத்தைப் பாருங்கள். பாடலாசிரியர் என்பவர் வெறும் மெட்டுக்கு இட்டுக் கட்டுபவர் இல்லை என்று துலங்கும்.

ஒன்று, சாஸ்திரிய இசை மேடையில் அங்கே புழங்கும் தமிழாக அமையும்,


மானிட சேவை துரோகமா

கலைவாணி நீயே சொல்


வீதியில் நின்று தவிக்கும் பராரியை

பார்ப்பதும் பாவமா?


https://youtu.be/0gCyzsG8VkE


என்றமையும் புலமைத்துவமான தமிழைக் கையாண்டிருப்பார் சங்கீத சபையில் மேடையேறும் பாடலை.


இன்னொன்று தான்,


புஞ்சை உண்டு நஞ்சை உண்டு 

பொங்கிவரும் கங்கை உண்டு 

பஞ்சம் மட்டும் இன்னும் இங்கு மாறவில்ல - எங்க 

பாரதத்தில் சோத்துச்சண்ட தீரவில்ல


வீதிக்கொரு கட்சியுண்டு 

சாதிக்கொரு சங்கமுண்டு 

நீதி சொல்ல மட்டும் இங்கு நாதியில்ல - சனம்? 

நிம்மதியா வாழ ஒரு நாளுமில்ல - இது 

நாடா இல்ல வெறும் காடா - இதை 

கேட்க யாரும் இல்லை தோழா 


இந்தப் பாடலின் வரிகளை மட்டும் ஒருதரம் பாடிப் பாருங்கள். மலை மேட்டிலிருந்து உருண்டு வரும் குதூகலத்தைக் காட்டியிருப்பார் எளிமை மிகு தமிழால். அதில் பாட்டாளி வர்க்கத்தின் அவலமும், அவன் எப்படியாவது உயர வேண்டும் என்ற ஆதங்கமும் தொனிக்கும். இதுதான் என்னுடைய களம் என்று சொல்லாமற் சொல்லுவார்.


அந்த எளிமைக்கு ஒரு சோறு பதமாக “சனம்” என்ற சொல்லாடலைக் கையாண்டிருப்பார்.


உன்னால் முடியும் தம்பி படத்தில் ஏலவே அமைந்த பாடல்கள் கவிச்சிறப்பு மிக்கவை என்றாலும் இந்த இரண்டு பாடல்களும் புலவர் புலமைப்பித்தனின் எழுத்தாளுமையை ஒரே படத்தில் ஒப்பு நோக்க உதவும்.


இசைஞானி இளையராஜாவை சப்தங்களின் நாயகன் என்று சொன்னால் மிகையில்லை என்பதை அவர்களின் பாடல்களே சான்று பகிரும்.  

“பருவமே புதிய பாடல் பாடு”வில் கால் குதிப்புகள், “போட்டா படியுது படியுது” பாடலின் இடையிசையில் சைக்கிள் மணி, ஆட்டோ வாகன ஒலி, நெரிசல் எல்லாம் வருவது போல, “சின்னஞ் சிறு வயதில் எனக்கோர் சித்திரம் தோன்றுதடி” பெண் பார்க்கும் படலத்தில்” தேநீர்க் குவளை வைப்பதில் இருந்து 

பாக்கு இடிக்கும் சத்தம், அப்படியே மைக்கேல் மதன காமராஜனின் “பேர் வச்சாலும் வைக்காமப் போனாலும்” 

முக்கிய காட்சியோடு இணைந்த பாடலில் உருட்டுக் கட்டை ஒலி என்று இதைப் பற்றி எழுதப் போனால் ஒரு ஆய்வுக் கட்டுரை அளவுக்கு ரயில் விடலாம் 😀


அந்த வரிசையில் வரும் “புஞ்சை உண்டு நஞ்சை உண்டு” பாடலின் முகப்பு இசை அப்படியே மரம் வெட்டும் தோப்புக்குள் கடத்திக் கொண்டு போய் விடும் உணர்வோடு பின்னப்பட்டிருக்கும். அந்த மரம் வெட்டும் ஓசை மெல்ல மெல்ல இசைச் சங்கமமாகி பாட்டுக்குள் போகும் கணம் இருக்கிறதே ப்பாஆ “ஓசை ஒலியெல்லாம் ஆனாய் நீயே” என்று இறைவனைப் பாடிய தருணத்தைத் தன் இசை வித்தையால் மெய்ப்பித்திருக்கிறார் எங்கள் பாட்டுக்கார ராஜா.


உன்னால் முடியும் தம்பி படத்தின் மூலம் தெலுங்கில் ருத்ர வீணா வில் இதே காட்சியமைப்புக்கு இன்னொரு மெட்டில் சிரஞ்சீவிக்குக் கொடுத்த பாடலும் வெகு இனிமையானது. ஒரே காட்சி தான் ஆனால் அதற்கு இரண்டு விதமான பாடலைத் தன்னால் தரமுடியும் என்று செப்படி வித்தை காட்டும் ராஜா, ஒரே மெட்டை வைத்துக் கொண்டு குண்டுச் சட்டிக்குள் குதிரையோடும் வீரர்களுக்கும் சவால் விடுகிறார்.

“தரளி ராத தனே வசந்தம்” 


https://youtu.be/2Cuwg9zVXKU


என்ற “ருத்ர வீணா” பாடலின் முன்னிசையைப் பாருங்கள். மரக் குற்றியை வெட்டிச் சரிக்கும் அதே சூழல் தான். ஆனால் அந்த ஒலியை எவ்விதம் வேறுபடுத்தியிருக்கிறார் பாருங்கள்.


இசைஞானி இளையராஜாவுக்குக் கலைஞானி 

கமல்ஹாசன் எப்போதும் விசேஷமானவர் தான். அதனாலோ என்னமோ “புஞ்சை உண்டு நஞ்சை உண்டு” பாடலையும் அதே விசேஷத்தோடு ரசிக்க முடிகிறது. “தந்தந்தானா தந்தந்தந்தானா தந்தந்தானா தானா” என்று ஜதிகளைப் போடும் போதே கமல் இதற்கு எப்படி அபிநயம் பிடிப்பார் என்று ராஜா கற்பனை செய்திருக்கக் கூடும். ஆனால் இங்கே கமல் ஒரு குறும்புத் தனம் செய்வார் பாருங்கள். அந்த அடிகள் வரும் சமயம் வெட்டிக் கொண்டிருக்கும் அந்தப் பக்கமிருந்து மரத் துகள் ஒன்று கமலின் கண்ணில் அறையும். அதை அப்படியே தட்டிவிட்டு நிறுத்தாது மரம் வெட்டுவதைத் தொடருமாறு சைகை காட்டுவார். இந்த இடத்தில் வாசிப்பதை விட்டு விட்டு நான் சொன்ன அந்தக் கணத்தைக் காட்சியில் பாருங்கள். இப்போது தெரியும் ராஜா ஆற்றில் போட்டாலும் அளந்து போடுவதில்லை ஆனால் கமல் நடிப்பு  ஒரு தெப்பக் குளம் என்றுணர்ந்து கொடுத்த இசையென்று. 


மேலும் அந்த மனிதத் தலைகளில் ட்ரம்ஸ் வாசிப்பது கோடரிகளைத் தேய்த்து இசைக் கேற்ப லயிப்பது, கோடரியை அருவாக் கத்தியில் தட்டிப் பார்ப்பது, 

“காற்றுக்குப் பாட்டுச் சொல்லி யாரு தந்தது 

தானாகப் பாட்டு ஒன்னு படிக்குது” வரிகளில் மேலிருந்து சொரியும் பூக்கள் என்று எத்தனை எத்தனை காட்சி இன்பத்தைப் பொருத்தியிருக்கிறது இந்தப் பாடல், 

அந்த ஜனகராஜ் தலையாட்டலும் நளினமும் ஆகா 😀


பொதுவுடமைக் கருத்துகளைத் திரையிசைப் பாடல்களில் காட்சியோடு ஒட்டிக் கொடுக்கும் முறைமை தமிழ் சினிமா வரலாற்றில் பட்டுக்கோட்டை கல்யாணசுந்தரம் தாண்டி நீண்ட வரலாறு கொண்டது.

இங்கே புலவர் புலமைப் பித்தன் அந்தக் காரியத்தை எடுத்து எவ்வளவு அழகாக, இயல்பான மொழி நடைக்குள் அடக்குகிறார் பாருங்கள். இந்தக் காட்சிக்கு “மனிதா மனிதா இனி உன் விழிகள் சிவந்தால்” போன்ற சிவப்புச் சிந்தனையின் உக்கிரம் நிறைந்த வரிகளைக் காட்டியிருந்தால் இங்கே அது பொருந்தாது அந்நியப்பட்டிருக்கும்.


“வானத்தை எட்டி நிற்கும் 

உயர்ந்த மாளிகை 

யாரிங்கு கட்டிவைத்து கொடுத்தது” 

எனும் போது காட்சியில் மார் தட்டும் அந்த ஏழைத் தொழிலாளி போலவே பாமரருக்கும் சென்று சேரக் கூடிய வரிகளோடே பயணப்படுகிறது இந்தப் பாடல்.

ஒரு கடவுள் மறுப்பாளராக இயங்கும் புலவர் புலமைப்பித்தன் சமுதாய சீர்திருத்தம் காண

இங்கே இறைவனை வேண்டவில்லை, போரடச் சொல்கிறார். 


தன்னுடைய வாழ்வின் இலட்சியத்தோடு பொருந்தக் கூடிய ஒரு படைப்பை ஆக்கச் சொல்லிக் கேட்பது ஒரு படைப்பாளிக்கு எவ்வளவு மகத்தான கெளரவம். அதைச் சிரமேற்கொண்டு எழுதித் தந்த புலவர் புலமைப்பித்தன் வரிகள் காலத்தைத் தாண்டி நிற்கும்.


🌼🌼🌼

ஆயிரம் கைகள் கூடட்டும் ஆனந்த ராகம் பாடட்டும் 

நாளைய காலம் நம்மோடு நிச்சயம் உண்டு போராடு 

வானகமும் வையகமும் எங்கள் கைகளில் என்றாடு 

🍃🍃🍃


https://youtu.be/Kyv_1k1SMu8


நம்மில் வாழ்ந்து கொண்டிருக்கும்

புலவரய்யா புலமைப்பித்தனுக்கு

இனிய பிறந்த நாள் வாழ்த்துகள்

❤️


கானா பிரபா