"பார்த்ததும் கரைந்தேனடா" - கேட்டதில் இனித்தது

கடந்த வாரம் இசைத்தட்டு விற்கும் கடைக்குள் நுழைகின்றேன், "பார்த்ததும் கரைந்தேனடா..காதலில் உறைந்தேனடா" என்று சித்ராவின் குரல் ஸ்பீக்கர் வழியாக வந்து செவி வழி போய் நெஞ்சில் கலக்கின்றது. அந்தப் பாடல் ஒலித்து ஓயும் வரை கடையில் சீடிக்களை மேய்வது போல பாவ்லா காட்டி விட்டு, முடிந்த கணம் பாடல் இசைத்தட்டை வாங்கிக் காரில் போட்டுக் கொண்டே மீண்டும் மீண்டும் கேட்டு ரசிக்கின்றேன்.

"பார்த்ததும் கரைந்தேனடா" என்ற அந்தப் பாடல் யாதுமாகி என்ற திரைப்படத்திற்காக ஜேம்ஸ் வசந்தனின் இசையில் சித்ராவோடு, விஜய் ஜேசுதாஸ் இணைந்து பாடியது. புதிதாக வரும் பாடல்களை மீண்டும் மீண்டும் கேட்டோ, திரையில் பார்த்தோ தான் மனதுக்கு நெருக்கமாக வைக்க முடிகின்றது. ஆனால் கேட்ட கணத்தில் இப்படி உடனேயே ஊடுருவும் பாடல்களில் சென்னை 28 இல் வந்த "யாரோ யாருக்குள் இங்கு யாரோ" பாடல் வரிசையில் இந்தப் பாடலும் சேர்ந்து விட்டது. என்ன காரணம் என்று பார்த்தால் உடனேயே தீர்மானமாகச் சொல்லக் கூடியது இந்தப் பாடல்களில் அந்நியமில்லாத எண்பதுகளில் வந்த பாடல்களின் வாடை என்று தான் தெரிகின்றது.

இன்று ஒரு படத்திலேயே பட்டியல் போட்டுப் பார்க்கக் கூடிய அளவுக்குப் பாடகர்களின் எண்ணிக்கை வந்த பின்னர் சித்ரா போன்ற பழைய குரல்களை எப்போதாவது தான் புதுப்பாடல்களில் கேட்க முடிகின்றது. அதுவும் "பார்த்ததும் கரைந்தேனடா" என்ற இந்தப் பாடலில் எண்பதுகளிலே கோர்த்த மெட்டுப் போன்ற வகையறாவுக்குச் சித்ராவின் குரல் எடுப்பாகப் பொருந்துகின்றது. கூடவே விஜய் ஜேசுதாசுக்குப் பதில் எஸ்.பி.பாலசுப்ரமணியத்தையும் போட்டிருந்தால் இன்னும் சிறப்பாக இருந்திருக்கும்.

ஜேம்ஸ் வசந்தனிடம் மெல்லிசையாகக் கொடுக்கக் கூடிய பாடல்கள் இன்னும் நிறைய தன் நெஞ்சிருப்பில் வைத்திருப்பார் போல. ஹாரிஸ் ஜெயராஜ் அரைத்த மாவையே அரைத்து வெற்றிக் கொடி நாட்டிக் கொண்டிருந்தாலும், ஜேம்ஸ் வசந்தன் கவனிக்கப்படத்தக்க அளவில் இசையமைத்துக் கொண்டிருக்கிறார் என்பதற்கு சுப்ரமணியபுரம், பசங்க வரிசையில் "யாதுமாகி" பாடலும் சேர்ந்து கொள்கிறது. மனுஷருக்கு இளையராஜா காலத்தில் இருந்து விடுபடமுடியாத ஆசை இருப்பதை இங்கே நான் பகிரும் பாடலே சாட்சியமாக அமைகின்றது.

சமீபகாலமாக அதிகம் காதல் பாடல்களில் பயன்படுத்தப்படாத தபேலா வாத்தியத் துள்ளலும் எடுப்பாக இந்த எண்பதுகள் மெட்டை அலங்கரித்து மெருகூட்டுகின்றது. உதாரணமாக "கேட்கும் போது இல்லை என்று ஏங்க வைக்கிறாய்" என்று விஜய் ஜேசுதாஸ் முடிக்க நினைக்க வந்து ஒட்டிக் கொள்ளும் தபேலாவின் தாளக்கட்டு அருமை.
ஆனால் என்ன, பாடல் ஆரம்பிக்கும் விதமும், இடையிசையில் பாவித்திருக்கும் நவீன வாத்தியக்கருவிகள் பாடலின் ஓட்டத்துக்கு அந்நியமாக இருக்கின்றன. இருந்தாலும்

பார்த்ததும் கரைந்தேனடா
காதலில் உறைந்தேனடா
கேட்டுக் கொண்டே இருப்பேனடா...