Pages

Friday, July 5, 2019

மரகதமணி என்ற கீரவாணி 🎸


கே.பாலசந்தரே எதிர்பார்த்திருக்க மாட்டார் அப்படியொரு இசைப் புரட்சியைத் தன் கவிதாலயா நிறுவனம் ஏற்படுத்தும் என்று. அது நிகழ்ந்தது 1992 ஆண்டில்.
ஒரு பக்கம் கே.பாலசந்தர் இயக்க "வானமே எல்லை" திரைப்படத்திற்கு ஒப்பந்தமாகிறார் இசையமைப்பாளர் மரகதமணி. இன்னொரு பக்கம் தன்னுடைய சிஷ்யர் சுரேஷ்கிருஷ்ணா இயக்கத்தில் “அண்ணாமலை” அதற்கு இசை தேவா, இவற்றௌத் தாண்டி புது இசையமைப்பாளர் ஏ.ஆர்.ரஹ்மான் இசையில் மணிரத்னம் இயக்கிய ரோஜா என்று மூன்றும் கே.பாலசந்தரின் கவிதாலயா நிறுவனம் சார்பில் தயாரித்து வெளியாகி, மூன்றுமே அதிரி புதிரி வெற்றியை அவருக்குப் பெற்றுக் கொடுக்கின்றன.
இதுவே கே.பாலசந்தரின் திரைப்பயணத்தில் கிடைத்த இறுதி வெற்றி கூட. அதற்குப் பின் அப்படியொரு வெற்றியை அவரால் ஈட்ட முடியாவிட்டாலும் இந்த மூன்று படங்களில் இயங்கிய இசையமைப்பாளர்கள் தொடர்ந்து தமித் திரையிசையின் போக்கைத் தீர்மானிக்க முக்கிய காரணிகளாக அமைந்தார்கள். இவர்களில் எம்.எம்.கீரவாணி என்று தெலுங்கிலும், மரகதமணி என்று தமிழிலும், எம்.எம்.கரீம் என்று ஹிந்தியிலுமாக இன்றுவரை வெற்றிகரமான இசையமைப்பாளராக விளங்கி வருபவரின் அடையாளம் தனித்துவமாகக் கவனிக்கப்பட வேண்டியது.
கவிதாலயா நிறுவனத்தின் சார்பில் புதுப்புது அர்த்தங்கள் படத் தயாரிப்பு மற்றும் இயக்கத்தைக் கவனித்த கே.பாலசந்தர், படத்தின் இசையமைப்பாளர் இளையராஜாவை விடுத்துத் தன்னிச்சையாக மரகதமணியை வைத்தே படத்தின் பின்னணி இசையை அப்படத்தின் பாடல்களின் இசைத் துணுக்குகளை வைத்தே ஒப்பேற்றி விடுகிறார். அதில் எழுந்த விரிசலால் தொடர்ந்து இருவரும் இயங்க முடியாத சூழலில் கவிதாலயா தயாரிப்பில் இதுவரை வெளியான இறுதிப்படமாக அமீர்ஜான் இயக்கிய “உன்னைச் சொல்லிக் குற்றமில்லை” விளங்குகிறது.
தொடர்ந்து கே.பாலசந்தர் “அழகன்” படத்தை இயக்கிய போது மம்முட்டியும் மூன்று நாயகிகளுமாக அமைந்த அழகிய காதல் சித்திரம் “அழகன்" படத்தின் பாடல்கள் அனைத்துமே தேன் சுவை. அதுவும் "தத்தித்தோம்" என்ற சித்ரா பாடும் பாட்டு தமிழ்த்திரையிசைப் பாடல்களில் மேற்கத்தேய வாத்தியம் ஒன்றோடு போட்டி போட்டுப் பாடும் மிகச் சில பாடல்களில் இதுவும் ஒன்று. இன்றுவரை காதலர் கீதமாக விழங்கும் “சங்கீத ஸ்வரங்கள் ஏழே கணக்கா” வைத் தனியே சொல்லவும் வேண்டுமா?
அதே சம காலத்தில் கேளடி கண்மணி பட வெற்றியைத் தொடர்ந்து பாலசந்தரின் சிஷ்யர் வஸந்த் கவிதாலயாவுக்காக இயக்கிய படம் "நீ பாதி நான் பாதி" இங்கும் மரகதமணி தான் இசை. இந்தத் திரைப்படத்தில் இருந்து எஸ்.பி.பாலசுப்ரமணியம் பாடும் "நிவேதா" என்ற பாடல் வெறும் ஸ்வரங்களோடு மட்டும் இசைக்கப்பட்ட பாடலாகப் புதுமை படைத்தது.
தொடர்ந்து "வானமே எல்லை" தமிழ்த்திரையுலகப் பிரபலங்களின் வாரிசுக்களை நாயகர்களாக்கி வந்த அந்தத் திரைப்படத்தில் நாகேஷ் மகன் ஆனந்த்பாபு, கண்ணதாசன் மகள் விசாலி, மேஜர் சுந்தரராஜன் மகன் கெளதம் போன்றோர் நடித்திருந்தனர். அண்ணாமலை படப் பாடல்கள் ஒரு பக்கம், மறு பக்கம் வானமே எல்லை பாடல்கள் என்று அப்போது ஒலிநாடாக்கள் விற்ற போது அண்ணாமலை வழியாகப் பரந்து பட்ட விளம்பரம் வானமே எல்லை இசையமைப்பாளர் மரகதமணிக்கும் கிட்டுகிறது.
‪நீ ஆண்டவனா, சிறகில்லை, நாடோடி மன்னர்களே என்று எதை எடுக்க எதை விட?‬
கம்பங்காடு பாட்டு வழியாக மரகதமணியின் குரலும் சேர, தமிழில் கம்பியூட்டரைக் காட்சிப்படுத்தி எடுத்த முதல் காதல் பாட்டு என்ற பெருமை வேறு. இந்தக் காட்சி தான் இன்றைய யுகத்தின் Video chat இன் முன்னோடி.
இந்து முஸ்லீம் கலவரப் பின்னணியில் இம்முறை பாலசந்தர் மலையாள நடிகர் முகேஷ் மற்றும் குஷ்புவை வைத்து ஜாதி மல்லி படத்தை இயக்கும் தருணம் அங்கேயும் மரகதமணியின் இசையில் குறை வைக்காத பாடல்களாக இனிக்கின்றன. கம்பன் எங்கு போனான் ஹிட்டடித்தது.
அப்போது ஏவிஎம் ‪நிறுவனமும் தன் பங்குக்கு பாட்டொன்று கேட்டேன் படத்தில் மரகதமணியை ஒப்பந்தம் செய்து தம் ஆஸ்தான இயக்குநர் வி.சி.குக நாதனைக் கொண்டு இயக்கினார்கள். ரகுமான் - சித்தாரா என்ற அப்போதைய புகழ்பூத்த ஜோடி இருந்தும் எடுபடாமல் போன அந்தப் படத்தில் பாட்டொன்று கேட்டேன் பாட்டு அப்போதைய சென்னை வானொலியின் உங்கள் விருப்பம் ஆனது.‬
‪இன்னொரு பக்கம் மரகதமணியின் தெகுங்குப் படங்கள் வரிசை கட்டி வந்தன. ஓட்ட வீராங்கனை அஸ்வினி நாச்சப்பாவின் நடிப்பில் “அஸ்வினி” மெளலி இயக்கி ஹிட் அடித்த படம், ஶ்ரீதேவியின் மொழி மாற்றுப் படமான ராம்கோபால்வர்மா இயக்கிய “என்னமோ நடக்குது” என்று வரிசையாகத் தமிழுக்கு வந்தன.‬
தொடர்ந்து தெலுங்கில் வெற்றிப்படமாக அமைந்த டாக்டர் ராஜசேகரின் நடிப்பில் வந்த திரைப்படமான "அல்லாரி பிரியுடு" , தமிழில் "யாருக்கு மாப்பிள்ளை யாரோ" என்று மொழிமாற்றப்பட்டபோது அருமையான பாடல்களை இவர் தமிழில் மொழிமாற்றித் தந்திருந்தார்.
இலங்கையில் பண்பலை வானொலிகளின் ஆரம்ப காலத்தில் அவற்றுக்குத் தீனி கொடுத்த பாடல்கள் இந்தப் படத்தில் இருந்து தான். பின்னாளில் என் வானொலி நிகழ்ச்சிகளிலும் அடிக்கடி நான் ஒலிபரப்பினேன். அந்த வகையில்
"அன்னமா உன் பேர் என்பது அன்னமா"
https://youtu.be/92Ry6OZkaT8
அட்டகாஷ் காதல் பாட்டு எஸ்.பி.பி அதைச் சந்தோஷத்திலும் சோகத்திலுமாகத் தனித்தனி வடிவத்தில் கொடுத்திருப்பார்.
"ரோஸ் ரோஸ் ரோஸ் ரோஜாப்பூவே"
https://youtu.be/edyDaJtnaO8
தமிழிலும் தெலுங்கிலும் காதலர்கள் நெஞ்சில் ஹிட் அடிச்ச எஸ்.பி.பி & சித்ரா ஜோடிப் பாட்டு.
எஸ்.பி.பாலசுப்ரமணியம் பாடும் "அன்னமா! உன் பேர் என்பது அன்னமா?" மரகதமணி/M.M. கீரவாணி இசையமைத்த பாடல்களிலேயே எனக்குப் பிடித்தமான பாடல்களில் முதல் இடத்தில் இருப்பது இதுவே.
நீண்ட இடைவெளிக்குப் பின் நடிகை ஸ்ரீதேவி , அரவிந்த் சாமியுடன் இணைந்து மலையாள இயக்குனர் பரதனின் இயக்கத்தில் "தேவராகம்" திரைப்படத்தில் நடித்திருந்தார். படத்தில் இடம்பெற்ற அத்தனை பாடல்களுமே காதில் தேன் வந்து பாயும் இனிமை கொண்டவை. அந்தத் திரைப்படத்தில் இருந்து " சின்ன சின்ன மேகம் என்ன கவிதை பாடுமோ", “யா யா யா யாதவா உன்னை அறிவேன்”ஆகிய ஜோடிப் பாடல்கள் இன்றும் இனிக்கும்.
எம்.எம்.கீரவாணிக்குச் சிறந்த இசையமைப்பாளருக்கான தேசிய விருதைக் கொடுத்தது "அன்னமய்யா" என்ற தெலுங்குப்படம். நாகர்ஜீனா நடிப்பில் 1997 ஆம் ஆண்டில் வெளிவந்தது இத்திரைப்படம்.
நடிகர் அர்ஜூன் ஐ ஆக்‌ஷன் கிங் என்ற எல்லைக்குள் மட்டும் அடக்கி விட முடியாது. அவர் காலத்துக்குக் காலம் பல இசையமைப்பாளர்களைக் கை தூக்கி விட்டிருக்கிறார். அந்தப் பாரம்பரியம் மரகதமணி, வித்யாசாகர், டி.இமான் என்று தொடரும்.
நடிகர் அர்ஜூனுக்கு வாழ்வு கொடுத்த படம் அவரே ரிஸ்க் எடுத்து இயக்கிய சேவகன். இதற்கு மரகதமணி தான் இசை. “நன்றி சொல்லிப் பாடுவேன்” பாடல் வெகு ஜன அந்தஸ்த்தைப் பெற்றதோடு சேவகன் வெற்றியிலும் பங்கு போட்டது.
தொடர்ந்து அர்ஜூன் இயக்கிய பிரதாப் படத்திலும் ஜோடி கட்டினார் மரகதமணி. “மாங்கா மாங்கா ரெண்டு மாங்கா” அப்போது A ரகப் பாட்டு ரசிகர்களுக்குத் தீனி போட்டது. ஆனாலும் “என் கண்ணனுக்கு காதல் வந்தனம்” பாடலில் தன் இசையில் மரகதம் பொருந்தியிருப்பதை நிரூபித்தார்.
அர்ஜூன் இயக்குநர் கே.எஸ்.ரவிகுமார் இயக்கத்தில்
கொண்டாட்டம் படத்தில் நடித்த போதும் மரகதமணி இசை ஜோடி சேர்ந்தார். கொண்டாட்டத்தில் “உன்னோடு தான் கனாவிலே” மரகதமணியின் பேர் சொல்லும் பாட்டு.
இன்று பாகுபலி வரை உச்சம் கண்ட மரகதமணியின் பாடல்கள் குறித்து ஆழ அகலமாக நீண்ட தொடர் எழுத வேண்டும். இன்று அவரின் பிறந்த நாளில் ஒரு பொழிப்புரை போல அந்த இனிய தொண்ணூறுகளில் இசை வசந்தம் படைத்த அவர் பாடல்களோடு வாழ்த்துகிறேன்.

🎸 இசையமைப்பாளர் செளந்தர்யன் 🥁

“ஆத்தாடி என்ன உடம்பு அங்கங்கே பச்ச நரம்பு”
இன்று சமூக வலைத்தளங்களைத் தெறிக்க விடும் பாட்டு.
விஜய் தொலைக்காட்சி நகைச்சுவை நட்சத்திரம் ராமர் 25 வருடங்களுக்குப் பின்பு தன்னுடைய நையாண்டிக்குப் பயன்படுத்திய பின்னர் தான் இப்படியொரு பாட்டை அறிந்து மூலப் பாட்டைத் தேடிப் போய் YouTube இல் பார்க்கும் மக்களும் இருக்கிறார்கள். அதற்கு YouTube இல் குறித்த பாடலுக்கு வரும் பின்னூட்டங்களே சாட்சி. இந்த மாதிரி ஒரு மீள் அறிமுகம் கிட்டியதும் ஹிப் ஹாப் தமிழா தன்னுடைய நட்பே துணை படத்துக்காக மீள் கலவை ஆக்கி அறுவடை செய்து விட்டார். இதற்கெல்லாம் ஆதியும் அந்தமுமான இசையமைப்பாளர் செளந்தர்யன் தான் பாடலின் ஆக்க கர்த்தா என்பதைச் சொல்லி வைத்துக் கொண்டே இந்தப் பகிர்வையும் கொடுக்க வேண்டியிருக்கிறது.
“காதல்.....கடிதம்....வரைந்தேன் உனக்கு வந்ததா வந்ததா.....” ஞாயிறு தோறும் சென்னை வானொலியில் வலம் வந்த உங்கள் விருப்பம் நிகழ்ச்சியில் அசரீரி போல் தொடங்கும் இந்தப் பாடலின் ஆரம்ப அடிகளைக் கேட்ட பரவசம் இன்னமும் மனதில் இருக்கிறது. யாரடா இது இளையராஜா மாதிரி ஒரு நேர்த்தியானதொரு பாட்டை கேட்ட மாத்திரத்தில் எடுத்த எடுப்பிலேயே கவர வைத்தது என்ற ஆச்சரியத்துடன் தான் அப்போது செளந்தர்யன் எங்களுக்கெல்லாம் அறிமுகமானார்.
இசையமைப்பாளர் செளந்தர்யன் இசைத்துறைக்கு வந்ததே இன்பமானதொரு விபத்துத்த்தான். இயக்குநராக எண்ணிக் கதை சொல்ல சூப்பர் குட்ஸ் ஆர்.பி.செளத்ரியிடம் போனவர், கூடவே கே.எஸ்.ரவிகுமாரையும் சந்திக்க வேண்டி வருகிறது. தான் கொண்டு போன கதையைச் சொல்லிக் கொண்டே இடையிடையே காட்சிகளுக்கேற்ப தானே மெட்டுக் கட்டித் தாளம் போட்டுப் பாடியவரைப் பார்த்ததும் “பேசாம என் படத்துக்கு இசையமைப்பாளர் ஆகிடுங்க” என்று கே.எஸ்.ரவிகுமார் சொல்லவும் அப்படியே ஆனவர் தான் இந்த செளந்தர்யன்.
“தன்னேனானே தானேனானே அம்மா....
தன்னேனனே தானே தன்னே தன்னன்னானே.....
ஏ சம்பா நாத்து சரக்காத்து...
மச்சான் சல்லுன்னுதான் வீசுதுங்க அங்கம் பூரா...”
எடுத்த எடுப்பிலேயே தன் அறிமுகப் படத்தை ஒரு ரம்மியமான தெம்மாங்குப் பாடலோடு தொடக்கி வைப்பது எப்பேர்ப்பட்ட வரம். அன்னக்கிளியில் இளையராஜாவுக்கு வாய்த்தது சேரன் பாண்டியனில் செளந்தர்யனுக்குக் கிட்டியது. ஸ்வர்ணலதாவுக்குப் பேர் சொல்லும் ஒரு கிராமியத் தெம்மாங்கு கிட்டியதோடல்லாமல் இன்றும் செளந்தர்யனைச் சிலாகிக்க வைக்கும் பாடலாகவும் அமைந்து விட்டது. வயற்காட்டியில் தோழிமார் பாடும் பாடல்
தனனானே தனனானே எனும் போது நுணுக்கமாக வரும் நறுக்காக வரும் இசைத் துணுக்கு ஒன்று வருடி விட்டுப் போகும். அது செளந்தர்யன் எவ்வளவு தூரம் நேர்த்தியாகத் தன் இசைப் பணியைக் கவனித்திருக்கிறார் என்பதைக் காட்டும்.
வாய்ப்புக் கிடைத்து விட்டதே என்று வாத்தியங்களை உருட்டி விளையாடாமல் ஒவ்வொரு பாடலுக்கும் அதற்கேற்ப தார்ப்பரியம் உணர்ந்து இசை கோத்திருப்பார். பொதுவாகவே இளையராஜாவின் ஆரம்ப காலப் படங்களாகட்டும், தேவாவின் இசையில் வந்த அண்ணாமலை உள்ளிட்ட காலத்து அவரின் தொடக்க காலப் படங்களாகட்டும் ஒலித்தரத்தில் சிறப்பை உணர முடியாது. ஆனால் சேரன் பாண்டியன் படத்தின் ஒலியமைப்பு வெகு நேர்த்தியாக இருக்கும்.
சூப்பர் குட்ஸ் ஆடியோ என்று தமது கம்பெனி பெயரிலேயே ஆர்.பி.செளத்ரி வெளியிட்டிருப்பதும் குறிப்பிடத்தக்கதொரு விடயம்.
பாடலாசிரியராகவும், இசையமைப்பாளராகவும் அறிமுக காலம் தொட்டே இயங்கிய வகையில் T.ராஜேந்தர், S.A.ராஜ்குமார் வரிசையில் செளந்தனுக்கும் அந்தப் பேறு கிட்டியது. அதை அவர் வெகு சிறப்பாகப் பயன்படுத்தினார் என்றே சொல்ல வேண்டும்.
சேரன் பாண்டியனைப் பொறுத்த வரை பலருக்கு வாழ்வளித்த படம். புது வசந்தம் மூலம் தமிழில் ஒரு திருப்புமுனை வெற்றிப் படத்தைக் கொடுத்த ஆர்.பி.செளத்ரி தொடர்ந்து விக்ரமனையே இயக்க வைத்த பெரும் புள்ளி படம் பெருந்தோல்வி. தொடர்ந்து கே.எஸ்.ரவிகுமார் இயக்கிய புரியாத புதிர் படமும் சுமார் ஓட்டம். இன்னொரு பக்கம் சரத்குமார் வில்லத்தனமான பாத்திரங்களில் இருந்து படிப்படியாக உயர்ந்து கொண்டு போக ஒரு கொழு கொம்பு தேவை. இந்த நிலையில் அண்ணன் - தங்கை பாசப் பிணைப்பு, குடும்ப உறவுகளுக்குள் விரிசல் என்ற இன்னொரு பரிமாணத்தில் ஈரோடு செளந்தர் பண்ணிய கதை தான் இவர்கள் எல்லோரையும் உயர்த்த வேண்டிய நிலை.
அதையே சேரன் பாண்டியன் செய்து காட்டியது.
நாட்டாமை படத்துக்கு முன்பே கே.எஸ்.ரவிகுமாரை முதலுக்குப் பாதகமில்லாத இயக்குநர் என்று சேரன் பாண்டியன் அடையாளப்படுத்தியதால் தான் அடுத்த இருபது ஆண்டுகள் கே.எஸ்.ரவிகுமாரை அடுத்தடுத்த கட்டங்களுக்கு நகர வழி கோலியது.
அந்த வகையில் செளந்தர்யனுக்குத் திறமை ஒரு பக்கம், அவல் மாதிரி ஒரு குடும்பச் சித்திரம் இன்னொரு பக்கம் அவரின் திறமைக்குத் தீனி போட வாய்த்தது. “தோல உரிச்சுப் போடுவன்” என்ற கொங்குத் தமிழ் கோவக்காரச் சரத்குமாரின் கல் மனசுக்குள்ளும் ஈரம் காட்ட “சின்னத் தங்கம் எந்தன் செல்லத்தங்கம் ஏன் கண்ணு கலங்குது”. இந்தப் பாட்டை இன்னமும் கிராமங்கள் கொண்டாடிக் கொண்டிருக்கின்றன.
“காதல் கடிதம் வரைந்தேன் உனக்கு வந்ததா வந்ததா” பாடலின் எளிமையான வரிகளே காதலர்களின் கடிதப் பரிமாற்றம் போல இருக்கும். https://youtu.be/GaZDYdiWSCU
லாப்சன் ராஜ்குமார் - ஸ்வர்ணலதா ஜோடி எப்படி அமைந்ததோ தெரியவில்லை. ஆனால் அந்தப் பாடலுக்கேற்ற கச்சிதமான காதல் மொழிக் குரல்கள் அவை.
“உயிரின் உருவம் தெரியாதிருந்தேன்
உனையே உயிராய் அறிந்தேன் தொடர்ந்தேன்”
என்று லாப்சன் பாடும் கணத்தில் காதலில் தோய்ந்து அந்த அறிமுகக் குரல் அந்நியமில்லாது அந்நியோன்யமாக நெஞ்சில் தங்கி இனிக்கும்.
“பயிலும் பொழுதில் எழுதும் எழுத்தில்
உனது பெயர் தான் அதிகம் எனக்கு”
அப்பப்பா பள்ளிக்கால இரட்டை ஜடைக் காதலியின் குரலோ இந்த ஸ்வர்ணக் குரல்.
ஒரு தேர்ந்த ஆட்டக்காரர் ஆனந்த்பாபுக்குக் காதல் சோகத்திலும் ஒரு வேக இசையைப் போட்டு “வா வா எந்தன் நிலவே வெண்ணிலவே”.
https://youtu.be/y-PfZVnR-Tc
இந்தப் பாடலை அந்தக் காலத்து ரெக்கார்டிங் பார்களில் கேட்ட போது ஒலி அதிர்வில் ஸ்பீக்கர்களே துள்ளியதை ரசித்திருக்கிறோம். எஸ்.பி.பி தன் பங்குக்கு காதல் சோகத்தைக் குரலின் வழியே உணர்வைக் கடத்துவார்.
“கண்கள் ஒன்றாகக் கலந்ததா”
https://youtu.be/plvaJV14PMg
எஸ்.ஏ.ராஜ்குமார்த்தனமான இசையில் மனோ - சித்ரா குழுவினர் பாடியதும் ஹிட்டடித்தது.
ஏழு பாடல் கணக்குக்கு “ஊரு விட்டு ஊரு வந்து ஒத்தையில மாட்டிக்கிட்ட”என்ற எஸ்.பி.சைலஜா குழுவின் குரலும் சேர்ந்து கொண்டது.
மலேசியா வாசுதேவன் குழுவினர் பாடும் “கொடியும் தோரணமும் குங்குமமும் தோரணமும்” மலேசிய வாசுதேவனும், சுனந்தாவும் அரிதாக ஜோடி சேர்ந்த இனிமையானதொரு குழுப்பாடல் என்று செளந்தர்யனுக்கு முதல் படத்திலேயே கிராமியம், குடும்ப செண்டிமெண்ட், இளம் காதலர் கீதம் என்று வித விதமாகக் கொடுக்கக் களம் அமைத்தது சேதஜ் பாண்டியன்.
“காகித ஓடம் கடலலை மீது ஓடமும் போலே போய் வருவோமே” கலைஞர் கருணாநிதி எழுதிய பாடல். கலைஞரின் இலக்கியம் மீது தீவிர வேட்கை கொண்டவர் செளந்தர்யன். அதன் பிரபலிப்பிலேயே அவரின் கவித்துவம் இசையோடு மிளிர்ந்தது. “சின்னத்தங்கம் எந்தன் செல்லத்தங்கம்”
https://youtu.be/wwGP_Dbx1Q0
பாடலில் காகித ஓடம் பாடலின் தொனி இருக்கும்.
பயிலும் பொழுதில் எழுதும் எழுத்தில்
உனது பெயர் தான் அதிகம் எனக்கு
வானம் கையில் எட்டினால்
அங்கும் உன்னை எழுதுவேன்
நிலவை கொண்டு வந்துதான்
பெயரில் வர்ணம் தீட்டுவேன்
உண்மை அன்பு ஒன்றுதான் இன்ப காதலில்
என்றும் வாழ்ந்திடும் இனிய சீதனம்...

“முதல் சீதனம்” ஈரோடு செளந்தர் முதன் முதலாக கதை, திரைக்கதை, வசனம் ஆகிய பொறுப்புகளோடு இயக்குநராகவும் அறிமுகமான படம். ஆம்னி ஆக முன்னர் மீனாட்சி, ஈரமான ரோஜாவே சிவாவுடன் இணைந்த படம்.
சேரன் பாண்டியன் படத்தின் வெற்றிக்குப் பின் சூப்பர் குட் பிலிம்ஸ் இன் ராசியான கதாசிரியாக ஈரோடு செளந்தர் ஆகி விட, தொடர்ந்து கதாசிரியராக இயங்கியவர்,
நாட்டாமை படத்துக்கு அவர் பண்ணிய கதை ஒரே இரவில் இன்னும் பன் மடங்கு உச்சத்துக்குக் கொண்டு போய் விட்டது. அதனால் நாட்டாமை படத்தின் வெற்றிக்கு நானே காரணம் என்று அப்போது அப்படத்தின் இயக்குநர் கே.எஸ்.ரவிகுமாருடன் ஊடல் கொண்டு பத்திரிகைகளுக்குப் பேட்டி எல்லாம் வைத்தார் ஈரோடு செளந்தர்.
“இசைக் கவிஞன்” என்ற சிறப்புப் பட்டம் செளந்தர்யனுக்குக் கிட்டியது. அந்தப் பட்டத்தோடே முதல் சீதனம் படத்துக்கு அவர் இசையமைத்தாலும் தேவாவின் ஆஸ்தான பாடலாசிரியர் காளிதாசனையும் இப்படத்துக்குப் பயன்படுத்திக் கொண்டார். கூடவே படத்தில் இடம் பெற்ற நாட்டுப்புறப் பாடல்களை ஈரோடு செளந்தர் எழுதினார். கருணா பாடகராக அறிமுகமானது இந்தப் படத்தில் தான். கூடவே எஸ்.பி.பி, மலேசியா வாசுதேவன், மனோ, ஸ்வர்ணலதா, மின்மினி, சித்ரா, உமா மகேஸ்வரி என்று பாடக நட்சத்திரக் கூட்டம்.
செளந்தர்யனின் பேர் சொன்ன படங்களில் முதல் சீதனம் படத்துக்குத் தனியிடம் உண்டு. தொண்ணூறுகளின் காதல் சோகப் பாடல்களில் “எட்டு மடிப்புச் சேலை இடுப்பில் சுத்தப்பட்ட ஒரு சோலை
https://youtu.be/aGxJeJssNE8
பாடல் தவறாது இடம் பெறும். எஸ்.பி.பியின் உருக்கமான குரலும் செளந்தர்ய இசையும் வெகு அற்புதம்.
கிராமத்துப் பேருந்துகளின் மாறாத பெயிண்ட் போல ஒட்டியிருக்கும் பாடல்களில் ஒன்றாக
“ஓ நெஞ்சமே உயிரே தஞ்சமே”
https://youtu.be/Iyf976axywM பாடலும் ஒட்டிக் கொண்டு முதல் சீனத்தை மறவாது வைத்திருக்கிறது.
“ஏய்! பாக்குறதுக்கு என்னமோ
பக்கா வில்லனாட்டம் தான் இருப்பேன்
நான் சொல்றபடி கேட்டு நடந்துகிறேன்னு வச்சுக்கோ
“நாந்தாண்டா கண்ணு கதாநாயகன்” இந்த முத்திரை வசனத்தோடு முக்கிய வில்லனாக மொட்டையடிச்சு, அதிக காட்சிகளோடு கே.எஸ்.ரவிகுமார் தோன்றிய படம்
“புத்தம் புதுப் பயணம்”. பின்னாளில் குஷ்புவோடு முத்துக் குளிக்க வாரீகளா படத்தில் ஜோடி போட முன்னோட்டமாய் அமைந்தது இந்தப் படம்.
சேரன் பாண்டியன் வெற்றியைத் தொடர்ந்து வந்த படம் இது. கதை, வசனம் பொறுப்பை ஈரோடு செளந்தர் கவனிக்க திரைக்கதையோடு இயக்கியவர் கே.எஸ்.ரவிகுமார்.
புது வசந்தம் காலத்து நான்கு நண்பர் சூத்திரத்தை (formula) வைத்துக் கதை பண்ணிய படம் இந்த புத்தம் புதுப் பயணம். நோயின் பிடியுல் இருக்கும் நண்பர்கள் மருத்துவமனையில் இருந்து தப்பி எஞ்சிய நாட்களையாவது சந்தோஷமாகக் கழிக்கலாமே என்று கிராமத்துக்கு வருகிறார்கள். அங்கோ வில்லன் பிடியில் இருக்கும் காதலர்களுக்கு ரட்சகர்களாகி உயிரை விடுகிறார்கள். ஆனந்த் பாபு, விவேக், கண்ணன், சின்னி ஜெயந்த் என்று நண்பர் கூட்டு. இதே கூட்டணி சம காலத்தில் வெளியான சூப்பர் குட்ஸ் இன் எம்.ஜி.ஆர் நகரில் (ஹரிஹரன் நகரில் மலையாளத்தின் தமிழ்ப் பதிப்பு) படத்தில் சின்னி ஜெயந்த் இற்குப் பதில் சார்லி நடிக்க இணைந்தது குறிப்பிடத்தக்கது.
புத்தம் புதுப் பயணம் படக் கதை அடுத்த ஆண்டே வந்த வானமே எல்லை படத்தின் கதைக்கு நெருக்கமானது. அங்கேயும் ஆனந்த் பாபு. ஆனால் வானமே எல்லை போன்று வசூலை வாராத படமாக புத்தம் புதுப் பயணல் அமைந்து விட்டது.
நகரம், கிராமம் இரண்டும் சரி பாதி இருக்கும் கதையமைப்பு என்பதால் செளந்தர்யனுக்கு இங்கேயும் நல்ல தீனி. ஆனால் இந்தப் படத்துக்கு அவர் கொடுத்த உழைப்பு சேரன் பாண்டியன் அளவுக்குப் பெரிய அளவுக்குப் போகாதது இசை ரசிகராக எனக்குப் பெரும் ஆதங்கம். உதாரணத்துக்கு
ஏ காலைப் பனி நேரத்திலே வந்த கன்னிப் பொண்ணு
https://youtu.be/1eMHXWT-nzw
கே.ஜே.ஜேசுதாஸ் குரலில் எவ்வளவு அற்புதமான பாட்டு.
மலேசியா வாசுதேவன் & மனோ குழுவினர் பாடும் “பாடுங்க்ளே” https://youtu.be/3delQPJkvwM
“மல்லிகைப் பூவு வாசம் மணக்குது மச்சான் மனசு சுண்டி இழுக்குது
https://youtu.be/hVbHIRhWpYo
போன்ற தெம்மாங்குப் பாடல்களோடு
ஏ பெண்ணே https://youtu.be/ty4wzMXLyjc
என்ற ராப் பாடலுமாக இங்கேயும் எஸ்.பி.பி, ஜேசுதாஸ், மலேசியா வாசுதேவன், மனோ, சித்ரா என்று நட்சத்திரப் பாடகர்கள். கொடுமை என்னவென்றால் Jio மற்றும் Saavin போன்ற பேர் போன தளங்களில் கூட பாடல்கள் வைரமுத்து என்றும் இசை வித்யாசாகர் என்றும் போட்டு வைத்திருக்கிறார்கள்.
பாடல்கள் அனைத்தையும் எழுதி இசையமைத்த செளந்தர்யன் “இசைக் கவிஞன்” என்ற பட்டத்துக்கு நியாயம் கற்பித்த படம் இந்தப் “புத்தம் புதுப் பயணம்”.

இசையமைப்பாளர் செளந்தர்யன் 🎸
சிந்துநதி பூ 🥁 முத்துக் குளிக்க வாரியளா
பாகம் 3
அடியே அடி சின்னப் புள்ள....:
ஆவி துடிக்குது நெஞ்சுக்குள்ள.....
கிராமத்தாளுகளிடம் பொதுவானதொரு ஒரு பழக்கம் உண்டு. முகமறியா யாரும் வந்தாலும் அவர்களை வரவேற்று இருத்தி, ஒரு வாய் சாப்புட்டுப் போறீங்களா என்று உபசரித்து விட்டுத்தான் மறு வேலை பார்ப்பார்கள்.
இந்தப் பழக்கம் கலைத் துறையிலிருந்து சினிமாப் பட ரசனை வரை நீண்டிருக்கிறது. அதனால் தான் நகரத்தில் ஒரு வாரமோ இரு வாரமோ ஓடி முடித்த அறிமுகங்களின் படங்கள் கிராமங்களில் அடி தூள் என்று ஓட்டம் ஓடியிருக்கின்றன.
இந்த ரசனை பாட்டுக் கேட்பதிலும் யார் இசையமைப்பாளர் என்ற பேதமில்லாது சமரசமின்றி
உள்ளடங்கியிருக்கிறது. அதனால் தான் “அடியே அடி சின்னப்புள்ள” பாடல் இன்னும் அங்கே ஒலித்துக் கொண்டிருக்கிறது, செளந்தர்யன் என்ற இசையமைப்பாளரின் அறிமுகம் இல்லாத இடத்தில் கூட.
சிந்து நதி பூ படம் வந்த போது குஞ்சுமோன் வருமான வரியை நஷ்டக் கணக்குக் காட்டவே இப்படி ஒரு படத்தைத் தயாரித்திருக்கிறார் என்று அவர் காது படவே (😀) பேசினோம். இல்லையா பின்னே ஜென்டில் மேன் என்ற உச்ச பட்ச பிரமாண்டத்தை எடுத்து விட்டு, அறிமுகங்களோடு ஒரு சாதா படத்தை எடுக்கிறாரே என்ற துணுக்குத் தான் காரணம். ரஞ்சித் முக்கிய நாயகனாக நடிக்க, மொட்டை மனோரமா, வடிவேலு, ஜெய்சங்கர் என்று தெரிந்த முகங்கள் சிலதோடு ராஜகுமாரியின் அறிமுகமும் அமைந்தது. செந்தமிழன் படத்தை இயக்கியிருந்தார். சிந்துநதி பூ என்ற தலைப்பே வித்தியாசமாக இருக்க, குஞ்சுமோன்
ஜென்டில் மேன் என்று தனக்குத் தானே பட்டம் சூட்ட ஆரம்பித்ததும் இங்கிருந்து தான்.
சிந்துநதி பூ படத்தை இன்றளவும் நினைவில் வைத்திருக்க உதவுவது படத்தின் இசை தான். செளந்தர்யன் தன் தாய் வீடான சூப்பர் குட்ஸ் இலிருந்து வெளியே வந்து பண்ணிய படம். அப்போது தயாரிப்பாளர் குஞ்சுமோன் படங்களுக்குத் தொடர்ச்சியாக ஏ.ஆர்.ரஹ்மான் இசையமைத்து வந்ததால் இந்த சிந்துநதி பூ படத்தின் பாடகர் தெரிவிலும் ரஹ்மான் தனம் இருக்கும். அப்போது ரஹ்மானின் பாசறையில் வளர்க்கப்பட்ட சாகுல் ஹமீது, சுஜாதா (மறு சுற்று), உன்னி மேனன் என்று அமைந்திருந்தார்கள். ரஹ்மான் இசையமைத்த உழவன் படத்தின் பாடல்களோடு நெருக்கம் போல இவை இருக்கும். இப்பேர்ப்பட்ட தன்மை பின்னாளில் மணிரத்னம் தயாரிப்பில் தேவா இசை கொடுத்த ஆசை, கார்த்திக் ராஜாவின் டும் டும் டும் படங்களிலும் மணிரத்னம் படங்களுக்கான பகட்டும், நிறமும் இருந்தது குறிப்பிடத்தக்கது.
சிந்து நதி பூ படத்தினை அடுத்த சுற்று விஜய் தொலைக்காட்சி ராமர் பிரபலமாக்கிய “ஆத்தாடி என்ன உடம்பு” பாடலை சாகுல் ஹமீது பாடும் போது இடையில் பொடிப் பயல் குரல் வருவது கூட சிக்கு புக்கு ரயிலே பாடலில் ஜி.வி.பிரகாஷ்குமார் குரலை ரஹ்மான் பாவித்த ஒற்றுமை இருக்கும்.
“அடியே அடி சின்னப் புள்ள” பாடலை மனோ & ஜானகி பாடியது போல, “மத்தாளம் கொட்டிதடி மனசு” பாடிய ஸ்வர்ணலதா & எஸ்.பி.பியும் சரி சமமாகக் கவர்ந்திருப்பார்கள். “குப்பையில நெல் வெளஞ்ச” என்ற மென் சோகப் பாடல் சாகுல் ஹமீது குரலிலும், “ஆலமரம் பெயர்த்தெடுக்கும் ஆடிக் காத்து” என்ற சுஜாதா குழுவினரும் பாட, “கடவுளும் நீயும்” என்ற பாடலை எஸ்.ஜானகி & உன்னிமேனன் பாடியிருப்பார்கள்.
சிந்துநதி பூ படத்தில் எனக்கு மிகவும் பிடித்த பாடல் என்றால் அது ஜேசுதாசும், ஆஷா லதாவும் பாடிய “ஆத்தி....வாடையில பட்ட மரம் கோடையில கொழுந்து விடாதா”
இந்தப் பாடலின் இசைக் கோப்பும் சரி, ஜேசுதாஸின் உச்ச ஸ்தாயியையும், நீள் சாதகத்தையும் கன கச்சிதமாகப் பயன்படுத்திய அதி அற்புதமான பாடலிது.
இதற்கு முன் சேரன் பாண்டியன் படத்தில் செளந்தர்யனே பாடலாசிரியராக இயங்கியிருந்தாலும் சிந்துநதி பூ படத்தின் அனைத்துப் பாடல்களையும் எழுதியவர் வைரமுத்து.
சிந்துநதி பூ பாடல்களைக் கேட்க
https://youtu.be/ybBJebIUF1A
கே.எஸ்.ரவிகுமார் சூப்பர் குட்ஸ் மூவிசும் இல்லாமல்
கதாசிரியர் ஈரோடு செளந்தரும் இல்லாமல் வெளியே வந்து இயக்கிய படம் “முத்து குளிக்க வாரீயளா”
சந்திரகுமார் கதை, வசனம் எழுதிய படம்.
விக்னேஷ், சங்கவி இளம் ஜோடியுடன் குஷ்புவும், பட்டாளத்தான் கே.எஸ்.ரவிகுமாருமாக நடித்த படமிது.
நாட்டாமை படத்தின் பெரு வெற்றிக்குப் பின் கே.எஸ்.ரவிகுமார் ரிஸ்க் எடுத்து ரஸ்கு சாப்பிட்டார் இதில்.
கே.எஸ்.ரவிகுமாருடன் செளந்தயன் இணைந்த மூன்றாவது படம் முத்துக் குளிக்க வாரீயளா.
பாடல்கள் அனைத்தையும் எழுதியவர் கவிஞர் காளிதாசன்.
“ஓஹோ ஹோ ஹோ தங்கமே தங்கம்
உனது முகம் பூவனம்......”
இன்றும் இலங்கையில் உள்ள பண்பலை வானொலிகளில் வாரம் தப்பாமல் இந்தப் பாடல் ஒலித்துக் கொண்டே இருக்கிறது. இசைஞானி இளையராஜா காலத்தில் அவரின் இசை சாம்ராஜ்ஜியத்தில் இசையமைப்பாளர்கள் பலர் ரசிகர் மனதில் பரவலான ஈர்ப்பைத் தக்க வைக்க முடியாமைக்கு ஒரு காரணம் என்ன தான் அற்புதமான மெட்டாக இருந்தாலும் இசைக் கோப்பில் கோட்டை விட்டு விடுவார்கள். ஒரு சீரான வாத்திய ஒழுங்கும், நேர்த்தியும் இருக்காது. ஆனால் இளையராஜாவுக்கு நிகரான அற்புதமான மெட்டுகளைக் கட்டி விடுவார்கள். அப்படி ஒன்று தான் இந்தப் பாட்டும்.
பொதுவாக இசையமைப்பாளர்களிடம் நீங்க இசையமைச்சதில் பிடிச்ச பாட்டு எது என்று கேட்டால் என்னோட எல்லாப் பாட்டுமே என் குழந்தைகள் தானே என்று மாமூலான பதில் வரும். ஆனால்
ஓஹோஹோ தங்கமே தங்கம் பாடல் தான் என் இசையமைப்பில் எனக்கு மன நிறைவைக் கொடுத்த் பாட்டு என்று செளந்தர்யன் குறிப்பிட்டிருக்கிறார்.
இந்தப் பாடல் முத்துக் குளிக்க வாரீயளா படத்தில் மனோ & சித்ரா குரல்களில் ஒலிக்கும். இந்தப் பாடலின் இன்னொரு சிறப்பு என்னவென்றால் வழக்கமாக முதலடியில் மட்டுமே வரும் ஆலாபனை இடை வரிகளிலும் வருமாறு இசையமைத்திருப்பார் உதாரணமாக “ஓஹோஹோ ஹோ அருகே வரணும்”.
மனோ, சித்ரா, அருண்மொழி, சுபா, சுஜாதா என்று நட்சத்திரப் பாடகர் கூட்டம் இருந்தாலும் ஒன்றே ஒன்று கண்ணே கண்ணு என்பதைப் போல “ஓஹோஹோஹோ தங்கமே” தங்கம் பாட்டு மட்டுமே வெகுஜன அந்தஸ்த்தைப் பெற்றது.
எப்படி கல்லுக்குள் ஈரம் பாரதிராஜாவுக்கு ஒரு கதாநாயக ஆசையை மூட்டியதோ அது போலவே நாட்டாமை வெற்றி தந்த பலத்தால் கே.எஸ்.ரவிகுமார் குஷ்புவுடன் ஆட்டம், பாட்டம் என்று முத்துக் குளிக்க வாரீயளா படம் எடுத்து சிப்பி கூட மிஞ்சவில்லை.
தொடர்ந்து இசையமைப்பாளர் செளந்தர்யன் & கே.எஸ்.ரவிகுமார் கூட்டணிக்கும் மண்ணை அள்ளிப் போட வாரீகளா என்று அமைந்து விட்டது.

நடிகர் ராமராஜன் நாயகனாக அரிதாரம் பூசத் தொடங்கியதிலிருந்து இசைஞானி இளையராஜா மட்டுமன்றி கங்கை அமரன், தேவா, எஸ்.ஏ.ராஜ்குமார், சிற்பி என்று பிற இசையமைப்பாளர் இசையிலும் நடித்துள்ளார். இவர்கள் எல்லோரும் ராமராஜனுக்குக் கொடுத்த பாடல்கள் சிறப்பாக இருந்தமையும் குறிப்பிடத்தக்கது.
அந்த வகையில் செளந்தர்யனும் தேர்வானது ஆச்சரியமானதொரு அதிஷ்டத்தையும் அவருக்குக் கொடுத்தது. ஏனெனில் கோபுர தீபம் படத்தின் பாடல்கள் அனைத்துமே வெளிவந்த காலத்தில் கேட்டு ரசிக்கப்பட்டன. அத்தோடு சுகன்யாவோடு ஜோடி சேர்ந்ததோடு இயக்கத்தையும் கவனித்துக் ராமராஜனுக்கு ஒரு கவனிப்பைக் கொடுத்தது இப்படம். அப்போது சரிந்து போய்க் கொண்டிருந்த ராமராஜன் மார்க்கெட்டுக்கு ஒரு நம்பிக்கையைக் கொடுத்த படம் “கோபுர தீபம்” எனலாம்.
“உள்ளமே உனக்குதான் உசுரே உனக்குதான்
உன்னையும் என்னையும் பிரிச்ச உலகமில்லையே”
எஸ்.பி.பி & அனுராதா ஶ்ரீராம் பாடிய இந்தப் பாடல் கோபுர தீபத்தில் உச்சம் எனலாம். ஸ்வர்ணலதாவுக்கு முத்தாக மூன்று பாடல்கள்.
“கங்கை காயும் காய்ந்து போக மாட்டேன்” சோகப் பாடலை எஸ்.பி.பி பாட, ஹம்மிங் ஆக ஸ்வர்ணலதா பயன்பட்டிருப்பது புதுமை.
“சாய்ஞ்சா சாயிற பக்கம்” என்ற நையாண்டிப் பாட்டில் மனோ குழுவினருடன், ஸ்வர்ணலதாவின் குறும்புக் குரல், “மாமா ஏ மாமாவே” மீண்டும் மனோவுடன் ஒரு காதல் பாட்டு,
“என்னுடைய பொண்டாட்டி எங்கேயோ பொறந்திருக்கா” வும் இந்தக் கூட்டத்தில் பிரபலமானது.
“என் வாழ்க்கை மன்னவனே” பாடலை செளந்தர்யம் எழுத, மீதிப் பாடல்களை வைரமுத்து கவனித்துக் கொண்டார்.
அப்போது மின்சாரக் கனவு படத்தின் பாடல்கள் வெளிவந்த போது கோபுர தீபம் படப் பாடல்களும் வெளிவந்ததால் இன்னும் பலரைச் சென்றடைய அது உதவியது.
இடைப்பட்ட காலங்களில் பல்வேறு படங்களுக்கு இசையமைத்தார். அதில் குறிப்பிடத்தக்கது சிந்துநதி பூ இயக்குநர் செந்தமிழன் தன் நாயகன் ரஞ்சித் மற்றும் ஆனந்த் பாபுவை வைத்து இயக்கிய சேரன் சோழன் பாண்டியன்.
பாடகி ஸ்வர்ணலதாவுக்குத் தொடர்ந்து வாய்ப்புகள் கொடுத்தவர்களில் செளந்தர்யன் குறிப்பிடத்தக்கவர்.
மேலும் செளந்தர்யன் இடை கொடுத்த
“கண்ணிமைக்கும் நேரத்துல..” என்ற கலாட்டா கணபதி திரைப்படத்தில் கிருஷ்ணராஜ் பாடிய பாடலும்
“ஆனந்தம் தான்... “ என்ற நெருப்பூ படப்பாடல் (உன்னிகிருஷ்ணன் & சுவர்ணலதா...”
தங்கள் ஊர்ப்பகுதிகளில் பிரபலமென சகோதரன் Hardinge Baskar K குறிப்பிட்டிருக்கிறார்.
இசையமைப்பாளர் செளந்தர்யன் அப்போது அடித்த தேவா, சிற்பி அலையால் காணாமல் போனார். இப்போதும் அவ்வப்போது இசையமைத்து வருகிறார்.
குறிப்பிடத்தக்க வெற்றிப் படங்கள் கிட்டியிருந்தால் அவரின் இன்னிசையைத் தொடர்ந்து பல்வேறு பரிமாணங்களில் கேட்க வாய்ப்பு கிட்டியிருக்கும். ஆனாலும் தொண்ணூறுகளில் தமிழ் இசை ரசிகர்களை ஆட்கொண்டவர் என்ற வகையில் மறக்கமுடியாதவொரு இசையமைப்பாளர் செளந்தர்யன்.

Thursday, March 14, 2019

பாடகர் ஜெயச்சந்திரன் 75 ❤️ சங்கீதமே….என் தெய்வீகமே நான் தேடும் என் காதல் ராஜாங்கமே 💕

“சுசீலாம்மாவுடன் பாடும் போது கூடப் பாடுபவரின் குரல் மங்கிப் போய் விடும். நாங்க கஷ்டப்பட்டு ஒரு பாடலின் expression ஐக் கொடுக்கும் போது அவர் அதை இரு மடங்காகக் கொடுத்து விடுவார். நமக்கு வாய் வலிக்கும்.
இசையமைப்பாளர் சரத் சொல்லுவார் ‘ஜெயேட்டா! சுசீலாம்மா சங்கதிகளை அவர் பாடுவதில்லை
அது அவருக்குள் இருக்கிறது”
இவ்வாறு இசையரசி P.சுசீலா அவர்களது சாகித்தியத்தைப் பய பக்தியோடு மெச்சுவார் பாடகர் ஜெயச்சந்திரன். ஜெயச்சந்திரன் 75 தொடரில் P.சுசீலா அம்மாவும் ஜெயச்சந்திரன் அவர்களும் இணைந்து பாடிய பல பாடல்கள் வரவிருக்கின்றன என்றாலும் இன்றைய பதிவுக்காக நான் தேர்ந்தெடுதது ஜி.கே.வெங்கடேஷ் இசையில் “காஷ்மீர் காதலி” திரைப்படப் பாடலான “சங்கீதமே என் தெய்வீகமே”
“தேன் சிந்துதே வானம்…
எனை உனைத் தாலாட்டுதே”
என்றொரு இளையராஜாத் தனமான பாட்டினால் தமிழ் இசை ரசிகர்கள் மனதில் இன்று வரை “யார் இந்த இசையமைப்பாளர்?” என்று தேடி நிலைத்தவர் ஜி.கே.வெங்கடேஷ். ஆனால் பல்லாண்டுகளுக்கு முன்பே மெல்லிசை மன்னர் எம்.எஸ்.விஸ்வநாதன் நட்பால் ஆதி தொட்டு இசையமைத்து வந்தவர் கன்னடப் பட உலகில் தனிக் காட்டு ராஜாவாகத் திகழ்ந்தார். அந்தக் காலத்தில் தமிழில் மெல்லிசை மன்னர் எம்.எஸ்.விஸ்வநாதன், தெலுங்கு கே.வி.மகாதேவன், கன்னடத்துக்கு ஜி.கே.வெங்கடேஷ் என்று எழுதப்படாத எல்லைகள் போட்டு இசை ராஜாங்கம் நடத்தினர். கன்னட சூப்பர் ஸ்டார் ராஜ்குமார் மட்டும் மொத்தம் 51 பாடல்களை ஜி.கே வெங்கடேஷ் இசையில் பாடிச் சாதனை படைத்தார் என்று விக்கிப்பீடியா புகழாரம் சூட்டுகிறது.
இசைஞானி இளையராஜாவின் இன்னொரு குரு, நீண்ட காலம் அவருடைய உதவியாளர். அதற்கும் மேலாக “பொண்ணுக்குத் தங்க மனசு” படத்தில் வரும் “தஞ்சாவூரு சீமையிலே” பாட்டுதான் என்னுடைய வரிகளில் ராஜா இசையமைத்த முதல் பாட்டு என்று கவிஞர் முத்துலிங்கம் வேறு பெருமையடித்துக் கொள்கிறார். இது இவ்வாறிருக்க
“காஷ்மீர் காதலி” படம் வெளியாகிறது. பாடல்களைக் கேட்டால் அதியற்புதமான இசைக் கோவை, இளையராஜாவின் வித்து எங்கிருந்து வளர்க்கப்பட்டது என்று நிரூபிக்க ஒரு படமாக அந்தப் படப் பாடல்கள் வந்தன. எல்லாப் பாடல்களுமே அப்போது சூப்பர் ஹிட். (அதில் ஏ.ஈ.மனோகரின் ஹிக்கிரி பலன பாடல் கூட உண்டு).
“காஷ்மீர் காதலி” படத்தைக் கதை, வசனம் எழுதி இயக்கிய மதி ஒளி சண்முகம் தன்னுடைய “நெஞ்சில் ஒரு முள்” படத்திற்கும் ஜி.கே.வெங்கடேஷ் ஐத் தான் இசையமைப்பாளராக்கியவர்.
நடிகை லதாவின் தம்பி, ஶ்ரீப்ரியாவின் கணவர் ராஜ்குமார் தான் காஷ்மீர் காதலி பட நாயகன்.
“அழகிய செந்நிற வானம் அதிலே உன் முகம் கண்டேன்” என்று எஸ்.பி.பாலசுப்ரமணியம் & எஸ்.ஜானகிக்கு ஒரு இசைப் பரிசென்றால் இன்னொரு பக்கம் P.சுசீலா & ஜெயச்சந்திரபை வைத்து “சங்கீதமே என் தெய்வீகமே” பாடல்.
இத்தனைக்கும் முன்பே ஜெயசச்சந்திரன் அவர்கள் ஜி.கே.வெங்கடேஷ் இசையில் “அழகு” படத்துக்காக (எஸ்.ஜானகியுடன்) “மெளனமல்ல மயக்கம்”
“பெண்ணின் வாழ்க்கை” படத்தில்
“மாசி மாதம்” ( P.சுசீலாவோடு)
பாடியதை றேடியோ சிலோன் ரசிகர்கள் மறக்க மாட்டார்கள். ஆனால் காஷ்மீர் காதலி படத்தில் இடம்பெற்ற “சங்கீதமே என் தெய்வீகமே” பாடல் முன்னைய பாடல்களில் இருந்து முற்றிலும் விலகிய ஒரு நவீனத்துவம் கொண்டது. ஜெயச்சந்திரனும் சரி சுசீலாவும் சரி அதிக நெகிழ்வுத் தன்மையோடு சாஸ்திரிய சங்கீதம் இல்லாது ஒரு இறுகிய குரலோடு
பாடலைக் கையாண்டிருப்பார்கள். உதாரணத்துக்கு பாடலின் ஆரம்ப வரிகளான “சங்கீதமே என் தெய்வீகமே” ஐ ஒருமுறை இரை மீட்டிப் பாருங்கள். இதை இன்னும் நெகிழ்வுத் தன்மையோடும் பாடிக் காட்ட முடியும். ஆனால் முழுப் பாடலிலும் இசை ஆவர்த்தனங்களின் கோட்பாட்டோடு பயணிக்கும் பாங்கில் இந்தக் குரல்களும் இருக்கும். பாடலில் கோவையாக்கிய இசையில் நவ நாலரிகம் நேர்த்தியோடு மிளிரும். இந்தப் பாடலையெல்லாம் இசை மேடைகளில் பாடினால் எவ்வளவு அற்புதமாக இருக்கும்?
“காஷ்மீர் காதலி” பாடல்கள் ஜி.கே.வெங்கடேஷ் மீண்டும் விஸ்வரூபம் எடுத்துக் காட்டியது. அதில் இந்த “சங்கீதமே என் தெய்வீகமே” பாடல் ஜெயச்சந்திரனின் இசை வாழ்வில் தவிர்க்க முடியாத ஒரு மைல்கல்.
சங்கீதமே….என் தெய்வீகமே
நான் தேடும் என் காதல் ராஜாங்கமே
என் ராஜாங்கமே…..
வானோரும் காணாத பேரின்பமே….
பேரின்பமே…..
பாடலை நல்ல ஒலித்தரத்தில் கேட்க
கானா பிரபா
ஜெயச்சந்திரன் இன்னும் வருவார்

பாடகர் ஜெயச்சந்திரன் 75 ❤️ ஒரு காதல் சாம்ராஜ்யம் கண்ணில் வரைந்தாள் கனவென்னும் முடி சூடிக் கன்னம் சிவந்தாள் 💕

இப்போதெல்லாம் சூப்பர் சிங்கர் மேடைக்கென்றே எழுதி வைத்த பாடல்கள் என்ற பட்டியலில் தவிர்க்க முடியாதது “நந்தா என் நிலா நிலா நிலா” என்ற பாடல். அதுவும் எஸ்.பி.பிக்கு முன்னால் பாட வேண்டிய சூழல் வரும் போது போட்டியாளர் தன்னிடமிருந்து அத்தனை திறமைகளையும் கொட்டித் தீர்க்க முற்படுவார். ஆனால் இந்தப் பாடல் இடம் பெற்ற “நந்தா என் நிலா” திரைப்படத்தில் இன்னொரு அரிய முத்து “ஒரு காதல் சாம்ராஜ்ஜியம் கண்ணில் வரைந்தாள்” பாடல் இருப்பதை ஏனோ இசை மேடைகள் மறந்து விட்டன.
“நந்தா என் நிலா” படத்தின் மூலக்கதை புஷ்பா தங்கதுரை, தினமணி கதிரில் தொடராக வெளிவந்து பின் ஏ.ஜெகன்னாதன் இயக்கத்தின் படமான போதும் புஷ்பா தங்கதுரையே கதை, வசனத்தைக் கையாண்டிருக்கிறார். விஜயகுமார், படாபட் ஜெயலட்சுமி, சுமித்ரா நடித்தது.
தொண்ணூறுகளின் இறுதியில் பிரபலமாக இருந்த சன் டிவி “சப்தஸ்வரங்கள்” பாடற் போட்டி நிகழ்ச்சியின் வழியாகத் தான் V.தட்சணாமூர்த்தி என்ற இசையமைப்பாளரை அறிந்து கொண்டேன். அதற்கு முன்னர் அவரின் இசையில் வெளிவந்த ஓரிரு தமிழ்ப்படங்களில் குறிப்பாக “நந்தா என் நிலா” என்ற பாடலை இலங்கை வானொலி மூச்சு விடாமல் முன்னூறு தடவைக்கு மேல் அலுக்க அலுக்கப் போட்ட போதெல்லாம் கூட இந்த இசையமைப்பாளர் குறித்த தேடல் இருந்திருக்கவில்லை. எழுபதுகளின் இறுதியிலே வி.குமார், விஜயபாஸ்கர், ஷியாம் போன்ற இசையமைப்பாளர்களின் இசையில் வந்த பல நல்ல பாடல்களை சங்கர் கணேஷ், எம்.எஸ்.விஸ்வநாதன் கொடுத்தவையாக இருக்கும் என்று அதிகம் மெனக்கடவில்லை. அந்த வகையில் வி.தட்சணாமூர்த்தி அவர்களை சுவாமிகள் என்று விளித்து அவரின் பெருமைகளை சப்தஸ்வரங்கள் நிகழ்ச்சித் தொகுப்பாளர் ரமணன் சிலாகித்தபோதுதான் அவர் மேல் வெளிச்சம் பட்டது எனக்கு. தமிழ்த்திரையுலகில் இரண்டு தட்சணாமூர்த்திகள் இருந்திருக்கிறார்கள், ஒருவர் எஸ்.தட்சணாமூர்த்தி இவர் அலிபாபாவும் 40 திருடர்களும்” போன்ற திரைப்படங்களுக்கு இசையமைத்தவர், பின்னவர் தான் வி.தட்சணாமூர்த்தி சுவாமிகள். கொஞ்சக்காலம் எல்லாவற்றையும் உதறவிட்டு காசிக்குப் போய் சாமியாராக இருந்ததாக செய்திகளின் வாயிலாக அறிந்தேன்.
“நந்தா என் நிலா” படத்தில் வந்த பாடலான எஸ்.பி.பாலசுப்ரமணியம் அவர்கள் பாடிய “நந்தா என் நிலா பாடலை விடவும் என்னை அதிகம் கவர்ந்ததென்னவோ ஜெயச்சந்திரன், டி.கே. கலா பாடியிருந்த “ஒரு காதல் சாம்ராஜ்யம் கண்ணில் வரைந்தேன்” என்ற பாடல் தான். அன்றைய சனிக்கிழமை இரவுப்பொழுதில் அதிகாலை ஒரு மணியைத் தொடும் போது வானொலி நிகழ்ச்சி செய்து கொண்டிருக்கும் என் தனிமையை விரட்டிப் பல தடவை சொந்தம் கொண்டாடிய பாடல் அது.
வானொலியின் பிறந்த நாள் வாழ்த்துப்பாடல்களில் எழுதப்படாத ஒப்பந்தமாக அமைந்து போன பாடல்களில் ஒன்று “நல்ல மனம் வாழ்க நாடு போற்ற வாழ்க”, ஒரு ஊதாப்பூ கண் சிமிட்டுகிறது திரைப்படத்துக்காக வி.தட்சணாமூர்த்தி இசையில் வந்த அந்தப் பாடலோடு அதே படத்தில் வந்த “ஆண்டவன் இல்லா உலகமிது” பாடலும் அப்போதைய இலங்கை வானொலி ஒலிபரப்பால் பிரபலமான பாடல்களில் ஒன்று.
மீண்டும் தொலைக்காட்சி வாயிலாகவே இன்னொரு நல்ல அறிமுகத்தைக் கொடுத்திருந்தது V.தட்சணாமூர்த்தி அவர்களின் கேரள சினிமாவுக்கான பணி. கே.ஜே.ஜேசுதாஸ் அவர்கள் ஐம்பது ஆண்டுகள் திரையுலகில் நிறைவாக்கியதை ஏஷியா நெட் தொலைக்காட்சி கொண்டாடியபோது, வி.தட்சணாமூர்த்திக்கான சிறப்பு கெளரவத்தையும் அவர் முன்னிலையிலேயே வழங்கியிருந்தார்கள். அப்போது கேட்ட “சந்த்ரிகையில் அலியுன்னு சந்த்ரகாந்தம்” என்ற பாடலை யூடியூபின் வழியாகக் கேட்டுப் பரவசம் கொண்டேன்.
இசைஞானி இளையராஜாவின் குருநாதர்களில் ஒருவர் இந்த தட்சணாமூர்த்தி. எம்.எஸ்.வியோடு இணைந்தது போலவே V.தட்சணாமூர்த்தியோடு இணைந்து இளையராஜா மலையாளத்தில் இசையமைத்த படம் “காவேரி”
இப்பேர்ப்பட்ட இசையமைப்பாளர் V.தட்சணாமூர்த்தி இசையில் நந்தா என் நிலா திரைப்படம் உருவான போது “ஒரு காதல் சாம்ராஜ்ஜியம் கண்ணில் வரைந்தாள்” என்ற ஜோடிப் பாடலை ஜெயச்சந்திரனும், T.K.கலாவும் பாடியிருக்கிறார்கள்.
“போய் வா நதியலையே”, “தாயிற் சிறந்த கோயிலுமில்லை” ஆகிய புகழ் பூத்த பாடல்களோடு “குளிச்சா குத்தாலம்”, “செங்காத்தே” ஆகியவற்றை ஏ.ஆர்.ரஹ்மான் இசையில் பாடியவர் T.K.கலா. அவர் இசை நிகழ்ச்சி படைக்க சிட்னி வந்திருந்த போது பேட்டி ஒன்றும் கண்டிருந்தேன்.
ஜெயச்சந்திரனைப் பொறுத்தவரை அவரின் ஆரம்ப காலத்தில் அரவணைத்து வளர்த்த மெல்லிசை மன்னர் விஸ்வநாதன் போன்றே அப்போது மலையாளத்தின் உச்ச இசையமைப்பாளராக விளங்கிய V.தட்சணாமூர்த்தி அவர்களின் பார்வை பட்டு மலையாளத்தில் மட்டுமன்றித் தமிழிலும் “நந்தா என் நிலா” வழியாகப் பாடும் பேறு கிட்டியிருக்கிறது.
“ஒரு காதல் சாம்ராஜ்ஜியம் கண்ணில் வரைந்தாள்” பாடலின் வரிகளை விடுத்து அந்தப் பாடல் கொண்டிருக்கும் சந்தத்தை மட்டும் ஒரு முறை மனதில் மீட்டில் பாருங்கள். ஒரு வீச்சுக்குள் (range) நின்று மேலும் கீழுமாக ஜாலம் புரியும் அற்புதமான சாகித்தியம் அது. ஆண், பெண் பாடகருக்கான சங்கதியும் ஒரே மாதிரி இருக்கும். அது போலவே தேர்ந்தெடுத்த இந்தப் பாடகர்களும் கொஞ்சமும் தடம் மாறாமல் அதே போலக் கொடுத்திருப்பார்கள். ஆனால் T.K.கலா தன் முத்திரை உச்ச ஸ்தாயி வரை போய் வர, ஜெயச்சந்திரனோ அதிக கஷ்டப்படாமல் தன் எல்லையில் நின்று அடித்து ஆடுவார்.
பகலான இரவோடு
அழகான மலரோடு
மனதோடு இசை பாடி
விதியோடு ஆடு……
ஒரு காதல் சாம்ராஜ்யம்
கண்ணில் வரைந்தாள்
கனவென்னும் முடி சூடி
கன்னம் சிவந்தாள்
உறங்காத உள்ளம்
நான் அறியாத பருவம்
நிலவின் மயக்கத்தில்
நீந்தும் முகம் – நீ
அருகிலிருந்தாலே தெய்வ சுகம்
பாடலைக் கேட்க
#Jeyachandran_songs

பாடகர் ஜெயச்சந்திரன் 75 ❤️ பொன்னென்ன பூவென்ன கண்ணே உன் கண்ணாடி நெஞ்சத்தின் முன்னே 💕

“The natural flow of the Tamil language gives a musical touch to Tamil which makes its songs much more musical”
இது பாடகர் ஜெயச்சந்திரனின் கூற்று. தமிழ்த் திரையுலக வாய்ப்புக்காக தமிழை இன்னோரன்ன வார்த்தை ஜாலமிட்டுப் புகழ்ந்து பேசும் பலரை நாம் கண்டிருப்போம். ஆனால் உள்ளார்ந்த நேசத்தோடு தமிழ் மொழியின் சிறப்பைத் தன் மேடைகளில் சொல்லி வரும் பாட்டுக்காரர் தான் இந்த ஜெயசந்திரன்.
இசைஞானி இளையராஜாவின் முதல் ஆஸி வருகைக்கு நண்பர் கதிர் ஏற்பாடு செய்த போது “யார் யாரை எல்லாம் சேர்க்கலாம் ஐயா?” என்று அவர் கேட்ட போது ஜெயச்சந்திரனும், ஜென்ஸியும் கண்டிப்பாக இருக்க வேண்டும் என்றேன். ஜென்ஸி இல்லாவிட்டாலும் ஜெயச்சந்திரன் இருந்தார். தமிழகத்துக்கு வெளியே இளையராஜா இசை மேடைக்காக ஜெயச்சந்திரன் நமக்காக ஒப்பந்தமான பெருமை கிட்டியது. கால தாமதம் வந்து ஆண்டுகள் கடந்து அந்த நிகழ்வு அரங்கேறிய போதும் நண்பர் கதிர் ஜெயச்சந்திரனைப் பேட்டி எடுக்க வைத்து அழகு பார்த்தார் என்னை.
மலையாள உலகத்தில் இருந்து பெருவாரியான பாடகர்கள் தமிழுக்கு வந்து ஆட்சி புரிந்திருக்கிறார்கள். அவர்களில் ஆனானப்பட்ட ஜேசுதாஸுக்கே ஆரம்பத்தில் தமிழ் உச்சரிப்பு பேதம் நிகழ்ந்திருக்கிறது. ஆனால் ஜெயச்சந்திரனைப் பொறுத்தவரை அவ்வாறானதொரு நிலை இருந்ததாக எனக்குப் படவில்லை. ஜெயச்சந்திரனின் 75 வது பிறந்த நாளாக கடந்த மார்ச் 3 ஆம் திகதி வந்த போது ஒரு சிறப்புப் பதிவு கொடுக்க வேண்டும் என்று மனம் பரபரத்தது. ஆனால் பத்தாயிரத்துக்கு மேற்பட்ட பாடல்களை மலையாளம் தொடங்கி தமிழ், தெலுங்கு, கன்னடம் என்று பரந்து விரிந்து சிறகடித்துப் பாடியவருக்கு ஒரு பதிவு ஓரவஞ்சனை அல்லவோ ஆகவே 75 பதிவுகள் அவரின் பாடல்களை வைத்து எழுதி விட வேண்டுமென்ற முனைப்பு இருக்கிறது. ஆனாலும் அந்த இலக்கில் தமிழ், மலையாளம் என்று வரையறுக்க வேண்டுமென்று முடிவு செய்திருக்கிறேன்.
“உறவுகள் தொடர்கதை உணர்வுகள் சிறுகதை” பாடலைக் கேட்கும் ஆனானப்பட்ட இளையராஜா பாடல்களைத் தின்று கொட்டை போட்டவர்களே
இன்னும் அதைப் பாடியது ஜெயச்சந்திரன் என்றே நம்பிக் கொண்டிருக்கிறார்கள். ஆகவே இந்தத் தேடலில் ஜெயச்சந்திரனின் பிரபலங்களைத் தேடி மட்டுமல்ல அவரின் அரிய பல எழுபதுகள், எண்பதுகளையும் முக்குளித்துப் பகிர ஆசை.
ஜெயச்சந்திரன் பிறந்த நாள் அறிந்த போது “ராசாத்தி உன்னை காணாத நெஞ்சு” பாடலைத் தான் மனசு முணுமுணுத்துப் பாடி வாழ்த்தியது. நேற்று இந்தப் பதிவை எழுதலாம் என்று நினைத்த போது “பூந்தென்றல் காற்றே வா” என்று சொல்லிப் பார்த்தது. ஆனாலும் இன்று தொடங்கலாம் என்று Notes இல் இறங்கிய போது என்னை எப்படி மறந்தாய் என்று வந்து குந்திக் கொண்டது “பொன்னென்ன பூவென்ன கண்ணே”.
றேடியோ சிலோன் காலத்து நினைவுகளில் மட்டுமல்ல, பலரின் கிடுகுவேலிக் காதல் கதைகளுக்கும் பாலமாக அமைந்தது இந்த “பொன்னென்ன பூவென்ன கண்ணே”
இயக்குநர் ஶ்ரீதர் “அலைகள்” படத்தை இயக்கிய போது அப்போது தான் கன்னடத்தில் ஒரு தேசிய விருதுப் படத்தில் அறிமுகமான விஷ்ணுவர்த்தனை நாயகனாக்கிக் கொண்டார். “சாகச சிம்ஹா” என்று சந்தன சினிமா உலகம், அதாங்க கன்னடத் திரையுலகில் மறைந்தும் மறையாப் புகழ் கொண்டவர் ஒரு அழுத்தமான கதையம்சம் கொண்ட தமிழ்ப்பட வாய்ப்பைத் தன் ஆரம்ப காலத்தில் பெற்றது தமிழ்த் திரையுலகுக்கும் பெருமை. பின்னாளில் ஈட்டி, விடுதலை என்று நடித்த போதும் அலைகள் தான் அவருக்கு அடையாளம்.
அலைகள் படத்தைப் பலர் மறந்தாலும் அதை நினைப்பூட்டுவது இந்த “பொன்னென்ன பூவென்ன கண்ணே”. மெல்லிசை மன்னரின் கை வண்ணத்தில் அமைந்த பாட்டு தமிழுக்கு ஜெயச்சந்திரனைச் சிவப்புக் கம்பளம் போட்டு வரவேற்றது. இதற்கு முன்பே “மணிப்பயல்” படத்தில் “தங்கச் சிமிழ் போல்” என்ற பாடல் வழியாக இதே ஆண்டு மெல்லிசை மன்னரால் அழைத்து வரப்பட்டவர் ஜெயச்சந்திரன் (மணிப்பயல் தகவல் நன்றி ஜி.ராகவன்)
ஆனால் “பொன்னென்ன பூவென்ன கண்ணே” அவருக்குப் பரவலான அறிமுகத்தைக் கொடுத்தது.
“களித் தோழன்” என்ற மலையாளப்படத்தில் அறிமுகமானவர் (பாருங்கள் முதல் படத் தலைப்பே எவ்வளவு பொருத்தம் ஜெயச்சந்திரன் எங்கள் களிப்பில் பங்கெடுக்கும் தோழன் தானே?)
தமிழுக்கு வருவதற்கு முன்பே மெல்லிசை மன்னரின் “பனிதீராத வீடு” படத்தில் “நீலகிரியுடே” சுப்ரபாதம் பாடி கேரளத்தின் சிறந்த பாடகர் விருதைப் பெற்றவர் அதே மெல்லிசை மன்னர் வழியாகத் தமிழுக்கும் விருந்து வைத்தார்.
கன்னடத்தின் மிகப்பெரிய நட்சத்திரம் விஷ்ணுவர்த்தன், மலையாளத்தின் வழி உயர் பாடகர் ஜெயச்சந்திரன் இருவரையும் “அலைகள்” இணைத்தது பொன்னென்ன பூவென்ன கண்ணே” வழியாக.
“பொன்னென்ன பூவென்ன கண்ணே” பாடலைக் கேட்கும் தினமெல்லாம் அசரீரியாக ஒரு காதல் ஜோடிப் பாடல் போல உணர்வெழும். ஆனால் தனித்து நின்று ஜாலம் புரிவார் ஜெயச்சந்திரன். அடிப்படையில் மலையாளியாக இருந்தாலும் தமிழென்று வந்து விட்டால் கண்டிப்பான வாத்தியாராக ஆகி விடும் மெல்லிசை மன்னர் எம்.எஸ்.விஸ்வநாதனுடன், தமிழ் மேல் காதல் கொண்ட இளைஞன் ஜெயச்சந்திரன் தனது 29 வது வயதில் பாடிய பாடலைக் கேட்டுப் பாருங்கள். ஒரு பிசிறு இருக்காது மொழி உச்சரிப்பில். பாடலைக் கேட்கும் போது ஊஞ்சலில் அமர்த்தித் தள்ளி விடும் உணர்வெழும். பாட்டின் சந்தத்தோடு மிக நெருக்கமாகத் தனக்கே உரித்தான தணிந்த குரலில் உருக்கம் காட்டுவார் நம் ஜெயச்சந்திரன்.
செவ்வான மேகங்கள் குழலாகுமா
செந்தூரம் விளையாடும் முகமாகுமா
நடை போடுமா இசை பாடுமா
நடந்தாலும் அவை யாவும் நீயாகுமா
பொன்னென்ன பூவென்ன கண்ணே – உன்
கண்ணாடி உள்ளத்தின் முன்னே
ஒரு கல்யாணப் பெண்ணாக உன்னைப்
புவி காணாமல் போகாது பெண்ணே
ஜெயச்சந்திரன் இன்னும் ஒளிருவார்….

Monday, February 4, 2019

அஜித்குமாருக்காக பாடகர் ஹரிஹரன் 🎸


விஸ்வாசம் காய்ச்சல் ஏனோ அந்தப் படம் பார்த்த பின் தான் அதிகம் அடிக்கிறது. மகளைப் பெற்ற அப்பாவுக்குத் தான் புரியும் என்று தூக்குத்துரை ஒரு பக்கம் அழ வச்சுட்டார், “கண்ணான கண்ணே” பாடல் கேட்டால் இன்னும் ஒரு படி நெகிழ வைத்து விடுகிறது.
என்ன வழக்கமான டியூனைத் தானே போட்டிருப்பார் D.இமான் என்று நினைத்திருந்த வேளை சகோதரன் துஷ்யந்தன் Thushyanthan Vettivel இந்தப் படத்தில் வரும் “வானே வானே” பாடலைப் பற்றி அக்குவேறு ஆணிவேறாக அழகாக எழுதினாலும் எழுதினார் போச்சு அதிலிருந்து அந்தப் பாட்டில் ஒரு ஈர்ப்பு வந்தது. படத்தில் மிகப் பொருத்தமாகப் பாடலும் வந்து உட்காரவும் இதன் மீதான ஈர்ப்பு இரட்டிப்பாகி விட்டது. திரும்பத் திரும்பக் கேட்கிறேன்.
அப்போதுதான் எண்ணிப்பார்த்தேன் “வானே வானே” பாடலில் ஸ்ரேயா கோசலுடன் பாடும் இந்த ஹரிஹரனை ஏறக்குறைய மறந்து போன ஒரு யுகத்துக்குப் போய்க் கொண்டிருக்கிறோமோ என்று.
தொண்ணூறுகளில் ஹரிஹரன் ஒரு பக்கம், உன்னி கிருஷ்ணன் ஒரு பக்கம் ஏரியா பிரித்து வகை தொகையில்லாமல் பாடி வந்தார்கள். 90s kids இல் ஒன்றைப் பிடித்து “டேய் தம்பி உனக்கு எந்தப் பாடகரைப் பிடிக்கும்?” என்று கேட்டால் ஹரிஹரனுடைய ஏதாவது ஒரு பாடலை சுதி மீட்டுமளவுக்குத் தொண்ணூறுகளில் தொட்டிலில் தொடக்கி வைத்தவர். அது தனியாக, விரிவாகப் பார்க்க வேண்டிய விடயம்.
அன்றைய நட்சத்திர நாயகர்களுக்கு குறிப்பாக இளம் நடிகர்களுக்கு ஹரிஹரன் பாட்டு ஒட்டிக் கொண்டு விடும். இவர்களில் தனியே அஜித்குமாரை மட்டும் பிரித்துப் பார்த்தேன்.
“கொஞ்ச நாள் பொறு தலைவா அந்த வஞ்சிக்கொடி இங்கே வருவா” என்று 1995 இல் ஆசை படத்தில் தான் அஜித்துக்காக முதலில் ஹரிஹரனைப் பாட வைத்துப் புண்ணியம் கட்டிக் கொண்டார் தேனிசைத் தென்றல் தேவா. பின்னர் கல்லூரி வாசல் படத்தில் 
“என் மனதைக் கொள்ளை அடித்தவளே” பாடலைக் கூட நடித்த பிரசாந்துக்குக் கொடுத்து விட்டார்.
அன்றைய காலகட்டத்தில் வானொலி நிகழ்ச்சி செய்யும் போது “காஞ்சிப்பட்டுச் சேலை கட்டி” பாடலோடு தான் எங்கட திருக்குமார் அண்ணர் Thirukkumar Thirunavukkarasuநிகழ்ச்சியைத் தொடங்குவார். அவரின் வயசுக்கு அது அவருக்குத் தேசிய கீதம். “ரெட்டஜடை வயசு” படத்தில் வந்தது அந்தப் பாட்டு.
இப்படி ஒன்றொன்றாகக் கொடுத்து வந்த தேவா ஒரேயொரு பாடலை மட்டும் நவீனுக்கும், மனோவுக்கும் கொடுத்து விட்டு மீதி நான்கு பாடல்களையும் ஹரிஹரனுக்குக் கொடுத்த கொடை வள்ளல் ஆனார் “உன்னைத் தேடி” படத்துக்காக.
ஹரிஹரனின் தமிழ்த் திரையிசைப் பயணத்தில் உன்னைத் தேடி பாடல்கள் மிக முக்கியமானவை என்பேன். “நாளை காலை நேரில் வருவாளா” கிட்டத்தட்ட அவள் வருவாளா பாடலின் அலைவரிசை. “மாளவிகா மாளாவிகா” பாட்டு உருக வைக்கும் காதல் பாட்டு என்றால் “நீதானே நீதானே” காதல் துள்ளாட்டம், கூடவே ஹரிஹரனின் தனி ஆவர்த்தனமாய் “போறாளே போறாளே” என்று அட்டகாஷ் இசைத் தொகுப்பு இந்த உன்னைத் தேடி.
பாடலாசிரியர்கள் மூவரில் பழனி பாரதியின் முத்திரையான ஒரே சொல்லின் இரட்டை அடுக்கு வரிகள் அடையாளம் கற்பிக்கும்.
தொடர்ந்து தேவா – ஹரிஹரன் இசைக் கூட்டில் அஜித்குமாருக்குக் கிடைத்ததெல்லாம் அவல். சந்தேகம் இருந்தால் பட்டியலைப் பாருங்கள்,
“ஓ சோனா ஓ சோனா” என்று வாலியிலும் “செம்மீனா விண் மீனா” என்று ஆனந்தப் பூங்காற்றேவிலும் (இதே படத்தில் கார்த்திக்குக்கு “சோலைக்குயில் பாட்டு சொல்லிக் கொடுத்தது யாரு, பாட்டுக்கு பாலைவனம், வைகாசி ஒண்ணாந்தேதி என்று மூன்று பாட்டுகள் ) என்று பயணம் தொடர்ந்தது.
“ஏஹேஹே கீச்சுக் கிளியே 
என் காதில் தித்தித்தாய்
இசையாலே எனது புதிய நாளை,
நீ இன்று திறந்தாய்”
புத்தாயிரம் ஆண்டின் திறவுகோலாய், அஜித்துக்கு முகவரி கொடுத்த படத்தை மறக்க முடியுமா? 
அதே படத்தில் ஸ்வர்ணலதாவோடு கூட்டுச் சேர வைத்து ஹரிஹரனைப் பாட வைத்தார் தேவா “ஓ நெஞ்சே நெஞ்சே” என்று.
ரோஜா காத்து, நவம்பர் மாதம் என்று “ரெட்” படத்திலும் “ஆஸ்திரேலியா தேசம்” காட்டிய சிட்டிசனிலுமாக தேவா அதிகபட்சம் ஹரிஹரனை அஜித்குமாருக்காகப் பாவித்தார்.
எஸ்.ஏ.ராஜ்குமாரும் விட்டு வைக்கவில்லை. 
“ஓ வந்தது பெண்ணா….
வானவில் தானா” 
என்னவொரு அற்புதமான பாடல் “அவள் வருவாளா” படத்தில் அஜித்துக்குக் கொடுத்தார்.
அஜித் படமென்றாலும் இன்னொருவருக்குப் பாட்டுச் சேர்ந்த விதத்தில் “ஒரு தேவதை வந்து விட்டாள்” பாடல் நீ வருவாய் என படத்தில் பார்த்திபனைச் சேர்ந்தது. அது போலவே ரஹ்மான் இசையில் “கண்டு கொண்டேன் கண்டு கொண்டேன்” படத்தின் அதே வரிப் பாடல் அப்பாஸுக்குப் போனது. 
தோல்விப் படமென்றாலும் இசை வசந்தம் எஸ்.ஏ.ராஜ்குமாரின் “உன்னைக் கொடு என்னைத் தருவேன்” முத்திரை பதித்ததில் “இதயத்தைக் காணவில்லை” என்று அஜித்தாக வந்தார் ஹரிஹரன்.
ராஜா படத்திலும் மகாலஷ்மியோடு ஹரிஹரனை ஜோடியாக்கி “ஒரு பெளர்ணமி” பாடல் அர்ப்பணம் ஆனது.
‪இசையமைப்பாளர் சிற்பியின் பங்குக்கு “ராசி” படத்தில் பூமாலை கட்டினார் ஹரிஹரன்.‬
வைரமுத்து – பரத்வாஜ் – சரண் கூட்டணிக்கு நட்சத்திர அந்தஸ்த்தைக் கொடுத்த அஜித் படங்களில் தலையாயது “காதல் மன்னன்”.
“வானும் மண்ணும் வந்து ஒட்டிக் கொண்டதே”
பாடல் பரத்வாஜ் இன் இசை யாத்திரையில் அற்புதமான இசைக்கம்பளம்.
“கொஞ்சும் மஞ்சள் அழகே உன்னைச் சொல்லும்” கார்த்திக் ராஜாவுக்கு அதிக வெளிச்சத்தைக் கொடுத்த “உல்லாசம்” படத்தில் இந்தப் பாடல் தனித்து நின்று ஜாலம் புரியும். ஹரிஹரன் & ஹரிணி ஜோடி குரல்களில் ஒரு அந்நியோன்யம் என்றால் இசையிலும் புதுமை காட்டியது. ‪இங்கேயும் இந்தப் பாட்டு அஜித்துக்கு இல்லாது விக்ரமுக்கு ஆனது.‬
தல என்ற கிரீடத்தை அஜித் மேல் வைத்த தீனா படத்தின் ஒவ்வொரு பாடல்களும் யுவன் ஷங்கர் ராஜா இசையில் தேனிசை. அதில் “சொல்லாமல் தொட்டுச் செல்லும் தென்றல்” ஏற்ற இறக்கங்களில் ஹரிஹரனைத் தாண்டி யாரைச் சிந்திக்க முடியும்?
கார்த்திக் ராஜா, யுவன் போலவே இளையராஜா இசை கொடுத்த “தொடரும்” படத்தில் “ஷாக்கடிக்கும் பூவே” பாடலைத் தன் பங்குக்குச் சேர்த்தார்.
“அன்பே அன்பே நீ என் பிள்ளை” பாடலைக் கேட்ட்லேயே மடியில் வைத்துத் தாலாட்டுவது போலிருக்கும். “உயிரோடு உயிராக” படத்தில் உருக்கிய வித்யாசாகர்,
“ஒரே மனம் ஒரே குணம் ஒரே இடம் சுகம் சுகம்” என்று வில்லனில் நெகிழ வைத்து விட்டார். ஹரிஹரனுக்கே உரித்தான அந்த நாசிக் குரலைக் கேட்டுக் கொண்டே இருக்கலாம். இந்தப் பதிவுக்காக அந்தப் பாட்டைக் கேட்கத் தொடங்கியவன் வகை தொகையில்லாமல் கேட்டுக் கொண்டே இருந்தேன். அதுதான் வித்யாசாகரின் இசை மாயம்.
தேகத்துக்குள் தூங்கும் இன்பம் தட்டி எழுப்பு
தேடித் தேடி செல்களில் எல்லாம் தேனை நிரப்பு
என் உற்சாகத்தை கட்டி காப்பது உந்தன் பொறுப்பு
உள்ளே நெருப்பு……..
ஒரே மனம் ஒரே குணம் ஒரே இடம் சுகம் சுகம்
இதே நிலை இதே கலை இதே கதை இதம் இதம்
கானா பிரபா
31.01.2019


இந்தப் பதிவில் இடம்பெற்ற பாடல்களில் அஜித்குமார் தோன்றும் பாடல்களின் காண் தொகுப்பு
https://www.youtube.com/watch?list=PLOXBz6eZeFMdrbr-gauUg1Z_qXGyuejTI&v=GrXy0Eez4ds

Wednesday, January 16, 2019

இசைஞானி இளையராஜாவின் 🎸❤️ வெள்ளி விழா ஆண்டுப் பொங்கல் விருந்துகள் 🌴🌾

அமைதிப்படை

மகா நதி

ராஜகுமாரன்

வீட்ல விசேஷங்க

சேதுபதி ஐ.பி.எஸ்


இவை 1994 ஆம் ஆண்டு தைப்பொங்கலுக்குத் தமிழின் முன்னணி நட்சத்திரங்கள் நடித்து இசைஞானி இளையராஜாவின் இசைப் பங்களிப்பில் வெளிவந்த படங்கள்.


இப்போது நினைத்துப் பார்த்தால் ஒரு பிரமிப்பை எழுப்பக்கூடிய யுகத்தைக் கடந்து வந்திருக்கிறோம் என்பதைத் தற்காலச் சூழலோடு ஓப்பிட்டு வியக்க முடிகிறது. இது அன்றைய பொங்கலுக்கு மட்டுமல்ல 25 ஆண்டுகளுக்கு முந்திய தீபாவளிகள், தைப்பொங்கல்கள், சித்திரைப் புத்தாண்டுகள் என்று இசைஞானி இளையராஜாவின் இசையில் ஒரு பெரும் நட்சத்திரக் கூட்டுகளோடு ஒரு சேரப் படங்கள் வெளியாகிப் பட்டையைக் கிளப்பியிருக்கின்றன.

இதை single, single ஆகப் பாடல் வெளியிடும் இக்காலத்தில் மட்டுமல்ல இனி எக்காலத்திலும் நினைத்தே பார்க்க முடியாத சாதனை என்ற அளவிலேயே வைத்துப் போற்ற முடிகிறது. 


இம்மட்டுக்கும் இம்மாதிரித் தொகையாக வரும் படங்களின் பாங்குகளைப் பாருங்கள். உதாரணத்துக்கு 1994 ஆம் ஆண்டுப் பொங்கல் படங்களை எடுத்துக் கொண்டால் “மகா நதி” ஒரு துன்பியல் பின்புலத்தோடு நகரும் குடும்பச் சித்திரம், “அமைதிப் படை” எக்காலத்து அரசியலோடும் ஓப்பு நோக்கக் கூடிய முழுக்க முழுக்க யதார்த்தம் மிகுந்த உதாரணங்கள் கொண்ட அரசியல் நையாண்டி, “ராஜகுமாரன்” ஒரு நட்சத்திர நாயகனின் நூறாவது படம் எனவே எல்லாவிதமான பொழுது போக்கு அம்சங்களும் கலந்திருக்க வேண்டியதொரு படைப்பு, “சேதுபதி IPS” ஒரு நேர்மையான போலீஸ் அதிகாரியின் டயரி, பாக்யராஜ் தனமான என்ற அளவுக்கு முத்திரை பதிக்கும் குடும்பச் சித்திரங்கள் வரிசையில் “வீட்ல விஷேசங்க”.

இந்தப் படங்களை எடுத்துப் பார்த்தால் ஒவ்வொரு கதைக்களமும் ஒவ்வொரு நிறம். அந்த நிறத்தைத் தூக்கி நிறுத்துவது இசை என்ற ஆதார வேர் என்ற அளவுக்கு இசைஞானி இளையராஜாவின் இசை இயங்கியிருக்கிறது.

ஒரு மனிதன் எப்படிச் சட்டுப் புட்டென்று தன் சுபாவத்தை மாற்றிக் கொண்டு நகர முடிகின்றது என்ற ஒரு யதார்த்த உலகின் வியப்பை, இளையராஜாவின் இசையிலும் எழுப்ப முடிகிறது. இந்தப் படங்களுக்கெல்லாம் இசையமைக்கும் போது ஒரு குறுகிய கால இடைவெளியில் மனுஷர் எப்படித் தன் இயல்பை நொடிகொரு தரம் மாற்றி இன்னொரு படைப்பில் இறங்கி வித்தியாசப்பட்டு நிற்கும் இசைக் கோவையைப் படைக்க முடிகிறது? இது சாதாரணர்களின் உலகில் நினைத்துப் பார்க்க முடியாதவொரு பண்பும், உழைப்பும்.


“சொல்லி விடு வெள்ளி நிலவே சொல்லுகின்ற சேதிகளையே” அமைதிப் படை படத்தின் மொத்தம் ஆறு பாடல்களில் என்னமோ திரையில் காட்சிப்படுத்தாத இந்தப் பாடல் தான் காலத்தைத் தாண்டிப் பரவலாக நிலைத்து நிற்கின்றது. தொடர்வது “முத்துமணித் தேர் இருக்கு”. இந்தப் பாடல்களை விட அமைதிப் படை படத்தில் ஒரு வரண்டதொரு போக்கில் நகரும் அரசியல் படத்துக்குத் துணை நின்றது இளையராஜாவின் பின்னணி இசை.


அமைதிப் படை பாடல்களைக் கேட்க

https://youtu.be/mkfOcC6LRB4



“சின்ன வீடு” படத்துக்குப் பின் தொடர்ந்த ஆண்டுகளில் இசையமைப்பாளராகவும் இயங்கிய பாக்யராஜை மீண்டும் இளையராஜாவின் கூடு திரும்ப வைத்தது பஞ்சு அருணாசலம் தயாரித்த “ராசுக்குட்டி”. அதன் பின் மூன்று ஆண்டுகள் இடைவெளிக்குப் பின் மீண்டும் பாக்யராஜ் இளையராஜாவோடு சேர்ந்தது பாக்யராஜே தயாரித்து இயக்கிய “வீட்ல விசேஷங்க” படத்தின் வழியாக. முதலில் மலையாள இயக்குநர் பாலசந்திர மேனன் இயக்குவதாக இருந்த படம் இது. எண்பதுகளின் நாயகி விஜிக்கு மீள் வரவு என்பதோடு பிரகதி, மோகனா என்ற இரண்டு அறிமுகங்கள். சுரேஷுக்கு கெளரவமான வேடம்.


அந்தக் காலத்து ஒலி நாடா யுகத்தில் தேயத் தேயக் கேட்டுக் குளிர்ந்த பாட்டு “மலரே தென்றல் பாடும் கானம் இது”. அருண்மொழி & எஸ்.ஜானகி ஜோடிப் பாட்டுத் தான் அந்த வயசுக்கு அப்போது இன்னும் இனித்தது. ஜேசுதாஸ் ஒற்றையாகப் பாடிய அதே பாடல் பின்னாளில் பிடித்தது. இப்போதோ “பூங்குயில் ரெண்டு ஒண்ணோட ஒண்ணாச் சேர்ந்துச்சாம்” பாடலில் தான் கட்டுண்டு கிடக்கிறது. 

“கொஞ்சம் சங்கீதம்” என்று எஸ்.ஜானகிக்கும், “ஜிங்கான் ஜினுக்குத்தான்” என ஸ்வர்ணலதாவுக்கும், “இந்த பஸ்ஸு தான் PTC” என்று மால்குடி சுபாவுக்குமாக மூன்று பெண் குரல்களுக்குத் தனித் தனிப்பாடல்கள் ஒவ்வொன்றும் ஒவ்வொரு ரகம் பாருங்கள்.


வீட்ல விசேஷங்க பாடல்களைக் கேட்க

https://youtu.be/dvAPNARXKu4


எப்படி “இந்த பஸ்ஸு தான் PTC” வீட்ல விசேஷங்க படப்பாடலின் அந்தத் துள்ளும் இசையை ஓட விட்டுத் தாளம் தட்டி ரசித்தோமோ அது போல “சாத்து நடை சாத்து” என்று சேதுபதி IPS கதவைத் தட்டியது. காவல்துறை அதிகாரியின் கதைப்புலத்தில் ஒரு நீரோட்டம் போலப் பாய்வது படத்தின் பாடல்கள். “வண்ணமொழி மானே” என்று ஜேசுதாசுக்கு மட்டும் ஒரேயொரு பாடல் இட ஒதுக்கீடு செய்து விட்டு மீதி நான்கு பாடல்களும் நான்கு முன்னணிப் பாடகிகளுக்கு. “விடியும் நேரம்” (சுனந்தா) பாட்டு இன்னமும் அதிக வெளிச்சம் பட்டிருக்க வேண்டிய, பள்ளிகளில் கீதமாக இசைக்கக் கூடிய மாசற்ற கீதம், “மழலை என்று” (சித்ரா) திரையிசையில் இன்னொரு குழந்தைப் பாட்டு என்று சேதுபதி IPS இசை

இன்னொரு தளத்தில் மின்னியது.


சேதுபதி IPS பாடல்களைக் கேட்க 

https://youtu.be/nxAuf9Wi7A0


இந்த வெள்ளி விழா ஆண்டுப் பொங்கல் படங்களில் இன்றைக்கும் உலகத் தமிழ் வானொலிகளில் வாரத்துக்குக் குறைந்த பட்சம் ஒருமுறையாதல் தீனி போடுவது “ராஜகுமாரன்” படப் பாடல்கள். அத்தனை பாடல்களும் தித்திக்கும் முத்துகள். நடிகர் பிரபுவின் 100 வது படம், சிவாஜி புரடெக்‌ஷன்ஸ் தயாரிப்பு, தொடர்ந்து நட்சத்திர நாயகர்களை வைத்துப் பெரு வெற்றி போட்டுக் கொண்டிருந்த ஆர்.வி.உதயகுமார் இயக்கம் என்று பரபரப்பைக் கிளப்பிய படம்.

திரும்பிய பக்கமெல்லாம் சுவர் விளம்பரங்கள், பஸ் தரிப்பு நிலையங்களைக் கூட விட்டு வைக்காத சோடனைகள் என்று ராஜகுமாரன் படத்துக்கான விளம்பரங்கள் இப்படியாக என்னுடைய அம்மாவின் சிறிய தந்தை அப்போது சென்னை போய் விட்டுத் திரும்பியவர் பிரமிப்போடு சொன்னார் அப்போது.

அதிக எதிர்பார்ப்பே இந்தப் படத்தை மண் கவ்வ வைத்தாலும் பாடல்களில் குறை வைக்காத திரவியம் இது.

என்னவென்று சொல்வதம்மா வஞ்சி அவள் பேரழகை, காட்டிலே கம்பங்காட்டிலே, சித்தகத்திப் பூக்களே,பொட்டு வச்சதாரு, ஆடி வரட்டும் மயிலைக்காளை, சின்னச் சின்னச் சின்ன்ஸ் சொல்லெடுத்து என்று கேட்டுக் கொண்டே இருக்கலாம். மஞ்சள் நிறத் தவளை என்று வாலியைக் கிண்டலடித்து வைரமுத்து ஜல்லியடிக்கவும் “என்னவென்று சொல்வதம்மா” பயன்பட்டது.


ராஜகுமாரன் பாடல்கள்

https://youtu.be/8DVAQsQynWw


“தைப்பொங்கலும் வந்தது” என்ற மகாநதி படப் பாடல் பின்னணியில் ஒலிக்க, நேற்று தமிழ் நாட்டின் ஒரு குக்கிராமத்தில் பொங்கல் விழாக் கொண்டாடியதை ஒரு செய்தித் தொலைக்காட்சியில் பார்த்து நெகிழ்ந்தேன். பண்டிகை தோறும் இம்மாதிரி ஆதார சுருதி ஒன்றை நினைவுபடுத்தும் பாடலைக் ஓடுது விட்டார் ராஜா. 

“ஶ்ரீரங்க ரங்க நாதனின் பாதம் வந்தனம் செய்யடி” என்றும் “பேய்களா பூதமா” என்றும் ஒரு அழகான குடும்பத்தின் நிலைக்கண்ணாடியாக இசை நின்று நிறுவிய அதே வேளை 

“தன்மானம் உள்ள நெஞ்சம் எந்நாளும் தாழாது ..

செவ்வானம் மின்னல் வெட்டி மண் மீது வீழாது...”

என்று இன்னொரு தளத்தில் போய் நின்று


“அன்பான தாயை விட்டு

எங்கே நீ போனாலும்

நீங்காமல் உன்னைச் சுற்றும்

எண்ணங்கள் எந்நாளும்”


என்று வலி மிகு தருணங்களை நதியில் அலைக்கலைந்து இழுத்துச் செல்லும் மரக்கிளையாய் அந்த அழகிய குடும்பம் சிதறிப் போகும் போது கண்ட வலியை மீண்டும் பார்க்கும் திராணியே இல்லாது இருப்போரைக் கண்டிருக்கிறேன். ஆம் மகாநதியை இன்னொரு தரம் பார்க்க  விரும்பாதவர்களே அதிகம். அவ்வளவுக்கு அது அவர்களை ஆக்கிரமித்து விட்டது.

படத்தோடு பயணிக்கும் பின்னணி இசை அந்த வலியை இன்னும் உள்ளிழுத்து வெளிக் கொணர்ந்தது.


மகா நதி என்ற காவியம் தமிழ் சினிமாவில் காலத்தால்  அழியாத கலைச் சித்திரம். பழம் பெரும் தயாரிப்பாளர் எஸ்.ஏ.ராஜ்கண்ணு தயாரிப்பில் மகாநதி ஷோபனாவை உலகுக்கு வெளிச்சம் போட்டுக் காட்டிய படம். அத்தோடு சங்கீதாவுக்கும் ஒரு வாழ்நாள் படமிது.


தைப்பொங்கல் போன்ற 

ஒரு பண்டிகை நாளில் இவ்வளவு துயரம் தோய்ந்ததொரு காவியத்தை வெளியிடும் துணிச்சல் எப்படி எழுந்தது என்ற வியப்பு 25 வருடம் கடந்து இன்னும் மாறவில்லை. கமல்ஹாசன் என்ற ஒப்பற்ற நாயகனின் தேடலில் இன்னொரு மைல்கல்.

இளையராஜா என்ற மகா கலைஞனின் ஒவ்வொரு ஆண்டும் இம்மாதிரிச் சாதனைகளோடு நிரப்பப்பட்டிருக்கிறது. மகாநதி கமலுக்கு மட்டுமல்ல இளையராஜாவுக்கும் தீனி போட்ட படம்.


மகா நதி பாடல்கள்

https://youtu.be/OizkVoOz8Wg 

 

இந்தப் படங்கள் ஒவ்வொன்றையும் பற்றி, அவற்றின் இசை நுணுக்கங்கள் குறித்து இன்னும் விரவலாக எழுத முடியும். குறிப்பாக மகாநதிக்கு ஒரு தனிப்பதிவே அர்ப்பணிக்கலாம். அர்ப்பணிப்பேன்



கானா பிரபா

16.01.2019

Attachment.png