வெண்பனியே.....
முன்பனியே.....
என் தோளில் சாய்ந்திட வா....
அப்படியே உருகி விழும் பனித்துகளாக இருக்கும் ஹாரிஸ் ஜெயராஜின் இசைப் பிரவாகம்.
ஒவ்வொரு இசையமைப்பாளருக்கும் தனித்த இலக்கணம் வகுக்கும் போது ஹாரிஸ் ஜெயராஜ் என்றால் முன்னே வந்து நிற்பது இவரின் மெல்லிசை தழுவிய தனித்துவமும், இசைக் கருவிகளை உள் வாங்கிய ஒலிப்பதிவு ஒரு மிருதுவான பட்டு விரிப்பைத் தடவும் உணர்வும் எழும்.
என்னதான் ஆர்ப்பரிப்பான, துள்ளிசைப் பாடல் என்றாலும் அதில் இரைச்சல் இல்லாத, கரடு முரடு இல்லாத ஒரு பனிச்சறுக்குப் பளிங்குத் தன்மை இவரின் தனித்துவம்.
ஒரு குறிப்பிட்ட மெட்டு வட்டத்துக்குள் சுற்றிக் கொண்டிருக்கிறார் என்ற விமர்சனம் இருந்தாலும் ஒவ்வொரு படத்தின் இசை வெளியீட்டிலும் ஆர்வத்தோடு தேடிக் கேட்க வைக்கும் திறனை இன்னமும் வைத்திருக்கிறார். அந்த மாதிரியான விமர்சனங்களை முறியடித்துத் தனித்துவமாக அவர் கொடுத்தவையும் ஏராளமுண்டு,
யம்மா யம்மா காதல் பொன்னம்மா
நீ என்ன விட்டு போனதென்னம்மா
கேட்கும் போது மயிர்க்கால்கள் குத்திட்டு நிற்கும் உணர்ச்சியலையைக் கொடுப்பார். அங்கே அதீத ஆர்ப்பரிப்பு இல்லாது எஸ்பிபியைப் பாட வைத்து அழகு பார்த்திருப்பார்.
“ஒருமுறை உன்னைக் காணும் பொழுது
இரு விழிகளில் ரோஜாக் கனவு
வானத்தை கட்டி வைக்க வழிகள் உண்டு
ஞானத்தை கட்டி வைக்க வழிகள் இல்லை”
அப்படியே வளைவு நெளிவுகளோடு குதிக்கும் அந்தப் பாட்டைக் கேட்கும் போதே சபாஷ் போடும் மனசு. ஹாரிஸ் ஜெயராஜை ஒரு மிகச் சிறந்த ஒலிச்சேர்க்கையாளர் என்ற எல்லை கடந்து அவர் அற்புதமான இசையமைப்பாளர் என்று நிறுவிய மெட்டுக்கட்டல் திறனை நிரூபிக்கும் அது.
“ஜன்னலின் வழி வந்து விழுந்தது
மின்னலின் ஒளி அதில் தெரிந்தது
அழகு தேவதை அதிசய முகமே,
வெண்மதி வெண்மதியே நில்லு……”
ஊரெல்லாம் “வசீகரா”வில் மையல் கொண்ட போது நானோ கட்டுண்டு கிடந்தது இதில். உச்சரிப்பு பேதம் இருந்தாலும் ஆட்கொண்டது ஹாரிஸின் மகுடி இசையில் மயங்கிய காலம் அது.
அனேகன் படத்தை முதன்முறை பார்த்த போது அதில் முகப்புப் பாடலாக வந்த
"தெய்வங்கள் இங்கே
திரவியம் இங்கே
மழலை பேசும் மழை இங்கே"
பாடலின் எளிமையே இப்போது வரைக்கும் மனசில் நிறைந்திருக்கிறது. அனேகன் பாடல்கள் ஒவ்வொன்றுமே ஒவ்வொரு தினுசாக இருக்கும் இசைக் கோவை.
தனிப்பட்ட ரீதியில் எனக்கு இன்றைய கால இசையமைப்பாளர்களில் காதல் ரசம் கொண்ட பாடல்களைக் கொடுப்பதில் ஹாரிஸ் ஜெயராஜ் தந்தவைகளை மிகவும் பிடிக்கும்.
அப்படியொரு தொகுப்பு கடந்த ஆண்டு கொடுத்தது.
சிலரைப் பார்த்தாலேயே இவர் என்றென்றும் நல்லா இருக்க வேண்டும் என்று மனசார நினைக்கத் தோன்றும் அப்படியொரு
முக இலட்சணம் பொருந்தியவர்.
https://www.youtube.com/watch?v=CyahRkPPoWY
இனிய பிறந்த நாள் வாழ்த்துகள் 🎹💚
கானா பிரபா
08.01.2022
0 comments:
Post a Comment